2 Samuel 7
7
Zendo ti Nzapa ndali ti David na ahale ti lo
(1 Mbai 17.1-15)
1So gbia David aduti na yangbo ti lo awe si *KOTA GBIA azi lo na maboko ti awato ti lo so angoro kodro ti lo si lo duti kpoo, 2gbia atene na wayanga-Nzapa Natan: “Baa, mbi yeke lango ti mbi na ya ti da so a sara ni na keke ti sedre, me sanduku ti *mbuki ti Nzapa ayeke lango na gbe ti da ti bongo.” 3Natan akiri tënë na gbia, atene: “Ye so mo leke na be ti mo ti sara, ayeke nzoni mo sara ni, ngbanga ti so KOTA GBIA ayeke na mo.”
4Na bi ni so, tënë ti KOTA GBIA asi na Natan, atene: 5“Gue mo tene na David, zo ti kua ti mbi, mo tene: Tënë so KOTA GBIA atene ayeke so: ‘Mo laa mo yeke sara da na mbi titene mbi lango daa? 6Na lango so mbi sara si azo ti Israel asigigi na sese ti Ezipte ngbii asi laso, mbi de mbi lango na ya ti mbeni da pepe; me na ya ti tambula ti mbi, mbi yeke lango gi na gbe ti da ti bongo. 7Na ngoi so kue mbi na azo ti Israel kue, e tambula, mbi mu amakonzi ti amara ti Israel ti fa lege na azo ti Israel, azo ti mbi. Laoko mbi gboto mê ti mbeni makonzi, mbi tene: Ngbanga ti nyen si mo sara na mbi da pepe na keke ti sedre?’ 8Ti fadeso, mo tene na David, zo ti kua ti mbi, mo tene: Tënë so KOTA GBIA so ayeke na ndö ti dunia kue atene ayeke so: ‘Mbi laa mbi mu mo na ya ti ngonda, na peko ti ataba na angasa titene mo ga kota zo na ndö ti azo ti mbi, azo ti Israel. 9Na ndo so kue mo gue daa, mbi yeke fade na mo, mbi fâ awato ti mo kue na dawa ti mo. Fade mbi yeke sara titene iri ti mo awu tongana ti akota zo ti sese so. 10Mbi yeke mu mbeni ndo na azo ti Israel, azo ti mbi; mbi yeke zia ala na ndo ni so titene ala duti daa si mbeni ye ayingi ala pepe, titene ambeni mara so ayeke na sioni pialo akiri ti sara ngangu na ala tongana ti kozoni pepe. 11Ti londo na lango so mbi zia awafango-ngbanga ti sara komandema na ndö ti azo ti Israel, azo ti mbi, mbi tumba awato ti mo kue si mo wara lege ti duti kpoo. KOTA GBIA atene na mo lani atene, lo laa lo yeke sara da ndali ti mo. 12 Tongana ngoi ti mo alingbi awe titene mo gue ti wara akotara ti mo, fade mbi yeke mu mbeni *hale ti mo, so ti tene lo so mo du lo, titene lo ga gbia. Mbi yeke sara titene lengo-gbia ti lo akpengba. 13Lo laa lo yeke sara da ndali ti mbi; mbi yeke sara titene lengo-gbia ti lo akpengba kpu na kpu. 14 Fade mbi yeke duti babâ ti lo si lo yeke duti molenge ti mbi. Tongana lo sara sioni, mbi yeke pika lo na zaza tongana ti so babâ ayeke pika molenge ti lo. 15 Me a yeke zi nzoni be ti mbi na lo pepe, tongana ti so mbi zi nzoni be ti mbi na Saul so mbi zi lo na dawa ti mo. 16Mbeni hale ti mo ayeke le-gbia na peko ti mo kpu na kpu. Biani, lengo-gbia ti asewa ti mo ayeke kpengba kpu na kpu.’ ” 17Natan atene na David peko ti aye so kue KOTA GBIA afa na lo na ya ti mbeni ye tongana bango-li.
Sambela ti David
(1 Mbai 17.16-27)
18Gbia David ague, aduti na dawa ti *KOTA GBIA si lo tene: “Kota Gbia NZAPA, mbi yeke zo wa? Asewa ti mbi ayeke zo wa si mo mu mbi, mo zia mbi na ndo so? 19Kota Gbia NZAPA, ye ni akiri alingbi na le ti mo pepe. Tongaso, mo kiri mo mu zendo ndali ti ahale ti mbi ndali ti angoi so ayeke ga gbanda. Kota Gbia NZAPA, so ayeke mbeni fango ye so alondo na zo? 20Tënë ti nyen laa, mbi David, mbi lingbi ti kiri ti tene na mo Kota Gbia NZAPA? Ti mo, mo hinga mbi, zo ti kua ti mo awe. 21Ndali ti tënë ti mo nga na lege ti ye so be ti mo aye, mo sara akota ye so kue ti fa ni na mbi. 22Kota Gbia NZAPA, mo yeke kota; mbeni nzapa ti lingbi na mo ayeke daa pepe. Na ya ti atënë so kue e ma, e ma a tene, mbeni nzapa tongana mo ayeke daa pepe, gi mo oko. 23Mbeni mara oko na ndö ti sese so alingbi na azo ti Israel, azo ti mo, ayeke daa? Mo gue, mo zi azo ti Israel na gbe ti ngbaa ti azo ti Ezipte ti sara si ala ga azo ti mo. Ambeni nzapa asara tongaso ndali ti azo ti ala awe? Mo sara si iri ti azo ti mo awu na lege ti akota ye nga na aye ti dongo be so mo sara na ya ti kodro ti mo, na dawa ti azo ti mo so mo zi ala na Ezipte; mo zi ala na maboko ti ambeni mara nga na maboko ti anzapa ti amara ni, ti sara si ala ga azo ti mo. 24Mo zia azo ti Israel titene ala duti mbirimbiri azo ti mo kpu na kpu; ti mo KOTA GBIA, mo ga Nzapa ti ala. 25Fadeso, KOTA GBIA Nzapa, tënë so mo tene lani na ndö ti mbi nga na ndö ti ahale ti mbi, ayeke nzoni mo sara si tënë ni aluti kpu na kpu. Sara ye alingbi na tënë ti mo. 26Ayeke nzoni azo agonda iri ti mo kpu na kpu, ala tene: ‘KOTA GBIA so ngangu ti lo ahon angangu kue, lo yeke Nzapa ti Israel.’ Sara si lengo-gbia ti ahale ti mbi, zo ti kua ti mo, akpengba. 27Biani, KOTA GBIA so ngangu ti lo ahon angangu kue, Nzapa ti Israel, mo wani, mo tene na mbi, mo tene, fade ahale ti mbi ayeke le-gbia na peko ti mbi. Nilaa be ti mbi awara ngangu ti sara sambela so. 28Fadeso Kota Gbia NZAPA, mo laa mo yeke Nzapa, tënë ti mo ayeke taa-tënë; mo tene tënë ti nzoni ye so na mbi awe! 29Fadeso, ayeke nzoni mo sara tufa na ndö ti ahale ti mbi, tongaso si ala ngba kpu na kpu na dawa ti mo. Biani, mo Kota Gbia NZAPA laa mo tene tënë si na lege ti tufa ti mo, ahale ti mbi awara tufa kpu na kpu!”
Currently Selected:
2 Samuel 7: MNF2010
Highlight
Share
Copy
Want to have your highlights saved across all your devices? Sign up or sign in
© La Société Biblique de Centrafrique 2010