Sion 12
12
Atou tei te hal Betani misa merereen mi Iesu
Sion 11:1,43-44
1Melengien tei e he sav (6) diamu ni Anien te Tavien, Iesu be metimal te hal Betani. Ba misao ni Lasaros e tim san, moletin xa tepol ni temea rilomun ra maten.#Mat 26:6-13; Mak 14:3-9 2Ma, xil lapol ni anien tei xa eilep tengan lapisen memesien nae mini. Merta mileh anien bemei, e Lasaros dotan vituei e tep te anienen del Iesu e moletin sav xil mun.#Luk 10:40 3Di, Meri nggur valit vokon tei xa lapol ni ni nard#12:3 Nard be vokon tei xa lapol ni ni amulit holiei tei te hal India xa lakesi ni ‘nard.’ xa mani nen be nesao pupu. Be sangas visal Iesu e mitahi ba xat le Iesu tengan vamerere ni. Di, Meri misihi moten len ni hilin. Melele xa pol ni mak, vut vokon xa bos xiak nggur sen rute xil vus e nim.#Luk 7:37-38
4E, melele xa tei e moletin lu e le tei (12) na Iesu pusi, xi tavesi xi ti ven. His moletin ak Sudas Eskariot, ngan xa isa rat Iesu ihe he elu nan xil. Ma, xi bit,#Sion 6:71 5“?Veneh ma latapos ni vokon ti xa xiak tengan lasa mani nen mi hoeo xil? Vengan xa mani teni pipin ni silva mani handred tol (300).”#12:5 Mani ak mili 300,000 vatu e pipin ni huit polien xa moletin tei mikila vahuri melele xa pol huram tei. #Mat 19:21; Mak 10:21; Luk 18:22 6Xi taviten sepinien ak ti vengan xa ien misae pupu ni hoeo xil. !E‑e! Xi misepin mak vengan xi be moletin te kanen tei. Vengan xa xi iaxa milaxat ateli te mani na Iesu e ngenen xil, e di mikan ni mani ra ni.
7E Iesu biteni mini bit, “!Lingi! Atou ak nggal vokon ak tengan vavue xat tenbeok vamese ve melele te tehinen navan.#Sion 19:40 8Hoeo xil liti visal xamim vehakut. E inou, ninata ti visal xamim vehakut.”#Dut 15:11
Siu xil lapol ni lingxatien tei tengan lihas vin Lasaros
9Melele xa moletin xil lalonge xa Iesu de metimal te hal Betani, moletin xil holu xa holu pupu lamei tengan lapusi. Lamei mun tengan lapus ti Lasaros xa Iesu tesak ni temea rilomun ra maten.#Sion 11:43-44 10E melele xa vat xil na pris xil lalongeong ni, lapol ni lingxatien tengan lihas vin Lasaros mun. 11Labit lihas vini vengan lapusi xa merekel xa mistal en pol ni moletin xil holu lake reitin e Iesu, e latahusil xil ti mun.#Sion 11:45
Moletin xil holu lasa memesien nae ba mi Iesu e melele xa xi mei mistal e hal Serusalem
Mat 21:1-11; Mak 11:1-11; Luk 19:28-40
12Ut milan, vanut moletin xil xa lamei e hal Serusalem tengan lapol ni Anien te Tavien en lalonge xa Iesu di bemei. 13Ma, ladei ut emeil xil e ba labisu mini e suse. E melele xa lakakao laba, lameun be nesao labit,
“!Memesien ba mi Hi!
!Tuxolxatien iti mi ngan xa bemei e his Iahova! (Sam 118:26)#Mat 27:42; Mak 15:32; Sion 1:49
!Tuxolxatien iti mi suv toto te hal Isrel!”
14Iesu mikamet sulut dongki tei e miloh nggo en ba. Ngan ak nggoni ngan xa Vanuvei Eo tehiteni xa tehit,
15 “Xamim xa mudi e taon te hal Serusalem e Vathu Saeon ulimim nakan ti.
!Mupusi! Suv toto namim di bemei tengan valaxat kuh xamim.
Reitin, di dotan e sulut dongki tei tang e di bemei.” (Sak 9:9)
16Melele xa holesok xil ak di mistal, moletin lu e le tei (12) na Iesu latakil ti koute teni. E, dutou sung, melele xa Hi tetal rat Iesu tehe nesao tengan vahur xeihen nan, lanem xati xa holesok xil xa testal mini tehusil xat naha xa Vanuvei Eo tehit lelen ni usili.#Sion 2:22
17Holu e vanut moletin xil ak latehur longeongen usil Iesu texo ngan xil xa latehithiteni xa tetep iaxa xi tekes rat Lasaros ra vangihat te tehinen e tesak ni temea rilomun ra maten.#Sion 11:43-44 18Ve rin ak, moletin xil holu pupu latelongeong tumulen usil merekel ak, e laba tengan lavisu mi Iesu e suse.
