Salmo 78

Isang maskil ni Asaf.

1Mga kababayan,#78:1 Mga kababayan: O Mga mamamayan ko. ang mga turo koʼy

inyong pakinggan.

Sundin ninyo ang aking mga salita.

2Tuturuan ko kayo sa pamamagitan ng paghahalintulad.#78:2 paghahalintulad: O mga talinghaga, o kawikaan.

Sasabihin ko sa inyo ang mga lihim

na katotohanan ng nakaraan.

3Napakinggan na natin ito at nalaman.

Sinabi ito sa atin ng ating mga ninuno.

4Hindi natin ito ililihim sa ating mga anak;

sasabihin natin sa mga susunod na henerasyon

ang kapangyarihan ng Panginoon

at ang mga kahanga-hanga niyang gawa.

5Ibinigay niya ang kanyang mga kautusan kay Jacob;

ginawa niya itong batas ng Israel.

Iniutos niya sa ating mga ninuno

na ituro ito sa kanilang mga anak,

6upang itoʼy malaman din

ng susunod na henerasyon

at ituturo rin nila sa kanilang mga anak.

7Sa ganitong paraan, magtitiwala sila sa Diyos

at hindi nila makakalimutan

ang kanyang mga ginawa,

at susundin nila ang kanyang mga utos.

8Hindi sila magiging katulad

ng kanilang mga ninuno

na matitigas ang ulo, suwail,

hindi lubos ang pagtitiwala sa Diyos,

at hindi tapat sa kanya.

9Bagamaʼt may mga pana ang mga taga-Efraim,

umaatras naman sila sa oras ng labanan.

10Hindi nila pinanindigan ang kasunduan nila sa Diyos,

at tumanggi silang mamuhay

ayon sa kanyang mga utos.

11Kinalimutan nila ang mga kahanga-hanga

niyang ginawa

na ipinakita niya sa kanila.

12Nasaksihan mismo ng ating mga ninuno

ang mga himala na ginawa ng Diyos

doon sa Zoan sa lupain ng Ehipto.

13Hinawi niya ang dagat

at pinadaan sila roon;

ginawa niyang parang magkabilang pader ang tubig.

14Pinatnubayan niya sila

sa pamamagitan ng ulap tuwing araw

at sa pamamagitan ng liwanag ng apoy naman

tuwing gabi.

15Biniyak niya ang mga bato sa ilang

at dumaloy ang tubig

at binigyan sila ng maraming inumin

mula sa kailaliman ng lupa.

16Pinalabas niya ang maraming

tubig mula sa bato

at ang tubig ay umagos gaya ng ilog.

17Ngunit patuloy pa rin silang nagkasala sa kanya.

Naghimagsik sila sa Kataas-taasang Diyos doon sa ilang.

18Sinadya nilang subukin ang Diyos

sa pamamagitan ng paghingi nila

ng mga pagkaing gusto nila.

19Kinutya nila ang Diyos

nang sabihin nilang,

“Makakapaghanda ba ang Diyos

ng pagkain dito sa ilang?

20Oo ngaʼt umagos ang tubig

nang hampasin niya ang bato,

ngunit makapagbibigay din ba siya

ng tinapay at karne sa atin?”

21Narinig ito ng Panginoon at galit na galit siya.

Nag-apoy sa galit ang Panginoon laban sa lahi ni Jacob,

22dahil hindi sila sumampalataya sa kanya,

o nagtiwala sa pagliligtas niya.

23Ganoon pa man, iniutos niyang bumukas ang langit,

24at pinaulanan sila ng pagkaing manna.

Ibinigay ito sa kanila upang kainin.

25Kinain nila ang pagkain ng mga anghel,

at sobra pa sa kaya nilang kainin

ang ibinigay ng Diyos sa kanila.

26Pinaihip niya ang hangin

mula sa silangan at sa timog

sa pamamagitan ng kanyang kapangyarihan.

27Pinaulanan din sila ng napakaraming ibon,

na kasindami ng buhangin sa tabing-dagat.

28Pinadapo niya ang mga ito sa palibot

ng kanilang mga tolda sa kampo.

29Kaya kumain sila at nabusog,

dahil ibinigay sa kanila ng Diyos

ang gusto nila.

30Ngunit habang kumakain sila at nagpapakabusog,

31nagalit ang Diyos sa kanila.

Pinatay niya ang makikisig

na mga kabataan ng Israel.

32Sa kabila ng lahat ng ginawa ng Diyos sa kanila,

nagpatuloy pa rin sila sa pagkakasala.

