Matayo 5
5
Okwegeresa okwali ku lusozi
1Agho Yesu bwe yabona abantu kamaala batyo, yaaniina ku lusozi, era bwe yamala okutyama, Abeegeresebwa be baaseeta gh'ali. 2Yaabeegeresa ng'akoba ati:
Enkabi
(Luk 6:20-23)
3“Ba nkabi abaavu mu mwoyo, kuba Obwakyabazinga obw'omu igulu bwaibwe.
4Ba nkabi abagegenga, kuba balyesiima.#Isa 61:2
5Ba nkabi abawombeefu,
kuba baligheebwa ensi Katonda ye yasuubiza.#Zab 37:11
6Ba nkabi abalumwa endhala n'endiwo ey'okukola ebituufu,
kuba baliigusibwa.#Isa 55:1-2
7Ba nkabi ab'ekisa,
kuba balisaasirwa.
8Ba nkabi ab'omwoyo omulungi,
kuba balibona Katonda.#Zab 24:3-4
9Ba nkabi abakolerera emiraala,
kuba balyetebwa baana ba Katonda.
10Ba nkabi abakirigibwa olw'obutuufu,
kuba Obwakyabazinga obw'omu igulu bwaibwe.#1 Pet 3:14
11“Muli ba nkabi bwe banaabavumanga, ni babakiriga, era ni baboogeraku buli kibi kyonakyona olw'okuba nze, nga basubagha.#1 Pet 4:14 12Musangaale era musagambe, kuba empeera yaimwe eri mu igulu nnene. Kuba batyo bwe baakiriga abalanzi abaabasooka.#2 Byom 36:16; Bik 7:52
Omuunhu era ekimulika
(Mar 9:50; Luk 14:34-35)
13“Niimwe omuunhu ogw'ensi. Aye omuunhu bwe guwaamu ensa gwiramu gutya ensa! Kuba guba tigukaali na mugaso okutoolaku okusuulibwa ku luya abantu baagutyankirira.
14“Niimwe ekimulika eky'ensi. Ekibuga ekizimbwa ku lusozi tikighanga kugisibwa.#Yoa 8:12; 9:5 15Era tibakunaania itaala ni balifundikira mu kiibo, aye balighanika ku kikondo lyamulisa boonaboona ababa mu ndhu.#Mar 4:21; Luk 8:16; 11:33 16Ekimulika kyaimwe kyakire abantu kityo, babone ebikolwa byaimwe ebikalamu, baghe Iseimwe ow'omu igulu ekitiisa.#1 Pet 2:12
Okwegeresa ku Mateeka
17“Muleke kudhuuba muti naidha okudibya Amateeka oba abalanzi, tyaidha kudibya aye kutuukiriza. 18Bwenebwene mbakobera nti, okutuusa ng'eigulu n'ensi biwoiregho, enukuta endala waire akatoonheze akalala, tibiridibizibwa mu Mateeka, okutuusa nga byonabyona bibairegho.#Luk 16:17 19Kale oyo yeenayeena alimenha ekirala ku biragiro bino ebitonioli, era n'ayegeresa atyo abantu, alyetebwa asembayo mu Bwakyabazinga obw'omu igulu aye oyo abigema era n'abyegeresa, alyetebwa wa kitiisa mu Bwakyabazinga obw'omu igulu. 20Ka mbakobere: okutoolaku ng'obutuufu bwaimwe busingaku obw'Abanamateeka n'Abafarisaayo, timulingira mu Bwakyabazinga bwa mu igulu.
Okwegeresa ku busungu
(Luk 12:57-59)
21“Mwawulira nga bakoba ab'eira bati, ‘Otaitanga, oyo yeenayeena aliita alisalirwa omusango.’ 22Aye nze mbakoba nti, buli muntu alikoba muganda we ati, ‘Raka,’ alisalirwa omusango mu mbuga ate oyo alikoba ati, ‘Musiru iwe’, alisalirwa omusango gwa kusuulibwa mu muliro gwa geyeena.” 23Kale ni bw'oba otwala ekirabo kyo ku alutaari n'oidhukirira eyo oti muganda wo akuliku ekibono, 24leka agho ekirabo kyo mu maiso ga alutaari, oje otabagane ni muganda wo, memale oidhe ogheeyo ekirabo kyo. 25Isania ni y'owoza naye nga mukaali mu ngira, y'owoza naye alobe kukutwala ya mulamuzi, omulamuzi kukugemya mwisirukale kukusuula mu ikomera. 26Bwenebwene nkukobera nti, toliva omwo okutuusa ng'omaze okusasula n'akasente akasembayo.
