Ésaïe 2
2
1So ayeke tënë ti aye so Ésaïe, molenge ti Amoz abaa
na ya ti mbeni ye tongana bango-li: aye ni ayeke na ndö
ti kodro ti Juda nga na ndö ti gbata ti Jérusalem.
Amara kue ayeke gue na Jérusalem
(Mish 4.1-3)
2Mbeni lâ, gbanda,
hoto so kota da ti *KOTA GBIA ayeke na ndö ni
ayeke luti ngangu na ndö ti akota hoto kue;
hoto ni ayeke yo na nduzu ahon akete hoto kue
si amara nde kue ayeke gue kâ tongana ngu so ayeke sua.
3Fade amara gbani gbani
ayeke gue kâ si ala yeke tene:
“Ala ga, e gue na li ti hoto ti KOTA GBIA,
na kota da ti Nzapa ti Jacob.
Lo yeke fa na e lege so lo ye titene e mu,
e yeke tambula na alege ti lo.”
Biani, ndia ti KOTA GBIA alondo na *Sion,
tënë ti lo alondo na Jérusalem.
4 Lo yeke fâ ngbanga na popo ti amara nde,
lo yeke leke tënë na popo ti amara gbani gbani.
Amara ni ayeke mu ayongoro zeme ti ala
ti sara na akpoka;
ala yeke mu alikongo ti ala
ti sara na azeme ti fango na ale ti kobe.
Mbeni mara ayeke kiri
ti mu yongoro zeme na tere ti mbeni mara pepe;
azo ayeke kiri ti manda lege ti tiringo bira pepe.
5 *Ahale ti Jacob, ala ga
e tambula na ya ti lumiere ti KOTA GBIA!
Lango ti KOTA GBIA, lango ti fango ngbanga
6 *KOTA GBIA, mo ke azo ti mo,
*ahale ti Jacob awe,
ngbanga ti so azo ti bango nda ti aye
alondo na mbage ti To aga,
ala si singo na ya ti kodro ti azo ti mo.
Azo ti gingo nda ti atongoro asi singo daa,
tongana ti so ala yeke gbani gbani
na ya ti kodro ti Filistii.
Azo ti mo na awande ayeke fono oko.
7Wen ti nginza na lôro asi singo
na ya ti kodro ni,
zo alingbi ti diko wungo ti mosoro ni pepe;
ambarata asi singo na ya ti kodro ni,
zo alingbi ti diko apusu ti mbarata ni pepe.
8Ayanda asi singo na ya ti kodro ni.
Azo ayeke kuku ti voro
ye so maboko ti ala wani asara;
ala yeke kuku na gbe ti ye
so maboko ti ala wani aleke.
9Ndani laa, fade azo ayeke ba li ti ala na sese,
kamene ayeke gbu le ti ala.
KOTA GBIA, zi siokpari na li ti ala pepe!
10 Ala gue, ahonde tere ti ala na popo ti atêne!
Ala li na gbe ti sese
ti kpe ngonzo ti KOTA GBIA,
ti kpe gonda ti lo so ayeke kota ahon ndoni!
11Fade kamene ayeke gbu le ti zo ti baba,
a yeke zia zo ti pikango kate na kete ndo.
Na lango ni so,
gi KOTA GBIA oko laa azo ayeke ya iri ti lo.
12Biani, KOTA GBIA so ayeke na ndö ti dunia kue,
mbeni lango ti lo ayeke ga
so lo yeke fâ ngbanga
na li ti azo ti pikango kate,
azo so ayeke ya iri ti ala
nga na azo so abaa atene, ala hon amba ti ala so;
lo yeke kiri ala na kete ndo.
13Lo yeke fâ ngbanga na li ti akeke
ti sedre ti Liban
so ayo na nduzu mingi
nga na akeke ti shene ti Bashan.
14Lo yeke fâ ngbanga na li ti akota hoto kue
nga na li ti akete hoto so kue ayo na nduzu.
15Lo yeke fâ ngbanga na li ti akota da
so kue ayo na nduzu
nga na li ti akota gbagba ti bira kue.
16 Lo yeke fâ ngbanga
na li ti akota mangboko ti Tarsis
nga na li ti apendere mangboko.
17Fade kamene ayeke gbu azo ti baba;
a yeke kiri na azo ti pikango kate na kete ndo.
Na lango ni so,
gi KOTA GBIA oko laa azo ayeke ya iri ti lo.
18Fade ayanda kue ayeke daa mbeni pepe.
19Na ndembe so KOTA GBIA ayeke londo
ti zia mbeto na be ti azo ti sese so,
ala yeke li na ya ti adu ti têne
nga na ya ti adu ti sese
ti kpe ngonzo ti lo,
ti kpe gonda ti lo so ayeke kota ahon ndoni.
20Na lango ni so, azo ayeke mu ayanda ti ala ti wen ti nginza na ti lôro so ala yeke kuku ti voro ni so, ti bi ni na akolofia nga na anyama-ti-ngia. 21Na ngoi so lo yeke londo ti zia mbeto na be ti azo ti sese so, ala yeke li na ya ti adu ti têne nga na popo ti atêne so ya ni asuru, ti kpe kota ngonzo ti KOTA GBIA nga na gonda ti lo so ayeke kota ahon ndoni.
22Ala zia be ti ala na ndö ti zo pepe!
Fini ti lo ayeke gi pupu
so ayeke sigigi na hon ti lo.
Lo yeke nyen?
© La Société Biblique de Centrafrique 2010