Kahit na gumawa siya ng mga himala,

hindi pa rin sila naniwala.

33Kaya agad niyang winakasan ang kanilang buhay

sa pamamagitan ng biglaang

pagdating ng kapahamakan.

34Kapag pinarurusahan sila ng Diyos

at ang iba sa kanilaʼy namamatay,

nagbabalik-loob sila at agad lumalapit sa kanya.

35At naalala nila na ang Diyos

ang kanilang Batong kanlungan,

ang Kataas-taasang Diyos

ang kanilang Tagapagligtas.

36Ang papuri nilaʼy sa bibig lamang nagmumula

pawang kasinungalingan ang kanilang mga salita.

37Hindi sila naging tapat sa kanya

at hindi nila pinahalagahan ang kasunduan niya sa kanila.

38Ngunit dahil maawain ang Diyos,

pinatawad ang mga kasalanan nila

at hindi sila nilipol.

Maraming beses niyang pinigil ang kanyang galit

kahit napakatindi na ng kanyang poot.

39Naisip niyang mga tao lamang sila,

parang hangin na dumadaan

at biglang nawawala.

40Madalas silang maghimagsik

sa Diyos doon sa ilang

at pinalungkot nila siya.

41Paulit-ulit nilang sinubok ang Diyos;

ginalit nila ang Banal na Diyos ng Israel.

42Hindi nila inalala

ang kanyang kapangyarihan

sa araw na iniligtas niya sila

mula sa kanilang mga kaaway,

43noong gumawa siya ng mga himala at tanda

roon sa Zoan, sa lupain ng Ehipto.

44Ginawa niyang dugo ang mga ilog nila,

kaya wala silang mainom sa mga tubig nila.

45Nagpadala rin siya ng napakaraming langaw

na nagpahirap sa kanila

at mga palaka na puminsala sa lupain nila.

46Ipinakain niya sa mga balang

ang kanilang mga pananim at mga ani.

47Sinira niya ang kanilang mga tanim na ubas

at mga punong sikomoro

sa pamamagitan ng pagpapaulan ng yelo.

48Pinagpapatay niya ang kanilang mga hayop

sa pamamagitan ng kidlat

at pag-ulan ng malalaking yelo.

49Ipinaranas niya sa kanila

ang matinding poot at galit niya,

at nagpadala siya ng mga anghel

na nagdulot ng sakuna.

50Hindi pinigilan ng Diyos ang kanyang poot.

Hindi niya sila iniligtas sa kamatayan.

Sa halip ay pinatay sila

sa pamamagitan ng mga salot.

51Pinatay niyang lahat

ang mga panganay na lalaki sa Ehipto;

Oo, ang bawat panganay sa lahi ni Ham.

52Ngunit parang mga tupa na inilabas niya sa Ehipto

ang kanyang mamamayan

tulad sa kawan ng mga tupa,

silaʼy pinatnubayan niya sa ilang.

53Pinatnubayan niya sila,

kaya hindi sila natakot.

Ngunit ang mga kaaway nila

ay nalunod sa dagat.

54Dinala niya sila sa lupaing kanyang pinili,

dito sa bulubunduking lugar na kinuha niya

sa pamamagitan ng kanyang kapangyarihan.

55Itinaboy niya ang lahat

ng naninirahan doon,

at hinati-hati ang lupain

sa mga lahi ng Israel

upang maging pag-aari nila

at maging tirahan.

56Ngunit sinubok pa rin nila ang Kataas-taasang Diyos,

naghimagsik sila at hindi sumunod

sa kanyang mga utos.

57Tumalikod sila sa Diyos

katulad ng kanilang mga ninuno.

Tulad sila ng isang sirang pana

na hindi mapagkakatiwalaan.

58Ginalit nila ang Diyos

dahil sa kanilang mga sambahan

sa matataas na lugar

Pinanibugho nila ang Diyos dahil sa kanilang

mga diyos-diyosan.

59Alam#78:59 Alam: Sa literal, Narinig. ng Diyos ang ginawa ng mga Israelita,

kaya nagalit siya at itinakwil sila nang lubusan.

60Iniwanan niya ang kanyang tolda sa Silo,

kung saan siya nananahan dito sa mundo.

61Hinayaan niyang agawin ng mga kaaway

ang Kahon ng Kasunduan

na simbolo ng kanyang kapangyarihan

at kadakilaan.

62Nagalit siya sa kanyang mga mamamayan

kaya ipinapatay niya sila

sa kanilang mga kaaway.

63Sinunog ang kanilang mga binata,

kaya walang mapangasawa

ang kanilang mga dalaga.

