1 Korente Kete tënë na ndö ti Kozo Mbeti so Paul atokua na Eglize ti Korente
Kete tënë na ndö ti Kozo Mbeti so Paul atokua na Eglize ti Korente
Na ngoi ti use tambula ti Paul laa, lo sara si *Eglize abaa gigi na gbata ti Korente. Gbata ti Korente ayeke mbeni kota gbata na popo ti agbata ti kodro ti Grese; gbata ni ayeke na amosoro mingi ndali ti so, nduru na gbata ni, ndo ti lutingo ti amangboko ayeke daa use. Azo ti sarango anzene-nzene kua na ya ti mangboko, angbaa na azo ti mawa ayeke gbani gbani na ya ti gbata ni. Azo ayeke sara aye ti kirikiri mingi. Na ngoi ni so, azo ti Korente ayeke mu peko ti azo ti ndara nde nde, ala yeke mu nga peko ti azo na lege ti vorongo anzapa nde nde. Mingi ti azo ti Eglize ni ayeke azo so atambula lani na peko ti anzapa nde kozoni si ala ma na be. Paul ama sango ti Eglize ni (1.11; 7.11). Tënë ti vorongo anzapa nde na tënë ti lege ti dutingo ti azo na ya ti kodro asara si li ti azo ti Christ aga kirikiri. Azo ti Eglize ti Korente asu mbeti na Paul si ala hunda lo na ambeni tënë. Na ya ti mbeti so, Paul akiri tënë na ala na ndö ti ahundango ndo ti ala ni.
Akota ye so ayeke na ya ti mbeti so:
Ti londo na kota gere 1 asi na 4, Paul atene tënë ti azo ti Christ so ayeke na Korente, lo tene nga tënë ti azo so afa Nzoni Tënë na azo ti Christ ni. Papa alondo si kangbi asi na ya ti Eglize ni. Zo oko oko amu mbage ti zo so afa ye na lo, kengo tere alondo (1.10-13). Andaa zo ti fango Nzoni Tënë laa ayeke kota ye pepe, me kota ye ni ayeke Christ so Nzapa atokua lo si azo afâ lo na ndö ti keke ti kroa; tënë so ahon ndara ti azo (1.18–2.15). Awatokua ti Jésus Christ, ala kue ayeke azo ti kua ti Nzapa, ala yeke sara gi na lo oko (kota gere 3).
Ti londo na kota gere 5 asi na 11.16, Paul akiri tënë na ndö ti ye so azo ti Christ alingbi ti sara, lo fa nga lege so zo alingbi ti sigigi na gbe ti ngbaa (kota gere 9). Tongana zo aga zo ti Christ awe si lo ngba ti sara sioni, alingbi Eglize abata mara ti zo tongaso pepe (kota gere 5 – 6). Paul akiri nga tënë na azo ti Eglize ti Korente na ndö ti tënë ti mungo tere ti koli na wali (kota gere 7), lo kiri nga tënë na ala na ndö ti ye so ala lingbi ti sara tongana ala yeke duti na popo ti azo so amu peko ti anzapa nde (kota gere 8 – 10). Na ya ti aye so kue, Paul ahunda na azo ti Christ ti gi nzoni ti amba ti ala, ti ne amba ti ala.
Ti londo na 11.17 ti hunzi na kota gere 14, Paul atene tënë na ndö ti lege ti dutingo ti azo ti Christ na ya ti bongbi ti Nzapa. Lo fa aye so asara si kangbi ayeke londo, lo fa nda ti ye so ayeke sara si azo ti Eglize angba ti duti na beoko; zo oko oko ti ya ti bongbi ni ayeke kota na le ti mba ti lo. Biani, azo ti Christ ayeke tongana ngbongboro tere ti zo: mbage ti tere oko oko ayeke sara nzoni na ngbongboro tere ni kue. Paul afa nga tënë ti amatabisi nde nde so Yingo ti Nzapa ayeke mu na azo, me ndoye laa ayeke kota ye ahon atanga ni kue (kota gere 13).
Kota gere 15 adabe ti azo ti Korente so Nzapa azingo Jésus na kuâ. Mbeni lâ, fade akuâ ayeke zingo kue. Tongana azo ti Christ ama na be na tënë so pepe, fini ti ala na mabe ti ala ayeke gi senge senge. Ti hunzi na mbeti ti lo, Paul amu asango nde nde si lo bara azo gbani gbani (kota gere 16).
Azo ti Christ so ayeke na Korente ayeke azo so ade ti lingbi kue pepe. Ataa so kue, Paul amu singila na Nzapa ndali ti ala (1.4-9). Akpale na ambeni ye so ayeke na legeni pepe, mo yeke wara ni na ya ti a-Eglize kue. Ataa so kue, Nzapa angba ti sara nzoni be na a-Eglize ni, lo ngba ti iri azo ti Christ titene ala sara ye na legeni.
© La Société Biblique de Centrafrique 2010