Salmo 119
119
I kabtas dad flalò i Amuito Dwata
97Amugu Dwata, too mabtas di deg i dad flaloam;
tayud i duh toogu gal fandam.
98Gal mnè di fandamgu i dad dekam gami;
na én gumdàgu too fulung, mdatah fa di dad dmuen deg.
99Du toogu gal fandam i gmanam,
na baling mdatah fa i deg gnadè di kdee to tamdò deg.
100Bong fa i kaglabatgu di kaglabat i dad tua,
du nimengu i dad tdoam.
101Niwasgu i kdee sasè nimò,
du fye mgimengu i tnaluam.
102Làgu nlifet i dad flaum deg,
du ge sa i tamdò dun di deg.
103Too fye di deg i dad fakangam,
fye fa di kafye nem i tnab too mi.
104Mdà di dad tdoam, matnù i kaglabatgu,
én duengu too mnang nawa i dad sasè nimò.
I flalò Dwata lamwa fandam i dad to
105I tnaluam gambet i salò tmuyal i dalangu,
du fiten di deg i fye dalan gumagugu.
106Too matlu i dad flaloam;
tamakang agu mimen dun, na toogu dnohò i fakanggu.
107Amugu Dwata, too sasè kaflayam nagugu ani;
begam agu banlé i nawa tafakangam di tnaluam.
108Dnawatam i dasalgu dmayen ge,
na tdoam deg i dad flaloam di dad to.
109Balù kilen, gatlagad agu fafati,
na làgu glifet dad flaloam,
110I dad to sasè tafatlagadla i fawel deg,
bay là agu sa samyat di tdoam.
111Du i dad gmanam dnawatgu, na làgu tnagak kel di landè gusenan,
du ani klehew i nawagu.
112Na taman toogu fangal i nawagu mimen i dad katedam
di klogu mto.
I ayè mimen dad tnalù i Amuito Dwata
129Too tì fye i dad gmanam,
na toogu nimen mdà di nawagu.
130I kafbel i dad tnaluam, lamwa fandam i dad to,
na mlé kaglabat balù di dad to landè gnadè.
131Taman too knayè i nawagu mimen i dad dekam gami,
gambet nun bong kbitilgu dun.
132Begam agu fanduf na kandom agu,
salngad i mgimoam di kdee to kambong ge nawa.
133Nalakam i klafàgu fagu di tnaluam fye là agu tlaab, du én i fakangam;
hae, nangam faloh ku mgebe agu i dad salà.
134Falwaam agu di dad to mkut deg,
du fye glalògu i dad tdoam.
135Fitem i kakdom di saligam ani,
na tdoam deg i dad katedam.
136Maloh i dad lwakgu gambet i kaloh i bong yéél,
du i dad to là sa mimen i flaloam.
Too matlu i dad flalò Dwata
137Amugu Dwata, too ge matlu,
na i dad flaloam too fye.
138I dad gmanam, i guflaloam i dad to,
too matlu na too gsalig.
139Too dminè i kaflabègu salngad di lifoh,
du i dad to mnang nawa deg là ale mimen i dad tnaluam.
140Too glut, dnohoam kdee fakangam,
na i saligam ani too mbong nawa dale.
141Balù landè btasgu na nadoy agu fa,
knean làgu glifet i dad tdoam.
142I katlum, Dwata, landè gusenan,
na too glut i flaloam.
143Nkel agu ksamuk na kaflayam,
bay i dad dekam i gaflehew deg.
144I kaglut i dad gmanam, là mgili kel di landè sen;
banlém agu kaglabat du fye mlawil agu.
Currently Selected:
Salmo 119: ITD
Highlight
Share
Copy
Want to have your highlights saved across all your devices? Sign up or sign in
© 2014, Wycliffe Bible Translators, Inc. All rights reserved.
