Tongo nda ti aye 3
3
Nzapa atumba Adam na Eve na yaka ti Eden
1 Ngbo ayeke na kode ti handango ndo ahon anyama ti ngonda so kue KOTA GBIA Nzapa asara ala. Lo hunda wali ni, lo tene: “Nzapa atene na ala: ‘Ala te ale ti keke so kue ayeke na yaka ni so pepe’ biani?” 2Wali ni akiri tënë na ngbo, atene: “E lingbi ti te ale ti keke ti yaka ni. 3Me ale ti keke so ayeke na be ti yaka ni so, Nzapa atene: ‘Ala te ni pepe, ala ndu nga ni pepe, ngbanga ti ala kui.’ ” 4Ngbo atene na wali ni: “Mvene! Ala yeke kui pepe. 5Me Nzapa ahinga atene, na lango so ala yeke te ni, fade le ti ala ayeke zi si ala yeke ga tongana Nzapa ti hinga ye so ayeke nzoni na ye so ayeke sioni.”
6Wali ni abaa so ale ti keke ni ayeke nzoni titene zo ate ni; ayeke pendere titene zo abaa ni si ayeke nzoni ti sara si zo ahinga ndo. Lo mu mbeni le ni, lo te, lo mu nga na koli ti lo so ayeke na tere ti lo si lo kue, lo te ni. 7Ala use kue, le ti ala azi si ala baa so tere ti ala ayeke senge. Ala mu akugbe ti fige, ala fu na kambusu si ala yu.
8 Na lakui, na ndembe so pupu ayeke ya kete kete, ala ma go ti KOTA GBIA Nzapa so lo yeke fono na ya ti yaka ni. Koli ni na wali ti lo ahonde tere ti ala na popo ti akeke ti yaka ni ndali ti KOTA GBIA Nzapa abaa ala. 9KOTA GBIA Nzapa airi koli ni, lo hunda lo, lo tene: “Mo yeke na ndo wa?” 10Koli ni akiri tënë, atene: “Mbi ma go ti mo na ya ti yaka. Mbeto asara mbi, ngbanga ti so tere ti mbi ayeke senge si mbi honde tere ti mbi.” 11Nzapa ahunda lo, atene: “Zo wa laa afa na mo atene, tere ti mo ayeke senge? Mo te le ti keke so mbi mu yanga na mo ti te ni pepe so?” 12Koli ni akiri tënë, atene: “Wali so mo mu lo na mbi titene lo duti na tere ti mbi so, lo laa lo mu le ti keke ni na mbi si mbi te.”
13 KOTA GBIA Nzapa ahunda wali ni, atene: “Nyen laa mo sara tongaso?” Wali ni akiri tënë na lo, atene: “Ngbo ahanda mbi si mbi te le ti keke ni.”
14KOTA GBIA Nzapa atene na ngbo:
“Ndali ti ye so mo sara so,
mbi yeke deba mo.
Na popo ti anyama ti kodro kue,
na anyama ti ngonda kue,
mo yeke tambula ande na ya ti mo
si mo yeke te fuku ti sese
na lango so kue mo yeke ngba na fini.
15 Mbi yeke zia kangbi na popo ti mo na wali,
na popo ti *ahale ti mo, na ala ti wali.
Fade ahale ti wali ayeke zia ka na li ti mo
si mo, mo yeke zia ka na ngbonda ti gere ti ala.”
16Na pekoni, Nzapa atene na wali:
“Mbi yeke sara ande titene
na ndembe so mo yeke na ngo,
mo yeke baa pasi mingi na ni;
na ya ti pasi si mo yeke du amolenge.
Fade nzara ti be ti mo kue
ayeke gi na mbage ti koli ti mo,
me lo yeke sara komandema na ndö ti mo.”
17Ti hunzi na ni, lo tene na koli, lo tene: “Ndali ti so mo ma yanga ti wali ti mo si mo te le ti keke so mbi mu yanga na mo ti te pepe so,
mbi yeke deba sese ndali ti mo.
Fade mo yeke baa pasi
ti wara kobe ti mo na lege ti sese ni,
na lango so kue mo yeke ngba na fini.
18 Sese ni ayeke sara titene
aki na akeke ti ki asigigi ndali ti mo.
Fade mo yeke te
aye so ayeke sigigi na ya ti yaka.
19Mo yeke wara kobe ti mo
gi na gbiki ti li ti mo,
ngbii asi na lango so
mo yeke kiri na ya ti sese,
ngbanga ti so a mu mo na ya ti sese.
Mo yeke fuku ti sese,
mo yeke kiri ande
na ya ti fuku ti sese.”
20Koli ni, Adam, adi iri ti wali ti lo Eve, so ti tene “Lo so ayeke na Fini”, ngbanga ti so lo laa lo yeke mama ti azo so kue ayeke na fini. 21KOTA GBIA Nzapa aleke abongo na poro ti nyama ndali ti Adam na wali ti lo si lo yu na ala. 22 KOTA GBIA Nzapa atene: “Baa, zo aga tongana mbeni oko ti e awe, na lege ti hingango ye so ayeke nzoni na ye so ayeke sioni. Fadeso, alingbi a kanga lege na lo si lo kiri lo yoro maboko ti lo pepe, ti mu le ti keke so ayeke mu fini na zo so. Tongana lo te ni, fade lo yeke ngba na fini lakue lakue.” 23KOTA GBIA Nzapa atumba zo na ya ti yaka ti Eden titene lo gue, lo de sese ti lu kobe daa; sese so a mu ni si a sara na lo so. 24So KOTA GBIA Nzapa atumba zo na ya ti yaka ni awe, lo zia *asheruben na mbage ti To ti yaka ni. Asheruben ni ayeke na yongoro zeme so le ni ayeke za zango si ayeke turne mbage na mbage ti kanga lege na zo ti gue na tere ti keke so ayeke mu fini na zo.
Currently Selected:
Tongo nda ti aye 3: MNF2010
Highlight
Share
Copy
Want to have your highlights saved across all your devices? Sign up or sign in
© La Société Biblique de Centrafrique 2010