19E melele xa Farasi xil lapus tatit moletin xil xa mahulong xiak, labiteni mi xil mun tang labit. “!Mupus ti mu! !Moletin xil vus e ut etan di langgusil xati ngamu! Misakras mun mupol ni ti neta tova vaha xati.”#Sion 11:48
Iesu bit usil maten nan vatei mun
20Melele xa Siu xil labe Serusalem tengan lava lamot mi Hi e melele te Anien te Tavien ak, rut mol‑Kris xil mun laba. 21Mol‑Kris xil ak ba lapus Pilip, xa nggo metimal te hal Betsaeta e provins te hal Kaleli. E labiteni mini labit, “Xamem iemem bei tengan mapus Iesu.”#Sion 1:44; Luk 19:3; 23:8
22Ma, Pilip ba bit mesen ni mi Andru, e xalu luba lubiteni mi Iesu. 23E Iesu bit rilomun ni bit, “Melengien bemei xiak tengan Hi ipet rat his Nat Moletin.#Sion 13:31-32; 17:1 24Nitei vole usil reitinen tei mi xamim. Xosxa utiei tei namot ti vahe tan e latatihin ni ti naxoni ngan xa mat, ma utiei ak itat imak tang. E xosxa itihin utiei ak e tan ixoni ngan xa mat, ma itutou sung, imeul rilomun e ihur huite xil lihe holu.#12:24 Iesu di misepin usil maten, mea rilomunen nan, e itep iaxa ikila isa meulien mi moletin sav xil holu ixo maten nan. #1Kor 15:36 25Ngan xil xa iexil bei meulien nae, meulien ak ha ikesae ra xil. E ngan xil xa iexil nggat meulien nae e ut etan ak, xil vari lihur xat meulien nae iti vehakut.#Mat 10:39; 16:25; Mak 8:35; Luk 9:24; 17:33 26Ngan xil xa iexil bei tengan lapol minou, xil lihusil nou. Vengan rute xave xa inou nada en, moletin te polien navan xil mun liti en. E Tata navan isa merereen mi ngan xil xa di lapol minou.#Sion 14:3; 17:24
27“Xosali, tinok li polu ni nenexoen. ?E nihit neh? Vahit nisis Tata navan tengan iteh meulien e nou tengan ninahisu ni ti melengien te xeih ak. E ninapol ni ti. Vengan xi tesil nou namei tengan nihisu ni longpangasien xil ak.”#Sam 6:3; 42:5,11; Mat 26:38; Mak 14:34
28Di, Iesu misis bit, “O Tata li, upisen ni xa hisom be eilep mak mu.”#Mat 3:17; 17:5; Mak 1:11; 9:7; Luk 3:22; 9:35
Melele xa misis mak, rae tei misepin nggo ut nesao bit, “Natepisen ni xa hisok be eilep mak mu ngamu, e nipol rilomun ni.”
29Vanut moletin xil xa lasoh ladi e rute ak lalong rae ak, e rute xil labiteni labit be veta tang xa di posou. E rute xil mun labit, “!Masxaxa tei misepin mini!”#Pol 23:9
30E Iesu biteni mi xil bit, “Rae ak tasepin ti tengan vatutou ni nou. E misepin mak tengan vatutou ni xamim.#Sion 11:42 31Melele bemei ngamu tengan Hi isa pangasien ihusil lepisien nan ve tesaen na moletin xil te ut etan ak. Melele bemei ngamu tengan Hi ihu len xeihen na Temat xa tehe vat na moletin xil holu te ut etan e ihol rati iha.#Sion 9:39; 14:30; 16:11 32E melele xa moletin xil lipo rat inou e nimurur nihe nesao, nileh moletin xil vus limei visal nou.”#Nam 21:9; Sion 3:14 33Iesu biteni mak tengan vahit lelen sexien xa imat ixo en.#Sion 18:32; 21:19
34Vanut moletin xil ak labit rilomun ni labit, “Vanuvei Eo na Hi di biteni xa Mesaea ita vehakut.#2Saml 7:16; Sam 72:17; 89:4,35-37; 110:1; Aes 9:7; Esek 37:25; Dan 7:14 ?Ma, veneh ma di obiteni xa lipo rat Nat Moletin e imurur ihe nesao? ?Visi vari iaxa be Nat Moletin nen ak?”
