Ndia ti fani use ni 25
25
Lege ti fango ngbanga
1Moïse atene: Tongana azo use awara tënë na popo ti ala si ala use kue ague na ngbanga titene a fâ ya ti tënë ni, zo so tënë ayeke na li ti lo, fade a yeke fâ ngbanga na li ti lo; zo so tënë ayeke na li ti lo pepe, a yeke bi tënë na li ti lo pepe. 2Zo so tënë ayeke na li ti lo so, tongana sioni ti lo ni alingbi na pika, fade wafango-ngbanga ayeke mu yanga titene a tanda lo na sese. Na pekoni, a yeke pika zo ni na dawa ti wafango-ngbanga ni alingbi na sioni so lo sara. 3 A yeke pika lo fani baleosio; me pika ni ayeke hon so pepe. Tongana a pika lo ahon ndoni, fade ita ti ala ayeke ga buba na le ti ala.
Ndia ti batango bagara
4 Moïse atene: Alingbi ala kanga yanga ti bagara pepe na ndembe so lo yeke do ale ti *ble na le ti lakere.
Tënë ti wali-mua so ayeke na molenge pepe
5Moïse atene: Tongana a-ita ti koli aduti na ndo oko si mbeni oko akui, me lo du molenge pepe, wali ti wakuâ ni alingbi ti mu mbeni koli na ya ti mbeni sewa nde pepe. Fade ita ti koli ni ayeke sara kua ti lo ti kogara na tere ti wali ni: lo yeke mu wali ni si lo yeke bongbi na lo. 6 Kozo molenge-koli so wali ni ayeke du, fade a yeke zia iri ti wakuâ ni na ndö ti lo. Tongaso si iri ti wakuâ ni angba lakue na sese ti Israel.
7Me tongana koli ni aye ti mu wali ti ita ti lo ni pepe, fade wali ni ayeke gue ti baa *akangba so ayeke duti na yanga ti gbata; lo yeke tene na ala, lo tene: “Kogara ti mbi ake ti sara titene iri ti ita ti lo angba na Israel; lo ke ti sara kua ti lo ti kogara na tere ti mbi.” 8Fade akangba ti gbata ni ayeke iri koli ni si ala yeke tene tënë na lo. Tongana lo ngba ti ke si lo tene: “Mbi ye ti mu lo ti ga wali ti mbi pepe”, 9fade wali ni ayeke ga nduru na lo na le ti akangba ni, lo yeke zi pâpä ti kogara ti lo si lo yeke tuku ngu ti yanga na le ti lo. Na pekoni, lo yeke tene: “Koli so ake ti leke da ti ita ti lo, ye so alingbi titene a sara na lo laa!” 10Na Israel, fade a yeke di iri ti sewa ti koli ni, atene: “Sewa ti zo so a zi pâpä ti lo.”
Sioni lege ti tiri so ndia ake ni
11Moïse atene: Mbeni ye tongaso alingbi ti si: mbeni koli na mba ti lo ayeke tiri si mbeni oko ayeke pika mba ti lo ni mingi. Tongaso, wali ti koli so mba ti lo ayeke pika lo mingi so aga ti zi koli ti lo na maboko ti zo ti pikango lo. Tongana wali ni agbu zo ti pikango koli ti lo ni na ya ti bongo, 12fade ala, azo ti Israel, ala yeke baa mawa ti wali ni pepe; ala yeke de maboko ti lo.
Alingbi azo ti dengo buze aka ye na legeni
13Moïse atene: Alingbi ala zia na ya ti bozo ti ala mara ti akilo use pepe: nengo ni na yapungo ni. 14Alingbi ala duti na mara ti asakpa use ti hakango na ye pepe: kota ni na kete ni. 15Alingbi ala duti na mbirimbiri kilo nga na mbirimbiri sakpa ti hakango na ye. Tongaso si fade gigi ti ala ague, ayo na ya ti kodro so *KOTA GBIA Nzapa ti ala ayeke mu na ala. 16 Biani, zo so kue ayeke sara ye tongaso, zo so kue ayeke sara ye ti kirikiri, lo yeke zo ti sioni mingi na le ti KOTA GBIA Nzapa ti ala.
Azo ti mara ti Amalek, awato ti Israel ti ngu na ngu
17Moïse atene: Ala dabe ti ala na ye so Amalek asara ando na ala na lege, na ndembe so ala sigigi na Ezipte. 18Ndali ti so ala kpe mbeto ti Nzapa pepe, azo ti Amalek aku ala, azo ti Israel na lege. Andaa ala, azo ti Israel, ala woko lani kue awe, ngangu ahunzi na ala kue. Tongaso azo ti mara ti Amalek aga ati na ndö ti ambeni zo so angba ti tambula na peko si afâ ala. 19 Fadeso, *KOTA GBIA Nzapa ti ala ayeke mu na ala lege ti wu tere na ya ti kodro so lo yeke mu na ala titene aga ti ala. Fade ala yeke fâ azo ti mara ti Amalek ti hunzi ala; tongaso si zo ayeke kiri ti dabe ti lo na mara ti ala pepe na ndö ti sese so. Ala, azo ti Israel, be ti ala agirisa na ni pepe!
Currently Selected:
Ndia ti fani use ni 25: MNF2010
Highlight
Share
Copy
Want to have your highlights saved across all your devices? Sign up or sign in
© La Société Biblique de Centrafrique 2010