Okwegeresa ku bwenzi
27“Mwawulira nga bakoba bati, ‘Toyendanga.’#Kuv 20:14; Ma 5:18 28Aye nze mbakoba nti, buli alingirira omukazi olw'okumwegomba, aba amwenzeeku mule mu mwoyo. 29Kale oba nga eriiso lyo ery'oku mukono omusaadha likusuula mu kibi, litoolemu olisuule ekisingaku n'ekitundu ekirala ku iwe okuzikirira aye omubiri gwo gwonagwona gwaloba kusuulibwa mu geyeena.#Mat 18:9; Mar 9:47 30Oba nga omukono gwo omusaadha gukusuula mu kibi, gutemeku ogusuule kuba kisinga, ekitundu ekirala ku iwe okuzikirira aye omubiri gwo gwonagwona gwaloba kuja mu geyeena.
Okwegeresa ku kunoba
(Mat 19:9; Mar 10:11-12; Luk 16:18)
31“Era kyakobwa kiti, ‘Oyo yeenayeena abinganga mukazi we amughanga embaluwa ey'okumubinga.’#Ma 24:1-4; Mat 19:7; Mar 10:4 32Aye nze mbakoba nti, kiisi anaabinganga mukazi we, okutoolaku ng'amulanga bwenzi, aba amuleeteire okwenda ate n'oyo abayiza omukazi ye babinze aba ayenze.#Mat 19:9; Mar 10:11-12; Luk 16:18; 1 Kor 7:10-11
Okwegeresa ku kulayira
33“Era mwawulira nga bakoba ab'eira bati, ‘Tolayiranga bya kusubagha, aye otuukirizanga by'olayiriire Musengwa.’#Lev 19:12; Kub 30:2; Ma 23:21 34Aye nze mbakoba nti: Mutalayiranga naire, waire okulayira eigulu, kuba n'ekityamo kya Katonda;#Yak 5:12; Isa 66:1; Mat 23:22 35waire ensi, kuba ni kw'ata ebigere bye; waire Yerusalemu, kuba n'ekibuga kya Kyabazinga omukulu; 36waire okulayira omutwe gwo, kuba n'oluviiri olulala tosobola kulufuula lweru oba lwirugavu. 37Endhogera yaimwe ebenga eti, ‘Yii,’ oba eti, ‘Busa!’ Kuba ekisinga ku ebyo nga kiviire mu mubi.
Okwegeresa ku kwesasuuza
(Luk 6:29-30)
38“Mwawulira nga bakoba bati, ‘Eriiso lisasulwa na liiso, n'eriino lisasulwa na liino.’#Kuv 21:24; Lev 24:20; Ma 19:21 39Aye nze mbakoba nti: Mutatakanianga mubi era ole bw'akukubanga ku itama ery'omukono omusaadha omugaluliranga n'erindi. 40Ole ayenda okuwoza n'iwe atwale ekanzu yo, omulekeranga n'ekooti 41Era oyo akukaka okuja naye kilomita endala, ojanga naye ibiri. 42Oyo akusabanga omughanga, era n'oyo ayenda okukweyazikwaku omughanga.
Okugonza abazigu
(Luk 6:27-28, 32-36)
43“Mwawulira nga bakoba bati, ‘Ogonzanga mukagwa wo era waakyagha omuzigu wo.’#Lev 19:18 44Aye nze mbakoba nti: Mugonzanga abazigu baimwe, era musabiranga abo ababakiriga. 45Memale olwo mube abaana ba Iseimwe ali mu igulu ayakiza endhuba ye abalungi n'ababi, n'agwikiza amaadhi ge abo abakolera ku mazima n'abatagakoleraku 46kuba bwe mugonza abo ababagonza mufunamu ki? Abaghooza boona tibwebakola? 47Era oba nga mulamusa baganda baimwe bonka, kye musinga abandi kiri gha? N'abantu ab'ensi batyo tibwebakola? 48Kale ni, imwe mubenga batukuvu nga Iseimwe ow'omu igulu bw'ali omutukuvu.#Lev 19:2; Ma 18:13
Currently Selected:
Matayo 5: Sog
Highlight
Share
Copy
Want to have your highlights saved across all your devices? Sign up or sign in
Baibuli Ekibono kya Katonda © The Bible Society of Uganda, 2014