35Iesu biteni mi xil bit, “Miehen iti mi xamim ihe vuteili mun. Ma, bos xa ti mukakao kuhi e melele xa miehen di tamu mileluv tengan maluxoluken nakutaxol xamim ti. Vengan ngan xil xa lakakao e maluxoluken latakil ti rute xa di laba en.#Sion 7:33; 8:12; 9:4; 12:46; 11:9-10; 1Sion 2:11 36Ma, muke reitin e miehen ak melele xa di tamu mileluv, tengan mei muhe moletin xil te miehen.” Melele xa Iesu misepin mi moletin xil bus, be reling xil e ba minggus ra xil.#Efes 5:8
37E neta sav xa Iesu pol ni merekel xil holu pe metexil, tave moletin xil vus ti xa lake reitin en. 38Ngan ak mistal be reitin nggusil naha xa provet Aesea tehiteni tehit,
“?Iahova, vahit moletin tei vahit usil longeongen ak tetiamu,
visi vari vake reitin en?
?O Iahova, visi mikila vapus kil hem
vaxo sexien xil xa di mistal xiak?” (Aes 53:1)#Rom 10:16
39Misak ni, xil lasakras lake reitin en, vengan xa Aesea tehiteni mun tehit,
40 “Hi misak ni xil di label xat metexil
e tinexil mei nggeih pilei sung.
Imak, ma linapus kil ti neta ni metexil,
e linanem kil ti neta naxo tinexil.
Vengan xosxa namak ti, ma lihiles meulien nae,
e Hi ital rat xil ra mesien nae xil.” (Aes 6:10)#Mat 13:15; Mak 4:12
41Provet Aesea tesa sepinien ak vengan xa tepus kil minehinen te xeihen na Iesu e tehit lelen ni usili.#Aes 6:1
42E neta sav xa rin ak be reitin, moletin xil holu, del rut vat xil na Siu xil mun, lake reitin e Iesu, e ulixil mikan tengan lavit rati. Ulixil mikan mak vengan xa Farasi xil labiteni xa ngan xil xa labit rati xa Iesu be Mesaea, liso rat xil ra nim te pispisiennae xil.#Sion 7:48; 2:23; 7:31; 8:30; 10:42; 11:45; 12:11; 9:22 43Melele xa ngan xil ak ladit votei mak, lapisen ni xa iexil bei mak mu tengan mei lihe eilep pe met moletin xil ili ngan xa lihe eilep pe met Hi.#Sion 5:44
Iesu bit lelen ni xa ngan xil xa lasin ni lihur pangasien ixo he Hi
44Iesu mikei nggeih bit, “Ngan xil xa laneket e nou, tave ti inou kestang xa laneket en. Di lapisen ni xa di laneket mun e ngan xa tesil inou namei.#Mat 10:40; Sion 5:24 45Vengan ngan xil xa lapus nou, nggoni ngan taxa di lapus ngan xa tesil inou namei.#Sion 14:9 46Namei nabe miehen xa di mileluv xol moletin xil te ut etan, tengan ngan xil vus xa lake reitin e nou linati ti mun e maluxoluken.#Sion 1:9; 3:19; 8:12; 9:5; 12:35 47Xosxa moletin tei milong sepinien navan e talong xati ti, inou ninasa pangasien ti mini. Vengan xa natamei ti e ut etan tengan nasa pangasien mi moletin xil teni. E‑e, namei tengan niteh meulien e xil.#Mat 7:26; Sion 3:17; 8:15 48E ngan xil xa lasin nou e laling nenemien nae tengan linake reitin ti e sepinien navan, tei da xa isa pangasien mi xil. E, e hoxalite te holesok xil, e Melengien te Lepisien, sepinien navan xil iat xil e ipisen ni xa imal tengan lihur pangasien ak. 49Ngan ak ihe reitin, vengan xa natavit ti neta xa vaxo nenemien navan tasok, e di nabit neta xil xa Tata xa tesil inou namei tesemae ni minou tengan nihiteni.#Sion 7:17; 14:31 50Ma, di nabit mesen sepinien kestang xa Hi tesemae ni minou tengan nihiteni, vengan xa nakila xa moletin xil likamet meulien sal ixo en.”#Sion 8:26,28
Currently Selected:
Sion 12: tvk
Highlight
Share
Copy
Want to have your highlights saved across all your devices? Sign up or sign in
© 2015, Wycliffe Bible Translators, Inc. All rights reserved.