Salmo 103
103
I kakdo Dwata di dad to nun klikò di kenen, là gagan mtas dun
I lingag Dabid
1Too mdà di nawagu mlé fye di Amugu Dwata;
kayègu ku too sikof kdayengu Dwata too mtiu.
2Too mdà di nawagu mlé fye di Amugu Dwata,
na làgu glifet i kdee kafye gablén di deg.
3Mlifet kenen i kdee salàgu,
na fanguléan i kdee tdukgu.
4Kenen i msò deg mdà di fati
na mlé deg kafye mdà di kakdon landè kgilin.
5Fananoan nawagu i dad fye blén deg di klogu mto,
taman samfulê i galgu salngad di lamnok agu fa na salngad di gal i kablak.
6Amuito Dwata i falwà kdee to bankut;
di kukuman banlén ale i dale kaglut.
7Fgadè Dwata i knayean nimò di ku Mosis,
na gfiten di bel Israél i mgimoan.
8I Amuito Dwata too kamdo, too bong nawan dad to;
laan mlal flabè, na too bong i kakdon na landè kgilin.
9Laan tì fadlug mngak i landè gutlagan,
na laan fles flabè kel di landè sen.
10Laan fanlayam i to gablà di kbong salaan,
i kbalasan dad salaito là salngad di kbong ksasè i nimoito,
11du i kakdon dad to nun klikò di kenen, landè kgilin, na too là gagan mtas dun;
salngad di kdatah i langit di tah tanà i kalbong nawan dale.
12Na laito gagan mtas i kawag i guflana Dwata i salaito mdà di gito,
mawag fa di gusut i duh mdà di gusdafan.
13Too nun kakdon i dad to nun klikò di kenen,
salngad kakdo i satu mà di kenen dad ngà.
14Du gadean i gumlungayito;
laan glifet mgimò ito mdà alò di kfung.
15Gito dad to, là mlo i kneito di tah tanà ani salngad di bnas,
na salngad di knè i dad bulek di bnas,
16du kbal i nus na mtatek i dad bulekan,
na là mlo mlanas na landè lêman mite dun.
17Kabay i kakdo Amuito Dwata di dad to nun klikò di kenen, knean i knean, landè kgilin
mdà di landè gutambuan kel di landè gusenan;
i kafyen dale gafat di kdee tugad i bella,
18i dad to mafè i kasfakangla Dwata,
na too fkah di nawala i kimenla katedan.
19Ditù di langit gumagot i Amuito Dwata,
na kenen i harì mebe i kdee.
20Mlé gamu fye di Amuito Dwata, gamu dad kasaliganan,
gamu dad mtulus mimò i dad dekan
na flinge i dad tnaluan.
21Mlé gamu fye di Amuito Dwata, kdeeyu mnè di langit,
kdee saligan mimò i knayean.
22Mlé gamu fye di Amuito Dwata,
kdeeyu mgimoan di klamang kagotan.
Too mdà di nawagu mlé fye di Amugu Dwata!
Currently Selected:
Salmo 103: ITD
Highlight
Copy
Compare
Share
Want to have your highlights saved across all your devices? Sign up or sign in
© 2014, Wycliffe Bible Translators, Inc. All rights reserved.
