Aggée 1

Ngoi ti kiri ti leke kota da ti KOTA GBIA alingbi awe

1Na ngu use ni so Darius ayeke gbia, na lango oko ti nze omene ni, tënë ti *KOTA GBIA asi na wayanga-Nzapa Aggée titene lo tene peko ni na Zorobabel, govoronere ti sese ti Juda, molenge ti Shealtiel. Lo tene nga peko ti tënë ni na kota wayango-sandaga Yeshua, molenge ti Yosadak. 2Tënë so KOTA GBIA so ayeke na ndö ti dunia kue atene ayeke so: “Azo ti kodro so ayeke tene: ‘Ngoi ti sarango kota da ti KOTA GBIA ade ti lingbi pepe’ ” 3Tënë ti KOTA GBIA asi na wayanga-Nzapa Aggée titene lo tene peko ni, lo tene: 4“Ngoi titene ala lango na ya ti ada ti ala so ala leke ni pendere pendere laa si kota da ti mbi, KOTA GBIA abuba kue so? 5Tënë so KOTA GBIA so ayeke na ndö ti dunia kue atene ayeke so: Fadeso, ala gbu li ti ala nzoni na ndö ti aye so ayeke si na ala. 6Ala lu kobe mingi, me ala fâ ni gi kete; ala yeke te kobe, me ya ti ala ayeke si pepe; ala yeke nyon vin, me tere ti ala ayeke nzere pepe; ala yeke yu bongo, me tere ti ala ayeke mu wâ pepe. Zo ti kua ayeke wara futa ti lo, me nginza ni ayeke li gi na ya ti bozo so akoro awe. 7Tënë so KOTA GBIA so ayeke na ndö ti dunia kue atene ayeke so: Ala gbu li ti ala nzoni na ndö ti aye so ayeke si na ala.” 8KOTA GBIA atene: “Ala gue na ndö ti hoto, ala de akeke aga na ni, ala sara na kota da ti mbi. Tongaso fade be ti mbi ayeke nzere si azo abaa nengo ti mbi. 9Ala ku fade ti wara kobe ti yaka mingi, me ala wara ni gi kete. Kete ni so angba na ala so, mbi huru ni si ahon kue. Ye ni asi tongaso ndali ti nyen? So tënë ti yanga ti KOTA GBIA so ayeke na ndö ti dunia kue laa: Ye ni asi ndali ti so kota da ti mbi abuba, me zo oko oko amu ngangu ti lo kue ti sara gi da ti lo wani. 10Ndani laa ngu-Nzapa ake ti pika si sese ake ti mu ale ti kobe. 11Mbi sara si buru aga na ya ti kodro ni: ndo ahole na li ti ahoto, na ya ti ayaka ti *ble, ayaka ti *vinye, ayaka ti olive nga na tanga ti ayaka ti kobe kue. Azo na anyama abaa pasi mingi ndali ti buru ni si peko ti akua ti maboko ti ala kue angba senge.”

12Tongaso Zorobabel, molenge ti Shealtiel, na Yeshua, kota wayango-sandaga, molenge ti Yosadak na tanga ti azo ti kodro ni kue ama atënë ti KOTA GBIA, Nzapa ti ala, atënë so lo zia na yanga ti wayanga-Nzapa Aggée titene lo tene peko ni na ala si azo ni akpe mbeto ti KOTA GBIA. 13Na pekoni, Aggée, watokua ti KOTA GBIA atene tënë alingbi na tokua so KOTA GBIA amu na lo ndali ti azo. Tënë ni ayeke so: “Mbi yeke na ala; so tënë ti yanga ti KOTA GBIA laa.” 14KOTA GBIA amu ngangu na be ti Zorobabel, govoronere ti sese ti Juda, molenge ti Shealtiel; lo mu nga ngangu na be ti kota wayango-sandaga Yeshua, molenge ti Yosadak nga na tanga ti azo ti kodro ni. Ala ga si ala to nda ti sara kua ti kota da ti KOTA GBIA, Nzapa ti ala so ayeke na ndö ti dunia kue. 15Ala to nda ti akua ni na lango baleuse na osio ti nze omene ni.

Currently Selected:

Aggée 1: MNF2010

Highlight

Copy