1 Pierre Kete tënë na ndö ti Kozo Mbeti so Pierre atokua ni
Kete tënë na ndö ti Kozo Mbeti so Pierre atokua ni
Pierre atokua kozo mbeti ti lo na azo ti Christ so akangbi na ando nde nde si ambeni ague, aduti na ya ti akodro-komanda oku ti sese ti Rome. Akodro-komanda ni ayeke na Banga nga na To ti sese ti Azii, so a iri ni laso Turkii. Ala duti na ya ti akodro ni tongana awande ndali ti so ala yeke ti ala azo ti Christ (1.1; 2.11). Azo ake ala si abaa ala tongana ambumbuse zo; azo ayeke bi tënë na li ti ala senge senge si ayeke sara mbana na ala.
Pierre atokua mbeti so na ala ti sara si mabe ti ala akpengba si ala ngba lakue ti zia be ti ala na ndö ti ye so ala yeke ku. Lo tokua nga mbeti ni ti mu ngangu na be ti ala si ala ngba ti duti tongana azo so Nzapa asoro ala biani.
Kozo mbeti ti Pierre ayeke ndali ti azo ti Christ so alege ti vorongo Nzapa ti ala kozoni ayeke nde nde. Me fadeso ala ga azo so a kiri adu ala mbeni, ala yeke kiri ti sara ye tongana ti akotara ti ala pepe, wala tongana ti azo so ayeke nduru na ala (1.13-24). Ala ga azo ti mara ti Nzapa awe (2.4-10). Tongaso, na ya ti akpale nde nde, ala lingbi ti kanga be ti ala, ngbanga ti so mbeni ye ayeke daa so ala zia be ti ala ti ku; ye so laa asara si ala yeke na fini (1.3, 13, 21; 3.15).
Nzapa azingo Jésus Christ na kuâ: ye so azo ti Christ aluti na ndö ni si ala zia be ti ala ti ku laa. Ye so azo ti Christ azia be ti ala ti ku asara si ala yeke yeda titene azo azonga ala si asara mbana na ala; ala yeke yeda na aye so kue tongana ti so Jésus asara. Jésus abaa ando pasi, azo azonga lo si ala ke lo. Lo kiri sioni ndali ti sioni pepe, me lo zia be ti lo na Nzapa (4.12-19). Kozo mbeti ti Pierre atene: fini ti Jésus Christ na kuâ ti lo ayeke mbeni tapande ndali ti zo ti Christ.
Tapande ni afa lege so zo ti Christ alingbi ti duti na popo ti azo so ayeke azo ti Christ pepe, afa nga lege so lo lingbi ti duti na ya ti bongbi ti azo ti Christ. Mbeti ni amu wango kozoni na azo so ayeke na kete ndo (2.18 – 3.6). Azo ni ayeke asenge zo ti kua so amakonzi ti ala ayeke azo ti Christ pepe nga na awali so akoli ti ala ayeke azo ti Christ pepe. Sarango ye ti ala alingbi ti sara si ambeni zo ahinga tënë ti mabe ti azo ti Christ. Na ya ti bongbi ti ala, yengo tere na kpengo mbeto ti amba ti ala ayeke kota ye so agbu be ti azo ni mingi, ataa azo ti li ni, wala amaseka wala azo ti ya ti bongbi ni kue (5.1-7; 1.22 - 2.3). Mara ti dutingo tongaso laa ayeke fa na azo so ayeke na ya ti bongbi ni pepe biani atene, tënë oko ti bi na li ti azo ti Christ ayeke daa pepe.
Currently Selected:
1 Pierre Kete tënë na ndö ti Kozo Mbeti so Pierre atokua ni: MNF2010
Highlight
Share
Copy
Want to have your highlights saved across all your devices? Sign up or sign in
© La Société Biblique de Centrafrique 2010