64Namatay sa labanan ang kanilang mga pari,

at ang mga naiwan nilang asawa

ay hindi makapagluksa.#78:64 Basahin sa 1 Sam. 4:17‑22.

65Pagkatapos, parang nagising ang Panginoon

mula sa kanyang pagkakahimlay;

at para siyang isang malakas na tao

na pinatapang ng alak.

66Itinaboy niya at pinaatras

ang kanyang mga kaaway;

inilagay niya sila sa walang hanggang kahihiyan.

67Itinakwil niya ang lahi ni Jose,

hindi rin niya pinili ang lahi ni Efraim.#78:67 hindi … Efraim: Maaaring ang ibig sabihin nito ay hindi niya pinili ang lugar nila upang maging sentro ng pagsamba at kung saan ang pinili niyang hari ay maghahari.

68Sa halip ay pinili niya ang lahi ni Juda

at ang bundok ng Zion na kanyang minamahal.

69Doon niya ipinatayo ang kanyang Templo,

katulad ng langit at lupa

na kanyang itinatag, magpakailanman.

70-71Pinili ng Diyos si David

na maging lingkod niya.

Kinuha siya mula sa pagpapastol ng tupa

at ginawang hari ng Israel,

ang mga mamamayang kanyang hinirang.

72Katulad ng isang mabuting pastol,

inalagaan niya ang mga Israelita

nang may katapatan

at mahusay silang pinamunuan.

Currently Selected:

Salmo 78: ASD

Highlight

Copy

Compare

Want to have your highlights saved across all your devices? Sign up or sign in

Biblica® Open Ang Salita ng Diyos™

‌‌

Biblica® Open Tagalog Contemporary Bible™

‌‌

Ang “Biblica” ay ang tatak-pangkalakal na nakarehistro sa Biblica, Inc. sa United States Patent at Trademark Office.

Ginamit nang may pahintulot.

‌‌

“Biblica” is a trademark registered in the United States Patent and Trademark Office by Biblica, Inc.

Used with permission.

Learn More About Ang Salita ng Diyos

Mga Awit 78

Awit Tungkol sa Kasaysayan ng Israel

Isang Maskil#MASKIL: Tingnan ang Awit 32. ni Asaf.

1Kayo ngayon ay makinig sa turo ko, mga anak,

inyong dinggi't ulinigin, salita kong binibigkas.

2Itong#Mt. 13:35. aking sasabihin ay bagay na talinhaga,

nangyari pa noong una, kaya ito'y mahiwaga.

3Ito'y aming narinig na, kaya naman aming alam,

nagbuhat sa aming nuno na sa ami'y isinaysay.

4Sa sarili naming anak ito'y hindi ililihim,

ito'y aming isasaysay sa sunod na lahi namin;

mga gawang tinutukoy ay lubhang kahanga-hanga

na si Yahweh ang gumanap, mga gawa niyang dakila.

5Mayro'n siyang patotoo na kay Jacob itinatag,

mayro'n siyang kautusang sa Israel iniatas;

ang utos sa ating nuno, dapat nilang ipatupad,

ituturong lagi ito, sa kanilang mga anak.

6Sa lahat ng lahi nila ito'y dapat na iaral,

at ang angkang susunod pa ay marapat na turuan.

7Sa ganito, masusunod nilang lagi yaong utos,

ang matatag na pag-asa'y ilalagak nila sa Diyos,

at ang dakila niyang gawa'y hindi nila malilimot.

8Sa kanilang mga nuno, hindi dapat na pumaris,

na matigas ang damdaming sa Diyos ay naghimagsik;

isang lahing di marunong magtiwala at magtiis,

ang pag-asa ay marupok at kulang ang pananalig.

9Tulad ng Efraimita, mga pana ang sandata,

sa panahon ng labana'y nagsitakas pa rin sila.

10Ang tipan sa Panginoo'y hindi nila sinusunod,

hindi sila lumalakad nang ayon sa mga utos.

11Nakalimutan na nila ang lahat ng kabutihan,

mga gawa ng ating Diyos na kanilang hinangaan.

12Ang#Exo. 7:8–12:32. #Kar. 16:1–19:22. lahat ng gawang ito, noong una'y nasaksihan,

ang nangyari sa Egipto, sa lupain nitong Zoan,

13hinawi#Exo. 14:21-22. niya yaong dagat, doon sila pinaraan,

ang tubig sa magkabila'y parang pader kung pagmasdan.

14Kapag#Exo. 13:21-22. araw, sa paglakad naging gabay nila'y ulap,

at kung gabi naman, tanglaw ay apoy na maliwanag.

