Ñwaè' Luêk 6:27-49

“À ka' ba yi àmbò wèe ce wèe ce yu' yuu ce m ce làa, kòŋ nè bèe ce a bàa wèe, gee buu bbòŋboŋ nè wowèe. Làa nè nè bèe ce a ce làa enɛ ndòo co' wèe nà enɛ Nyʉ̀ ghoni wowèe, ker loo foŋ nè bèe ce a ce fa ŋgɛ' nè wèe. Ŋwɛ̀ à ka' lip wɛ̀ nè bo à gè', à beesì gè' mo' nè ye foŋ tɛ e lîp. Ŋwɛ̀ à ka' koo yò kûr, à ma'shì e koo cɛ̀' yì enjep mʉ foŋ. Ŋwɛ̀ à ka' loo yuu ese wɛ̀, à fa ye yuu anà. Ŋwɛ̀ à ka' koo yo yuu, à fa kèr làa enɛ ŋgàŋ kʉsi nè wɛ̀ ka'. Banɛ wèe gee nè bèe mò' àmbò wèe ce kòŋ enɛ a gee nè wèe. Wèe ka' ku koŋ ba bèe ce a kòŋ wèe, a yoŋshì wèe à njɛ̌ɛ kɛ? To ŋgǎa ŋgèe buu bbebep foŋ a kòŋ bèe ce a kòŋ wowèe. Wèe ka' ku gee buu bbòŋboŋ ba nè bèe ce a ke gèe buu bbòŋboŋ nè wèe, a yoŋshì wèe à njɛ̌ɛ kɛ? To ŋgǎa ŋgèe buu bbebep a ke gèe wa' foŋ. Wèe ka' ku ce fòosi buu ba nè bèe ce wèe ce kwà'shi enɛ a be kʉsi buu anà nè wèe, a yoŋshì wèe à njɛ̌ɛ kɛ? To ŋgǎa ŋgèe buu bbebep a ke fòosi buu nè ŋgǎa ŋgèe buu bbebep, tɛ a bo fʉʉ koo yàp buu ce a m fòosi anà. Wèe à ba koŋ yè bèe ce a bàa wèe, gèe ŋgěe bòŋboŋ nè wowèe. Ŋwɛ̀ à ka' foosi yuu, e fa kèr ce kè' enɛ a be kʉsi nè ye ka'. Wèe ka' gee wa' banɛ wee blà' vi be ba gòr, tɛ wèe ba boo Nyʉ̀ embe bùu njobè' e ke gèe ŋgěe bòŋboŋ nè běe bbebep ker ba nè bèe ce a ke yòŋshi yap yu ŋwɛ̀ ka'. Koosi nè mnse nè bèe àmbò yè Ta Nyʉ̀ e ke koosi nà. “Wèe fa sa' bèe mo' ka', tɛ a bo sa' wèe ka'. Wèe fa bepsi bèe mo' ka', tɛ a bo bepsi wèe ka'. Wèe foosi bèe mo' tɛ a bo fòosi wèe foŋ. Wèe fa, tɛ a bo fa wèe foŋ. A be fè' tɛ yi ruu bòŋboŋ, a ciishi tɛ yi ruu bàati tɛ a fa njep yo bàa. Yuu ce wèe ka' fe' buu njo, ku ba yi ce a be fè' njo kʉsi nè wèe.” E m mà' ŋgàa nè wowèe foŋ enɛ̂, “Àde' nfèp duŋshì nfèp mò' nduunjì a? E ka' gee wa'a, wowèe bsìp a ke' gweŋger njep bè'tè a? Àde' ŋwɛ̀ ce a ce yɛ'ni ye, caa ŋwɛ̀ ryɛ'nì ka'. Geewa'a, a ka' yɛ'ni ŋwɛ̀ bòŋboŋ banɛ ŋgàŋ be ba àmbò ŋwɛ̀ ce e yɛ'ni ye. Wɛ̀ mà'shi ntaaŋguu nje rlìr nje wɛ̀, a ce fyɛ' ba ŋkʉ̀' ce ce yi yu nfʉrò nje rlìr njokɛ? Àde' à laa nè nfʉrò enɛ̂, ‘Nfʉrà, nàa rlir tɛ m koo wɛ̀ mʉ ŋkʉ̀' ce enjo,’ ke' yɛ ntaaŋguu ce e yu wɛ̀ nje rlìr nà ka' à njɛ̌ɛ kɛ? Wɛ̀ ce à yu ŋwɛ̀ mbo'ni, fʉr ntaaŋguu ce e yu nje rlìr njep wɛ̀ wɛɛ tɛ à bo yɛ mʉ ŋkʉ̀' ce ce yi yu nje rlìr nje nfʉrò bòŋboŋ, ka' fʉr. “Yi yu enɛ àde' mbàŋ ce bebep yi yʉ mbe ce ce bòŋboŋ ka', a ker ba foŋ enɛ àde' mbàŋ ce bòŋboŋ yi yʉ mbe ce ce bebep ka'. A ke rìŋ ce nè mbàŋ ce anà. Àde' ŋwɛ̀ kʉ rbì embe rɛp ka', kɛ̀ lèemʉ embe rgʉ̀ ka'. Ŋwɛ̌ mbòŋmboŋ e ke fʉr buu bbòŋboŋ efa buu bbòŋboŋ ce vi yu njep yě ntee, ŋwɛ̌ mbembep fʉr buu bbebep efa buu bbebep ce vi yu njep yě ntee. Yi yu wa'a njobè' ŋwɛ̀ e ke làa ba efa ku' buu ce vi ruu njep yě ntee. “Wèe ce kɛ' mɛ̀ enɛ̂ ‘Tatâ, Tatâ’, a ce gèe buu ce m ce suŋ wèe ka' njokɛ? Ŋwɛ̀ ce e ka' vʉ yɛ mɛ̀, yu' yuu ce m ce làa, gee yi, banɛ m be dùŋshi wèe njɛ̀ɛ ŋwɛ̀ ce ŋgàŋ yu. E yu àmbò ŋwɛ̀ ce e m ce bà'ri yì ndap, a tuŋ kùu yi suu bòŋboŋ sê, a tɛɛ mbendù ryɛɛ, e boo kùu ndap mbo. Rdip li ka' ruu cirshi ndap anà, a gee yuu mo' àgho ka' njobè' a m bà'ri ye yɛɛnì. Geewa'a, ŋwɛ̀ ce e ka' yu' yuu ce m ce làa, gee yi ka', banɛ ŋgàŋ yu àmbò ŋwɛ̀ ce e m ce bà'ri yì ndap, a tuŋ kùu ka'. Rdip li ka' ruu cìr ndap anà, e ku kɛɛŋger a gwê, a koo yuu efa gho ka'.”