YouVersion Logo
Search Icon

Ñwaè' Joân 5

5
1Buu ca vi ka' mì wɛɛ, Jus a ce ye yap ŋkà' mo'. Jisòs à du à rla' Jɛ̀rusalɛ̀m. 2Tʉ̀ mo' yi m ba à rla' anà àgee cǔu ŋka' mo' ce a m ce too enɛ cùu ŋka' njèe. A too rlii tʉ̀ anà à li Hibrù enɛ Bɛ̀tsatà. A m bà'ri btàp mbùu too àwǎa tʉ̀ anà vi tâ. 3Ku' ŋgǎa byaŋ a m nòŋte à btàp anà. Bèe mo' efa wowèe a m fèp, bèe mo' a ba mntɛ̀ŋ, mŋgʉ̀' nyor mmo' vi kweŋgèr bèe mo'. [Wowèe a m cu a ce kè' nfè' ce tʉ̀ be kɛ̀' ce baŋti. 4Ncìndap Nyʉ̀ à m ce lǒ vʉ̀ ce gèe tʉ̀ anà yi ce baŋti. Tʉ̀ anà yi m ce baŋti wa'a, ŋwɛ̀ ce e ka' gwe njo entombì, e m ka' ce yaŋ ba njɛ̀ɛ yaŋ kɛ, banɛ e be lùŋ.] 5Ŋwɛ̀ mò' à m ba àfo ce e m yaŋ à bfè' ncòp-waami-à-mntaar. 6Jisòs à ka' vʉ̀ bà' a yɛ àmbò ŋwɛ̀ anà nòŋ. E m rìŋ enɛ ŋwɛ̀ anà à m yaŋ nfè' njìsàp sê. E laa nè ye enɛ̂, “Wɛ̌ kòŋ à rlùŋ efa yo yaŋ ca a?” 7Ŋwɛ̀ anà à beesì nè ye enɛ̂, “Masà, e ke ba à nfè' ce tʉ̀ à baŋti m tʉr ŋwɛ̀ ce e lor mɛ̀ dù àgho njo ka'. Mɛ lǒ ghèter à nfè' anà enɛ m du njo, ŋwɛ̀ mò' ku du entombì nè mɛ̀.” 8Jisòs à laa nè ye enɛ̂, “Nàti mbekì, lor lo rwàa ce dû.” 9Ŋwɛ̀ anà à ku luŋ à nfè' anà a lor li rwàa a ce dù.
Nòŋ ce Jisòs à m gèe ŋwɛ̀ anà e luŋ efa yi yaŋ anà, à m ba nyʉ̀ mmbomntaa Nyʉ̀. 10Yi ka' ba wa'a, Jus laa nè ŋwɛ̀ ce Jisòs à ba gee e luŋ nà enɛ̂, “Wɛ̀ rìŋ enɛ ntìni a mmbomntaa. Wɛ̀ byɛ̀' rwàa anà wa'a, a bʉ' ncir.” 11Ŋwɛ̀ anà à beesì nè wowèe enɛ̂, “Ŋwɛ̀ ce e ba gee mɛ̀ luŋ efa ya yaŋ à ba laa nè mɛ̀ enɛ m lor la rwàa ce dû.” 12Wowèe a bipshì nè ye enɛ̂, “Ŋwɛ̀ ce e ba laa enɛ à lor lo rwàa du à ba laa nda anà?” 13Ŋwɛ̀ anà à m rìŋ ŋwɛ̀ ce e m gèe ye e luŋ efa yi yaŋ ka', njobè' Jisòs à m lò a bʉ à mʉ̀ kʉr bèe ce a m ba àfo.
