Salmo 7
7
I dasal i to mni i matlu kukum
Ani satu lingag nlingag Dabid du mdà di gman satu bel Bénhamin dnagit Kus.
1E Amu, ge i Dwatagu na ge i guflidunggu;
kanlungam agu di kafsasè dad damlu deg,
na falwaam agu di agotla,
2ken én kibòla deg kadang, kanfèla,
na sankahla agu, gambet nimò i labè lmanaf liyun,
na landè dademe tmabeng deg.
3E Amu, E Dwatagu, ku glut tagamsalà agu,
ku glut mgimògu i salà manla,
4hae, ku glut i manla gbalasgu sasè i fye nimò i demegu to di deg,
na di landè gumdaan tatìgu fatduk i to dmuen deg,
5ku glut gambet én i nimògu, fakayla agu dlu na kanfè,
na fakay ku fnatila na fbayàla agu gtidol di tanà.
6E Amugu Dwata, neyem i kagkahgu du i dad to dmuen deg too sè kalbutla deg.
Fitem dale i kalbutam, na tnabengam agu;
na ge mukum deg, Dwatagu, fagu di matlu kukum i knayeam.
7Hae, santifunam i kdee to di glibutam,
na sudeng ge déén di gusudeng i too mdatah ganlal ditù di tah;
8du ge, Amugu Dwata, i mukum i kdee to.
Nukumam agu fagu di katlugu,
na fitem di dad dmalam deg i klandè kaglut di kdalamla.
9Tanlagam moon i sasè nimò i dad to sasè,
na tnabengam i dad to matlu di fye nimòla,
du ge i Dwata too matlu,
na ge i meye ku fye demen sasè i mnè di fandam na nawa i dad to.
10I kamlung deg, dunan Dwata Too Mdatah,
i falwà dad to matlu nawala.
11Dwata, too matlu i kukuman;
na klit i duh kalbutan dad to sasè.
12Du ku là msal i to di salaan
gambet néhê Dwata i faisan du fanlayam kenen,
na bantulan i boholan, na fatlagadan i tunulan.
13I dad tekan gamfati tasanan fatlagad,
na tanlun di lifoh dad gsà i tunulan.
14I to sasè salngad i to maltien:
i bnê di lam tienan i sasè fandam,
na fadlug lamnok i sasè én,
di ksutan, klimbung na kakakéng.
15Na i to sasè lê gambet i to makol i too mngalam sol guftatekan i demen to,
bay kenen baling i mtatek di sol nakolan.
16Hae, kenen kto gumulê i kafsasean i demen to,
na baling kenen i tamduk mdà di klabean.
17Mlé agu fye di Amugu Dwata mdà di bong katlun,
na mlingag agu dmayen i Amugu Too Mdatah.
Currently Selected:
Salmo 7: ITD
Highlight
Copy
Compare
Share
Want to have your highlights saved across all your devices? Sign up or sign in
© 2014, Wycliffe Bible Translators, Inc. All rights reserved.
