Salmo 5
5
I dasal kafni klung di Dwata
Ani satu lingag Dabid.
1E Amugu Dwata, fanlingem i dasalgu,
na balù i mnè fa di lam nawagu,
i làgu gagan mangman dun, begam fanduf.
2Ge, i Harìgu na Dwatagu, fanlingem i kafnigu di ge,
du alò ge i gudmasalgu.
3Amugu Dwata, di flafus lingem i talùgu,
di ksut i duh dmasal agu di ge,
na fatangu i ktimelam deg.
4Gadègu ge i Dwata landè ayè i sasè nimò,
na laam faloh ku nun sasè to mnè di safédam.
5I to fdatah i kton là gtadag di kanfem,
du toom knang nawa i kdee to mimò sasè.
6I dad to gal tmulen kéng falmom;
toom knang nawa i to mayè mati to na i to mlimbung.
7Kabay agu, fakay agu fusuk di gumneam
du mdà di bong kakdom landè kgilin.
Déén di gumangamfù di ge, di Bong Gumneam,
fdanàgu i ktogu di ge gagin i klikògu.
8Amugu Dwata, begam agu nalak di matlu nimò salngad ge,
du fye là agu fisan di dad dmuen deg.
Tdoam deg ku tan i dalan knayeam gumagugu.
9Én fnigu du dad to dmuen deg, landè manla gsalig,
na én alò kayèla falmo.
I bàla gambet sol i lbang là maglimun,
fagu di kafdagla ftatekla i demela to.
10Taman nukumam ale, Dwata,
fye moon ku i dad sasè nimòla mulê di dale.
Knagolam ale du tadee dulê nlafàla i knayeam,
na taknagolla ge.
11Kabay kdee dad to smalig di ge, banlém ale klehew,
fye too ale gal mlingag di klehewla.
Kanlungam ale, fye lehew di ge i dad to ani i mbong nawa ge.
12E Amugu Dwata, ge i mlé kafye di dad to matlu,
na i kakdom smafang dale gambet i klung.
Currently Selected:
Salmo 5: ITD
Highlight
Copy
Compare
Share
Want to have your highlights saved across all your devices? Sign up or sign in
© 2014, Wycliffe Bible Translators, Inc. All rights reserved.
