Awit 5
5
Lalaki
1Nasa hardin ako ngayon,
aking irog na magiging kabiyak ko.
Nanguha ako ng mira
at mga pabango.
Kinain ko ang aking pulot
at ininom ang aking alak at gatas.
Mga Babae ng Jerusalem
Kayong mga nagmamahalan,
kumain kayo at uminom.
Babae
2Habang akoʼy natutulog,
nanaginip ako.
Narinig kong kumakatok
ang mahal ko.
Ang sabi niya,
“Papasukin mo ako, irog ko.
Basang-basa na ng hamog
ang ulo ko.”
3Hinubad ko na ang aking damit,
isusuot ko pa ba itong muli?
Hinugasan ko na ang aking mga paa,
dudumihan ko pa ba itong muli?
4Nang ipasok ng aking mahal
ang kanyang kamay sa tarangkahan,
nanabik sa kanya ang aking puso.
5Akoʼy bumangon
upang ang aking sintaʼy papasukin.
Basang-basa ng pabango
ang mga kamay ko,
tumutulo ang mira sa daliri ko
sa tarangkahan ng pinto.
6Binuksan ko ang pinto para sa aking mahal,
ngunit wala na siya.
Hinanap ko siya,
ngunit hindi ko siya makita.
Tinawag ko siya,
ngunit walang sumagot.
7Nakita ako ng mga guwardiya
na naglilibot sa lungsod.
Pinalo nila ako,
at akoʼy nasugatan.
Kinuha#5:7 kinuha: O pinunit. pa nila ang aking damit.
8Kayong mga babae ng Jerusalem,
mangako kayo sa akin!
Kapag nakita ninyo ang aking mahal,
sabihin ninyo sa kanyang
nanghihina ako
dahil sa pag-ibig.
Mga Babae ng Jerusalem
9O babaeng pinakamaganda,
ano baʼng mayroon sa iyong minamahal
na wala sa iba,
at kami ay iyong pinasusumpa pa?
Siya baʼy talagang nakakahigit sa iba?
Babae
10Ang aking mahal ay maningning
at ang kutis niyaʼy mamula-mula.
Sa sampung libong lalaki
ay nakahihigit siya.
11Ang ulo niyaʼy parang pinakapurong ginto.
Buhok niyaʼy kulot at kasing-itim ng uwak.
12Mga mata niyaʼy kumikinang
tulad ng kalapati sa tabi ng batis,
parang itong hinugasan ng gatas
at nakakabit na parang hiyas.
13Ang mga pisngi niyaʼy kasimbango
ng mga harding punong-puno
ng mga halamang ginagawang pabango.
Ang mga labi niyaʼy parang mga liryo
na tumutulo ng mira.
14Mga bisig niyaʼy tila
mahahabang bareta ng ginto
na napapalamutian ng mamahaling bato.
Katawaʼy tila pangil ng elepante,
makinang at napapalamutian
ng mga batong safiro.
15Mga paa niyaʼy tulad
ng mga haliging marmol
na nakatayo sa pundasyong ginto.
Napakaganda niyang pagmasdan,
tulad ng mga puno ng sedro sa Lebanon.
16Kay tamis halikan
ang kanyang bibig.
Tunay ngang siyaʼy kaakit-akit.
O mga babae ng Jerusalem,
siya ang aking mahal,
ang aking iniibig.
Currently Selected:
Awit 5: ASD
Highlight
Share
Compare
Copy
Want to have your highlights saved across all your devices? Sign up or sign in
Biblica® Open Ang Salita ng Diyos™
Karapatang-sipi © 2009, 2011, 2014, 2025 ng Biblica, Inc.
Biblica® Open Tagalog Contemporary Bible™
Copyright © 2009, 2011, 2014, 2025 by Biblica, Inc.
Ang “Biblica” ay ang tatak-pangkalakal na nakarehistro sa Biblica, Inc. sa United States Patent at Trademark Office.
Ginamit nang may pahintulot.
“Biblica” is a trademark registered in the United States Patent and Trademark Office by Biblica, Inc.
Used with permission.