14Mʉ nfè' mò' à ka' tuuse, Jisòs à yɛ ŋwɛ̀ ce e m gèe ye e luŋ nà mbe Ndàp Nyʉ̀, a laa nè ye enɛ̂, “Yɛ̂, wɛ̀ lùŋ efa yo yaŋ. Fa kèr gèe buu bbebep ka', fà dì' ŋgɛ' mò' gòr lo koni wɛ̀ càa cena ka'.” 15Ŋwɛ̀ anà à du a suŋ Jus enɛ ŋwɛ̀ ce e gèe ye e luŋ à gèe Jisòs. 16Wowèe a kɛ' a ce fa Jisòs ŋgɛ' njobè' buu ce e m gèe nyʉ̀ mmbomntaa. 17Jisòs à m làa nè wowèe enɛ̂, “Yà ta ce fà' à nfè' wɛɛwɛ. Mɛ mɛ̀ ce fà' à njɛ̌ɛ wa'a.” 18Jus a ka' yu' yuu ce Jisòs à làa, a ku ker gheter ba à se enɛ a ba yʉ ye njobè' e m ku bʉ' ba ncir mmbomntaa cà'cà' ka', e m ker laa foŋ enɛ Nyʉ̀ yu yì tâ. Banɛ e m ce làa enɛ a Nyʉ̀ a ku ba yɛɛnì.
19Jisòs à beesì a laa nè bèe anà enɛ̂, “M ce suŋ wèe nè mini-ŋwɛ̀ enɛ àde' Muu gee yuu nè yi tu ka'. Àde' e gee ba yuu ce e yɛ Tàr à ce gèe. Yuu ce yì Ta e ke gèe, a yuu ce ye ye e ke gèe. 20Tàr kòŋ Muu, a ce dùŋshi ye buu wɛɛwɛ ce e ke gèe. E be dùŋshi ye buu bghagha' ce e be gèe ce vi be càa vì ce wèe à yɛ na, tɛ wèe yɛ, bɛ̀ɛŋger sê. 21Àmbò Tàr e ke gèe bèe ce a kweŋger a fʉʉ efa rkwe, cu btèe, a mbò Muu ye ye e ke gèe bèe ce e ce, a cu btèe à njɛ̌ɛ wa' foŋ. 22Tàr e ke sa' ŋwɛ̀ ka', e fa ŋger nè muu yì enɛ e sa' bèe, 23tɛ bèe a bo yu'ni nè Muu yì àmbò a ke yu'ni nè ye foŋ nà. Ŋwɛ̀ à ka' tɛ yu'ni nè muu ka', banɛ àde' ŋgàŋ yu'nì nè Tàr ce e m tuu Muu anà ka'.
24“M ce suŋ wèe nè mini-ŋwɛ̀ enɛ ŋwɛ̀ ce e ka' yu' ya nlàa, byemi nè ŋwɛ̀ ce e m tuu mɛ̀, banɛ ŋgàŋ be koni ryòŋ ce nfesè. A be sa' ŋwɛ̀ anà ka' njobè' rkwe li kèr tʉr ŋger mbe yě ndù ka'. Ŋgàŋ be cu ntèe. 25M ce suŋ wèe nè mini-ŋwɛ̀ enɛ nfè' ce ghɛɛ, e ghɛɛ war, ce bèe ce a kweŋger a be yu' njèndoŋ Muu Nyʉ̀. Bèe ce a be yu' njèndoŋ anà a be cu btèe. 26Àmbò ryòŋ li ke lò ese Tàr, Tàr à gèe ryòŋ anà li ce lò ese Muu yì foŋ, 27a ker fa ŋger nè Muu yì foŋ enɛ e sa' mnsa' njobè' e yu Muu Ŋwɛ̀. 28Wèe fa bɛ̀ɛŋger njo' buu ce m ce suŋ wèe na ka'. Nfè' ce ghɛɛ ce bèe ce a yu njep nshè a be yu' yì njèndoŋ, 29fʉʉ efa rkwe. Bèe ce a m ce gèe buu bbòŋboŋ a be fʉʉ, koni ryòŋ. Bèe ce a m ce gèe buu bbebep a be fʉʉ tɛ Nyʉ̀ sa' wowèe fa wowèe ŋgɛ'.”
