Galasii Kete tënë na ndö ti Mbeti so Paul atokua na Eglize ti Galasii
Kete tënë na ndö ti Mbeti so Paul atokua na Eglize ti Galasii
Kodro so a iri ni laso Turkii, *a-Eglize ayeke ando daa na mbage ti Banga ti kodro ni. A yeke iri ando mbage ti kodro ni so Galasii. Paul atokua mbeti so na a-Eglize ni. Na ngoi ti tambula ti lo ti fani use na ti fani ota ni laa Paul asara titene a-Eglize ni abaa gigi. Me na peko ti lo, ambeni zo nde asi na kodro ni, ala yeke fa mbeni tënë nde. Na ya ti a-Eglize ni, azuife ayeke daa, ambeni zo ti amara nde so ayeke sambela lani anzapa nde ayeke nga daa. Azuife ni angba lakue ti sara ye na lege ti ambeni ndia ti vorongo Nzapa ti ala. Andia ni agbanzi lege na azuife ti te ye ndo oko na azo ti amara nde. Andia ni amu yanga na akoli-zuife ti fâ *ganza. Awato ti Paul aye gbe ti tënë ti ndia so. Ala tene, alingbi akoli ti amara nde afâ nga ganza si na pekoni ala lingbi ti ma na be na Jésus Christ senge. Fango ye so ague nde na ti Nzoni Tënë ti Jésus Christ. Nilaa Paul asu mbeti na ndö ni ti tokua na azo ti Eglize ti Galasii.
Paul aye titene ala hinga mbirimbiri atene, gi na lege ti mabe na Jésus Christ oko si zo aga mbirimbiri na le ti Nzapa. Lo fa nda ti tënë ni na lege ti amolongo ti atënë ota.
Akota ye so ayeke na ya ti mbeti so:
Na kota gere 1 asi na 2, Paul ayeke tene tënë ti mbai ti lo wani. Lo yeke zuife, me lo ga zo ti tokua ti Jésus Christ ti fa ye na azo ti amara nde. Azo ti li ti Eglize ti Jérusalem ayeda na lo: a lingbi ti gbu azo ti amara nde na ngangu ti sara ye alingbi na *Ndia ti Moïse pepe. Na ndö ti tënë so, Paul asuku na Pierre mingi (2.11-21). Paul adabe ti Pierre na tënë so: Nzapa ayeke yamba azo gi tongana ala ma na be na Jésus Christ, me na lege ti sarango ye na lege ti ambeni ndia ti vorongo Nzapa pepe.
Na kota gere 3 asi na 4, Paul akiri aluti na ndö ti atënë ti Kozo Mbuki ti fa na atënë ti lo. Lo tene, ambeni ndia ti vorongo Nzapa ayeke mu lege na zo ti mai na ya ti tënë ti Nzapa senge. Me zendo ti Nzapa ayeke ando daa kozoni si Ndia abaa gigi. Zendo ti Nzapa aga taa-tënë na lege ti Jésus Christ. Na le ti Nzapa, azo kue ayeke gi oko. Na lege ti Jésus Christ, azo aga oko na Nzapa si ala ga nga oko na amba ti ala (3.28); so ti tene, ataa zo ni ayeke azuife wala azo ti amara nde so lege ti vorongo nzapa ti ala yeke nde; ataa zo so ayeke ngbaa wala zo so ayeke ngbaa pepe, ataa wali wala koli.
Na kota gere 5 asi na 6, Paul ayeke fa nda ti tënë so lo tene so. Lo tene: azo ti Nzapa ayeke angbaa mbeni pepe. Zo so ama na be awe, tënë ti gango mbirimbiri ayeke so be ti lo mbeni pepe (3.11). Lo ga senge zo ndali ti amba ti lo. “Sara so, sara so!” zo ayeke baa na ya ti ndia ti Christ pepe. Me ndia ni ayeke fa na zo ti mu maboko na amba ti lo (6.2). Zo so ayeke senge zo, lakue lo yeke baa lege ti amba ti lo si Yingo ti Nzapa ayeke fa lege na lo.
Highlight
Share
Copy
Want to have your highlights saved across all your devices? Sign up or sign in
© La Société Biblique de Centrafrique 2010