15May#Exo. 17:1-7; Bil. 20:2-13. tubig na iniinom kahit sila nasa ilang,

sa batuha'y umaagos na likas sa kalaliman.

16Mula roon sa batuhan, ang tubig ay umaagos,

daloy nito kung pagmasdan, katulad ay isang ilog.

17Ngunit sila'y patuloy rin sa kanilang kasalanan,

sinusuway nila ang Diyos habang sila'y nasa ilang.

18Sadya#Exo. 16:2-15; Bil. 11:4-23, 31-35. nilang sinusubok, ginagalit nila ang Diyos;

ang hiningi ay pagkaing gustung-gusto nilang lubos.

19Kinalaban nila ang Diyos nang sabihin ang ganito:

“Sa gitna ba nitong ilang mabubusog niya tayo?

20Nang hampasin yaong bato, oo't tubig ay bumukal,

dumaloy ang mga batis, tubig doon ay umapaw;

ngunit ito yaong tanong, tayo kaya'y mabibigyan

ng tinapay na masarap at ng karneng kailangan?”

21Nang marinig ang ganito, si Yahweh nama'y nag-init,

sa hinirang niyang bansa'y nag-apoy ang kanyang galit.

22Pagkat sila ay ayaw nang sa Diyos ay magtiwala,

sa pangakong pagliligtas ay ayaw nang maniwala.

23Gayon pa man, itong Diyos nag-utos sa kalangitan,

at ang mga pinto nito'y agad-agad na nabuksan.

24Bunga#Kar. 16:20-29; Jn. 6:31. nito, ang pagkai'y bumuhos na parang ulan,

ang pagkain nilang manna, sa kanila'y ibinigay.

25Ang kaloob na pagkai'y pagkain ng mga anghel,

hindi sila nagkukulang, masagana kung dumating.

26Yaong ihip ng amihan, ay siya rin ang nag-utos,

sa taglay na lakas niya'y dumating ang hanging timog.

27Ang pagkain nilang karne'y masaganang dumarating,

makapal na mga ibon na sindami ng buhangin.

28Sa gitna ng kampo nila ay doon na bumabagsak,

sa palibot ng tolda ay doon nila kinakalap.

29Kinakain nila ito, nasisiyahan silang lahat,

binibigyan sila ng Diyos ng pagkaing hinahangad.

30Ngunit habang kinakain ang pagkaing idinulot,

at hindi pa tumitigil pagkat di pa nabubusog,

31pagkagalit sa nangyari, ipinakita ng Diyos,

sa kanilang kabataan, parusa niya'y ibinuhos;

ang mga malalakas at mga magagaling, buhay nila'y tinapos.

32Sa ganitong gawa ng Diyos, sunod-sunod na himala,

ganti nila ay paglabag, hindi pa rin naniwala.

33Kaya't yaong pasya ng Diyos, ang araw ay wakasan na,

bigla-biglang paratingin sa kanila ang parusa.

34Subalit noong sila ay lilipulin na ng Diyos,

nagsisi ang karamiha't sa kanya'y nagbalik-loob.

35Noon nila nagunitang ang sanggalang nila'y ang Diyos,

ang Kataas-taasang Diyos ay kanilang Manunubos.

36Kaya't siya ay pinuri, ng papuring hindi tapat,

pagkat yao'y pakunwari't balatkayong matatawag.

37Sa#Gw. 8:21. kanilang mga puso, naghahari'y kataksilan,

hindi sila naging tapat sa ginawa niyang tipan.

38Gayon pa man, palibhasa'y Diyos siyang mahabagin,

ang masamang gawa nila'y kanyang pinatawad pa rin;

dahilan sa pag-ibig niya'y hindi sila wawasakin,

kung siya ma'y nagagalit, ito'y kanyang pinipigil.

39Nagunita pa ni Yahweh, sila'y mga tao lamang,

hanging di na nagbabalik matapos na makaraan.

40Madalas na nag-aalsa noong sila'y nasa ilang;

ang ganitong gawa nila'y labis niyang dinaramdam.

41Lagi siyang sinusubok, hindi sila tumitigil,

ginagalit nilang lagi itong Banal na Diyos ng Israel.

42Ang kapangyarihan niya'y ayaw nilang gunitain,

gayong sila'y iniligtas sa kaaway nilang taksil.

43Ang ginawa nitong Diyos na lubos na hinangaan,

ay nangyari sa Egipto sa lupain nitong Zoan.

44Yaong#Exo. 7:17-21. mga ilog doo'y naging dugong umaagos,

kaya walang makainom sa batis at mga ilog.

