Amateeka Agokubiri 19

Ebibuga omuntu mw'asobola okulumukira

(Kub 35:9-34; Yosh 20:1-9)

1Musa yaakoba Abaisiraeli ati: “Musengwa Katonda waimwe aidha kuzikiriza abamaghanga agandi, abali buti mu nsi imwe y'ali kubagha. Olwo imwe mutwale ebibuga byaibwe n'endhu dhaibwe. 2-3Mwidha kusala mu nsi eyo ebiketezo bisatu, mu buli kiketezo mulondemu ekibuga kirala era mulongoose n'enguudo. Olwo, ole anaabanga ng'aise omuntu, anaasobolanga okulumukira mu kindi ku bibuga ebyo ebisatu. 4Ole anaabanga ng'aise omuntu, nga tagendereire era ng'omuntu y'aise tabaire muzigu y'ali, aidha kulumukiranga mu kindi ku bibuga ebyo, awonienga obulamu bwe. 5Eky'okuboneraku kiikino: Omuntu asobola okuja ni mwine mu kibira okutema omuti. Yaaghanika empasa okugutema, aye empasa yaaghanguka mu muyini gwayo, yaakuba mwine yaamwita. Oyo aise, anaasobolanga okulumukira mu kindi ku bibuga ebyo, yaawonia obulamu bwe. 6Aye olugendo lusobola okuba oluleeyi einho okukituukamu. Olwo, owoluganda lw'ole ye baise avunaanizibwa okumwesasuulizaagho, olw'obusungu bw'ali nabwo yaabingirira ole aise, yaamutuukaku yaamwita. Ate nga tiyandigwaniire kufa, kuba y'aise aba nga tabaire muzigu y'ali. 7Kyenva ndi kubalagira mulondegho ebibuga bisatu.

8“Musengwa Katonda waimwe aidha kugaziya ekiketezo kyaimwe nga bwe yasuubiza badhaadha baimwe, era abaghe ensi yoonayoona ye yasuubiza okugha badhaadha baimwe abo. 9Ekyo aidha kukikola kasita munaakuumanga ebiragiro bino byonabyona bye ndi kubagha olwaleero, ni mugonza Musengwa Katonda waimwe, era ni mujiira ku ebyo by'alagira. Olwo ku bibuga ebyo ebisatu, mulyongeraku ebindi bisatu. 10Mwidha kukolanga mutyo, olwo abantu abaziraku musango balobenga kwitibwa, era mwena mulobenga kuvunaanibwa lwa kwita bantu baziraku musango, mu nsi yaimwe Musengwa Katonda waimwe y'ali kubagha.

11“Aye omuntu asobola okukyagha mwine, yaamweteega, yaamuzinduukiriza, yaamukuba, yaamwita, olwo yaalumukira mu kindi ku bibuga ebyo. 12Omuntu ng'oti n'oyo, abakulembeze b'omu kibuga kyaimwe banaatumanga abantu baaja baamutoolayo, yaagheebwayo y'owoluganda lw'ole ye baise avunaanizibwa okumwesasuulizaagho, olwo yaitibwa. 13Mutamusaasiranga naire, aye mutoolengagho ekibi eky'okwita abantu abaziraku musango mu Isiraeli, memale mughange okubanga abalamu.”

Embibi edh'eira

14Musa yaakoba Abaisiraeli ati: “Nga muli mu nsi Musengwa Katonda waimwe y'ali kubagha okutwala ebe obutaka bwaimwe, mutakyusanga mbibi dha bibandha bya baliraanwa baimwe, edhaamala eira okusimbibwa abantu abaabasookamu.” #Ma 27:17

Ebigema ku badhulizi

15Musa yaakoba Abaisiraeli ati: “Omudhulizi omulala yenka taasingisenga muntu musango, olw'ekibi oba ekintu ekikyamu kyonakyona omuntu oyo ky'anaabanga ng'akoze. Omuntu anaakakasibwanga okuba ng'aliku omusango lwa budhulizi bwa bantu babiri oba basatu. #Kub 35:30; Ma 17:6; Mat 18:16; Yoa 19:31; 2 Kor 13:1; 1 Tim 5:19; Heb 10:28 16Omuntu omubi bw'anaaghaamanga mwine olw'okwenda okumusingisa omusango, 17bombi banaajanga mu kifo kire eky'okusinzizangamu Musengwa Katonda, baalamulwa bakabona n'abalamuzi abanaabanga nga n'abaligho mu kiseera ekyo. 18Abalamuzi baidha kunoonerezanga n'obwegendereza nga bali kukibuulirizaaku. Bwe banaazuulanga ng'omudhulizi muguya era ng'aghaamye bughaame mwine, 19munaamughanga ekibonerezo ky'abaire ayendeza mwine. Mu nsambo eyo mwidha kwetoolangaku ekibi ekyo. 20Agho abantu boonaboona bwe banaawuliranga ekibairegho, baidha kutyanga. Olwo ghalobe kubaagho muntu wundi airayo kukola kibi ng'oti n'ekyo mu imwe. 21Omuntu ng'oti n'oyo mutamusaasiranga naire. Ekibonerezo kiidha kubanga, bulamu kusasulwa bulamu, liiso kusasulwa liiso, liino kusasulwa liino, na kigere kusasulwa kigere.” #Kuv 21:23-25; Lev 24:19-20; Mat 5:38

Currently Selected:

Amateeka Agokubiri 19: Sog

Highlight

Copy

Compare