Amos 9
9
Oku ye so Amos abaa: zo oko alingbi ti kpe fango ngbanga ti Nzapa pepe
1Mbi baa Kota Gbia aluti na nduzu na ndö ti gbalaka, lo tene: “Alingbi ala kungbi ali ti akota yongoro gere ti kota da ti Nzapa si agere ti da ni ayingi.
Ala fâ li ti da ni si da ni atuku na ndö ti azo kue.
Azo so angba na fini,
fade mbi yeke sara si ala kui kuâ ti yongoro zeme;
zo oko alingbi ti kpe pepe,
zo oko alingbi ti soo kuâ pepe.
2Tongana ala kungbi yanga ti ndo ti akuâ ti li kâ,
maboko ti mbi ayeke gbu ala ti sigigi na ala.
Tongana ala gue ngbii asi na yayu kâ,
mbi yeke sara si ala zu na sese.
3Tongana ala gue, ahonde tere ti ala na li ti hoto ti Karmel,
mbi yeke gue ti gi ala si mbi yeke gboto ala kâ.
Tongana ala linda na gbe ti kota ngu-ingo
titene le ti mbi abaa ala pepe,
mbi yeke tokua sioni ngbo ti gue ti te ala kâ.
4Tongana awato ti ala agbu ala ague na ala
na kodro wande,
kâ, mbi yeke mu yanga si a fâ ala kue.
Le ti mbi ayeke ngba na ndö ti ala,
mbi yeke sara sioni na ala,
me mbi yeke sara nzoni na ala pepe.”
5Kota Gbia NZAPA so ayeke na ndö ti dunia kue,
tongana lo ndu sese na maboko ti lo,
sese ni ayeke yingi
si azo ti kodro ni kue ayeke duti na vundu.
Sese ni kue ayeke londo na nduzu,
na pekoni, ayeke kiri na gbeni
tongana kota ngu ti Ezipte
so asuku si akiri na gbeni.
6Lo so lo leke ndo ti dutingo ti lo na yayu kâ,
lo gbara le ti nduzu na ndö ti sese;
lo so lo iri angu ti kota ngu-ingo ti ga
si lo tuku ni na ndö ti sese,
iri ti lo ayeke *KOTA GBIA.
Nzapa ayeke fâ ngbanga na ndö ti azo ti sioni
7So tënë ti yanga ti *KOTA GBIA laa: “Ala azo ti Israel,
na le ti mbi, ala ne ahon azo ti Etiopii?
Mbi mu ala na sese ti Ezipte, mbi sigigi na ala,
mbi mu nga azo ti Filistii na ti Kaftor, mbi sigigi na ala
si mbi mu nga azo ti Sirii na ti Kir, mbi sigigi na ala.
Tënë ni ayeke tongaso pepe?”
8Baa, le ti Kota Gbia NZAPA
ayeke na ndö ti kodro-gbia
so siokpari asi singo na ya ni.
So tënë ti yanga ti KOTA GBIA laa:
“Fade mbi yeke zi kodro-gbia ni na ndö ti sese so,
me mbi yeke hunzi *ahale ti Jacob kue pepe.
9Ti fadeso, mbi yeke mu yanga
titene a yengere azo ti Israel
na popo ti azo ti amara nde
tongana ti so a yeke yengere ale ti kobe
si gi ale ti têne laa angba na ya ti yengere ni.
10Asioni zo so ayeke na popo ti azo ti mbi,
fade ala kue ayeke kui kuâ ti bira,
ala so lani ayeke tene:
‘Fade kota kpale ayeke ndu e pepe,
kpale ni ayeke si na e pepe!’ ”
Nzapa ayeke kiri ti mu kodro ti Israel na nduzu
11 “Gbata ti David ayeke tongana mbeni da
so atuku na sese awe.
Na lango ni so, fade mbi yeke kiri ti yo ni na nduzu,
mbi yeke kanga adu ti da ni,
mbi yeke kiri ti leke da ni kue;
mbi yeke sara si akiri aluti na nduzu tongana ti kozo.
12Tongaso, atanga ti sese ti azo ti mara ti Edom
na ti amara nde,
sese so a di iri ti mbi daa so,
fade azo ti Israel ayeke mu ni titene aga ti ala.”
So tënë ti yanga ti *KOTA GBIA laa,
lo so lo yeke sara aye ni so.
13So tënë ti yanga ti KOTA GBIA laa:
“Alango ayeke ga so zo so angba ti fâ yaka,
mo ye ti baa, zo ti fango ale ti kobe asi awe,
zo so angba ti lu ale ti *ble,
mo ye ti baa, zo ti fango ale ti vinye asi awe.
Na lango ni so, fade fini vin ayeke londo
na ndö ti akota hoto ti sua na sese,
fini vin ni ayeke sua amu ndö ti akete hoto kue.
14Fade mbi yeke sara si
gigi ti azo ti Israel, azo ti mbi, akiri aga nzoni,
ala yeke kiri ti leke agbata so abuba so,
ala yeke lango na ya ti agbata ni,
ala yeke fâ ayaka ti vinye, ala yeke nyon vin ni;
ala yeke fâ ayaka si ala yeke te akobe ni.
15Mbi yeke kiri na ala na ndö ti sese ti ala;
sese so mbi mu na ala so,
zo ayeke kiri ti tumba ala daa pepe.”
Tënë so KOTA GBIA, Nzapa ti ala atene laa.
Currently Selected:
Amos 9: MNF2010
Highlight
Share
Copy
Want to have your highlights saved across all your devices? Sign up or sign in
© La Société Biblique de Centrafrique 2010