45Makapal#Exo. 8:20-24; Exo. 8:1-6. na mga langaw at palaka ang dumating,

nataranta silang lahat, di malaman ang gagawin.

46Dumating#Exo. 10:12-15. ang maninira sa taniman ng halaman,

mga tanim ay kinain ng balang na di mabilang.

47Pati#Exo. 9:22-25. tanim na ubasa'y winasak ng ulang yelo,

anupa't sa kalamiga'y namatay ang sikamoro.

48Nang ulanin na ng yelo, mga baka ay namatay,

sa talim ng mga kidlat namatay ang mga kawan.

49Sa ganito ay nadama ang matinding poot ng Diyos,

kaya sila ay winasak sa sama ng kanyang loob,

mga anghel ang gumanap ng parusang sunod-sunod.

50Ang matinding galit ng Diyos hindi niya pinigilan,

yaong naging wakas nila'y humantong sa kamatayan;

dahilan sa isang salot, buhay nila ay pumanaw.

51Yaong#Exo. 12:29. lahat na panganay sa Egipto ay pinatay,

ang panganay na lalaki sa Egiptong lahi ni Ham.

52Tinipon#Exo. 13:17-22. ang kanyang hirang na animo'y mga tupa,

inakay sa lupaing ilang sa kanyang pangunguna.

53Inakay#Exo. 14:26-28. nga at naligtas, kaya naman di natakot,

samantalang ang kanilang kaaway ay nangalunod.

54Inihatid#Exo. 15:17; Jos. 3:14-17. sila ng Diyos sa lupain niyang banal,

sa bundok na mismong siya ang kumuha sa kaaway.

55Itinaboy#Jos. 11:16-23. niyang lahat ang naroong namamayan,

pinaghati-hati niya ang lupaing naiwanan;

sa kanilang mga tolda ang Israel ay nanahan.

56Ngunit#Huk. 2:11-15. sila'y naghimagsik sa Kataas-taasang Diyos,

hindi nila iginalang ang kanyang mga utos;

57katulad ng nuno nila sila'y kusang tumalikod,

nagtaksil na wari'y panang lumipad nang walang taros.

58Nanibugho itong Diyos, sa kanila ay nagalit,

nang makita ang dambana ng larawang iniukit.

59Sumama ang loob niya noong ito ay mamasid,

itinakwil ang Israel sa tindi ng kanyang galit.

60Kaya't#Jos. 18:1; Jer. 7:12-14; 26:6. kanyang iniwanan ang tahanang nasa Shilo,

yaong toldang tirahan niya sa gitna ng mga tao.

61Sagisag#1 Sam. 4:4-22. ng kanyang lakas, ang Kaban ng kanyang Tipan,

binayaan na mahulog at makuha ng kaaway.

62Nagalit sa kanyang baya't ibinigay sa kaaway,

kaya naman ang marami sa kanila ay namatay.

63Kanilang mga binata ay nasawi sa labanan,

dalaga mang magaganda'y wala nang mapangasawa.

64Pati mga pari nila, sa patalim ay napuksa,

ang kanilang mga balo'y ni ayaw nang magluksa.

65Parang tulog na gumising, si Yahweh ay nagbangon, ang katawan ay masigla, tumayo ang Panginoon;

parang taong nagpainit sa alak na iniinom.

66Pinaurong ang kaaway, lahat niyang katunggali,

napahiya silang lahat, pawang galit na umuwi.

67Maging ang lahi ni Jose, sadya niyang itinakwil,

at di niya pinagbigyan pati lahi ni Efraim.

68Sa halip, pinili niya'y ang sambahayan ni Juda,

at ang bundok naman ng Zion ang tirahang minahal niya.

69Doon niya itinayo yaong banal na santuwaryo,

katulad ng nasa langit na tahanan niyang dako;

lubos niyang pinatatag na tulad ng mundong ito.

70Ang#1 Sam. 16:11-12; 2 Sam. 7:8; 1 Cro. 17:7. kinuhang pangunahi'y sa mahirap pa hinugot,

isang pastol ang napili, si David na kanyang lingkod.

71Ang alagang dati nito ay kawan ng mga hayop,

nang maghari sa Israel, nanguna sa bayan ng Diyos.

72Matuwid na namahala, namalakad na mahusay,

lubos silang kinalinga sa tulong niya at patnubay.

Currently Selected:

Highlight

Copy

Compare

Want to have your highlights saved across all your devices? Sign up or sign in

Learn More About Magandang Balita Bible (Revised)