1 Samuel 28
28
1Na ngoi ni so, azo ti Filistii abongbi aturugu ti ala titene ala gue, atiri bira na azo ti Israel. Akish atene na David: “Ayeke nzoni mo hinga, mo tene, fade mo na azo ti mo, e na ala kue, e yeke gue ti tiri bira.” 2David akiri tënë na Akish: “Fade mo wani, mo yeke baa ye so mbi, zo ti kua ti mo, mbi yeke sara.” Akish atene na David: “Nzoni! Fade mbi yeke mu mo ti ga zo ti batango mbi kpu na kpu.”
Saul ague ti baa zo ti nganga na kodro ti En-Dor
3 So Samuel akui, azo ti Israel kue atoto kuâ ti lo si ala lu lo na kodro ti lo, na Rama. Kozoni, Saul akanga lege titene azo ti kodro ti lo ague, ahunda yingo ti akuâ wala ti atoro.
4Azo ti Filistii abongbi aturugu ti ala si ala gue, asara bâbâ ti ala na gbata ti Shunem. Saul abongbi aturugu ti Israel kue si ala sara ti ala bâbâ ni na Gilboa. 5Tongana Saul abaa bâbâ ti azo ti Filistii, mbeto asara lo mingi si tere ti lo ado mingi. 6Lo hunda *KOTA GBIA, me KOTA GBIA akiri tënë na lo pepe, ataa na lege ti bango-li, wala na lege ti ye so a iri ni Urim wala na lege ti awayanga-Nzapa. 7Saul atene na aturugu ti lo ti kota kamba, atene: “Ala gi na mbi mbeni wali so ayeke hunda yingo ti akuâ titene mbi gue, mbi baa lo.” Aturugu ni atene na lo: “Mbeni wali so ayeke hunda yingo ti akuâ ayeke na kodro ti En-Dor.” 8Saul ayu mbeni bongo nde titene azo ahinga lo pepe si lo na azo use ague. Ala si na ndo ti wali ni na bi. Saul atene na wali ni: “Iri na mbi yingo ti mbeni kuâ, lo so fade mbi yeke fa iri ti lo na mo.” 9Wali ni atene na lo: “Mo wani, mo hinga kue ye so lani Saul asara: lo kanga lege na azo ti kodro titene ala gue, ahunda yingo ti akuâ wala ti atoro. Mo ye titene mbi ti na ya ti kuku si afâ mbi ngbanga ti nyen?” 10Saul adeba yanga ti lo na iri ti KOTA GBIA, atene: “KOTA GBIA ayeke na fini! Tongana mo sara ye ni, mbeni ye oko ti sarango mo ayeke daa pepe.” 11Wali ni atene: “Zo wa laa mo ye titene mbi iri yingo ti lo na mo?” Lo tene: “Iri na mbi yingo ti Samuel.”
12Wali ni abaa Samuel si lo dekongo; lo tene na Saul, lo tene: “Mo handa mbi ngbanga ti nyen? Mo Saul laa!” 13Gbia atene na lo: “Sara mbeto pepe. Mo baa nyen?” Wali ni atene na Saul: “Mbi baa mbeni toro so alondo na gbe ti sese si ayeke sigigi.” 14Saul atene na lo: “Toro ni ayeke tongana nyen?” Wali ni atene: “Mbakoro-koli laa; lo yu mbeni kota bongo.”
Saul ahinga atene so Samuel laa. Na pekoni, lo kuku, lo kpo li ti lo na sese. 15Samuel atene na Saul: “Mbi lango ti mbi awe! Mo so li ti mbi ti iri mbi ngbanga ti nyen?” Saul atene: “Be ti mbi afun kue. Azo ti Filistii ayeke tiri bira na mbi si Nzapa azia mbi awe. Lo ke ti kiri tënë na mbi na lege ti awayanga-Nzapa, wala na lege ti bango-li. Nilaa mbi iri mo titene mo fa na mbi ye so mbi lingbi ti sara.” 16Samuel atene: “Tongana KOTA GBIA azia mo awe si mo ga wato ti lo, mo yeke hunda mbi ngbanga ti nyen? 17Tënë ti KOTA GBIA so lo tene lani na mbi si mbi tene na mo so, ni laa lo sara ye alingbi na ni so. KOTA GBIA azi lengo-gbia na maboko ti mo awe, lo mu na mbeni zo nde; lo mu ni na David. 18KOTA GBIA asara ye so na mo laso, ngbanga ti so mo ma yanga ti lo pepe, mo fâ azo ti Amalek kue pepe. 19Fade KOTA GBIA ayeke zia mo nga na aturugu ti Israel kue na maboko ti azo ti Filistii. Kekereke, mo na amolenge ti mo ayeke ga ti wara mbi ge na ndo ti akuâ. KOTA GBIA ayeke zia nga aturugu ti Israel na maboko ti azo ti Filistii.”
20Gi so Saul ama tënë so Samuel atene so, mbeto asara lo mingi. Lo ti, lo lango na sese, ngangu ti lo awoko kue, ngbanga ti so na kota lâ kue, na bi kue, lo te ye oko pepe. 21Wali ni aga nduru na tere ti Saul si lo baa so mbeto ahon ndö ti Saul mingi. Lo tene na Saul: “Mbi zo ti kua ti mo, mbi ma yanga ti mo awe. Mbi ka yingo si mbi sara ye alingbi na tënë so mo tene na mbi. 22Fadeso, ayeke nzoni mo ma nga tënë ti mbi si. Mo zia mbi ga na mo kete kobe mo te si mo wara ngangu ti tambula na lege.” 23Saul ake atene: “Mbi yeke te ye pepe.” Me azo ti kua ti lo na wali ni aso li ti lo si lo ma tënë ti ala. Lo londo na sese si lo duti na ndö ti gbogbo. 24Wali ni ayeke na mbeni molenge ti bagara ti mafuta na da ti lo. Hio tongaso, lo fâ nyama ni, lo to ni. Lo mu farini, lo tuku ngu daa, lo zia mama ti mapa daa pepe si lo sara na mapa. 25Lo mu kobe ni na Saul na azo ti kua ti lo si ala te. Na pekoni, ala londo si ala gue gi na bi ni so.
Currently Selected:
1 Samuel 28: MNF2010
Highlight
Share
Copy
Want to have your highlights saved across all your devices? Sign up or sign in
© La Société Biblique de Centrafrique 2010