30Jisòs à ker laa enɛ̂, “Àde' m gee yuu mo' nè ya tu ka'. M ku ce sa' bèe ba àmbò a m suŋ mɛ̀ enɛ m sa'. M ce sa' wa'a, ce teni mnsa' yɛɛnì njobè' m ce gèe ba àmbò m ce kòŋ ka', m ce gèe ba àmbò yà Ta ce e m tuu mɛ̀ ce kòŋ enɛ m gêe.
31“Yi ka' ba enɛ ce suŋ mɛ̀ àmbò yà nyor, yi ba yɛɛnì ka'. 32Ŋwɛ̀ mò' ku ba ce e ce suŋ àmbò mɛ̀. M rìŋ mɛnɛ yuu ce e ce suŋ àmbò mɛ̀ yi yu mini. 33Wèe à m tuu yè bèe enɛ a du yɛ Jǒn. E m suŋ wèe yuu mini. 34Mbùu mò' yu àgho nè mɛ̀ à rròo ŋwɛ̀ tɛ e bo suŋ bèe àmbò mɛ̀ ka'. Geewa'a m ce suŋ wèe enɛ Jǒn à m làa àmbò mɛ̀, tɛ wèe bo byemi, lùŋ. 35E m ba lam ce a cʉ̀' e ce raa sê. Wèe à m koni li rraa anà, a lu'shi nè li à mʉ nfè' mò'. 36M tʉr buu mò' ce vi ce suŋ àmbò mɛ̀ caa vǐ Jǒn. Mfà' ce m ce gèe ce yà Ta à fa mɛ̀ ŋger enɛ m gee misi mi ce suŋ àmbò mɛ̀, a ce dùŋshi enɛ yà Ta à tuu mɛ̀. 37Yà Ta ce e m tuu mɛ̀ à làa yuu a kuu mɛ̀ foŋ. Wèe à m be yu' yì njèndoŋ ka', a be yɛ ye ka'. 38Wèe à lɛ̀ yi nlàa njep wěe mntee ka' njobè' wèe à byemi nè ŋwɛ̀ ce e m tuu nà ka'. 39Wèe ce yɛ'ni Ŋwǎ' Nyʉ̀ njobè' wèe ce kwà'shi enɛ yi be gèe tɛ wèe koni ryòŋ ce nfesè. Ku ba ŋwà' anà ce yi ce suŋ àmbò mɛ̀. 40Geewa'a, wèe à ku kani ye yu à rvʉ̀ yɛ mɛ̀ tɛ wèe bo koni ryòŋ.
41“M ce ròo mɛnɛ bèe a ku'si mɛ̀ ka'. 42Ka' ba àmbò wèe, mɛ̀ rìŋ wèe, a riŋ mɛnɛ wèe kòŋ Nyʉ̀ nè ye ntee-ŋwɛ̀ ka'. 43Mɛ̀ vʉ̀ ya ba à rlii yà Tâ, wèe à konì mɛ̀ ka'. Ŋwɛ̌ jɛɛ à ka' vʉ nè yi tu, a ŋwɛ̀ ce wèe be kòŋ à rkonì. 44Wèe kòŋ à rkù'si wee mnyor a ke' ce ròo bkù'sì ba ese Nyʉ̀ ce e yu mò'sir cà'cà' ka'. Banɛ wèe à ba byemi nè mɛ̀ à njɛ̌ɛ kɛ? 45Wèe fa kwà'shi enɛ ŋwɛ̀ ce e be lòr wèe à mnsa' à bsii Tàr be lòr mɛ̀ ka'. Be ba Musìs ce wèe à lɛ̀ mmir mbe yě ndù nà. 46Wèe à m ba byemi nè Musìs, wèe à ba byemi nè mɛ̀ njobè' Musìs à m saŋ àmbò mɛ̀. 47Wèe à ka' tɛ byemi yuu ce e m saŋ ka', wèe ka' byemi yuu ce m ce làa à njɛ̌ɛ kɛ?”

Currently Selected:

Ñwaè' Joân 5: LNT

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy