Ñwaè' Joân 15
15
1Jisòs à m ker laa enɛ̂, “M yu msini grɛ̌p ce mini. Yà Ta a ŋwɛ̀ ce e ke ke' à msini ca. 2Mba' efa gho ce e ka' ce yʉ ka', e gwar ma'. Mba' ce e ka' ce yʉ, e kupshì tɛ e bo yʉ gòr. 3A kupshi wee wèe foŋ, wèe à raa njobè' blàa ce mɛ̀ làa nè wèe. 4Cu nè njep mɛ̀ tɛ m cu njep wèe. Àmbò àde' mba' fartì enje msini, ker yʉ ka' nà, wèe à ka' tɛ cu njep mɛ̀ foŋ ka', àde' wèe gee yuu mo' ka'. 5M yu msini, wèe à ba mmba'. Ŋwɛ̀ ce e ka' cu njep mɛ̀, mɛ mɛ̀ cu njep ye, banɛ ŋgàŋ be yʉ mbàŋ gòr sê. Wèe à ka' tɛ cu njep mɛ̀ ka' àde' wèe gee yuu mo' ka'. 6Ŋwɛ̀ à ka' tɛ cu njep mɛ̀ ka', banɛ a be mà' ŋgàŋ àmbò mba' msini, tɛ e yuushi. A ke baashi njɛ̀ɛ mmba' anà, ma' njep mor vi she. 7Wèe à ka' cu njep mɛ̀, wa blàa vi cu njep wèe, wèe à ka' loo ka' njɛ̀ɛ kɛ ce wèe kòŋ ese mɛ̀, m be fa yuu anà nè wèe. 8Yuu ce àde' a ku'sì yà Ta àgho yi yu enɛ wèe yʉ mbàŋ gòr. Cena yi be dùŋshi enɛ wèe yu ŋgǎa yɛ'ni yà buu. 9M ku koŋ wèe foŋ àmbò yà Ta kòŋ mɛ̀. Cu nè njep la rkòŋnì. 10Wèe à ka' gee buu ce mɛ̀ làa nè wèe, wèe be cu njep la rkòŋnì àmbò mɛ mɛ̀ foŋ à gèe buu ce yà Ta à làa enɛ m gêe, a cu njep li rkòŋnì nà. 11Mɛ̀ làa buu ca nè wèe tɛ wèe bo lu'shi foŋ àmbò mɛ̀, tɛ le rlu'shì anà li bo mìsi. 12Yuu ce m ce làa enɛ wèe gee yi yu enɛ wèe koŋni àmbò m kòŋ wèe. 13Njɛ̀ɛ rkòŋnì mo' li yu àgho a ker caa ce enɛ ŋwɛ̀ kwe àtu bkar vi ka'. 14Wèe à ka' gee yuu ce mɛ̀ làa nè wèe, banɛ wèe yu bkar wa. 15Àde' m ker too wèe enɛ ŋgǎa mfà' ka' njobè' àde' ŋwɛ̀ rfà' riŋ buu wɛɛwɛ ce yì masà e ke gèe ka'. M ce too wèe ba mɛnɛ bkar wa. Cena yi yu wa'a njobè' mɛ̀ suŋ wèe buu wɛɛwɛ ce mɛ̀ yu' ese yà Tâ. 16À m ce wèe a ce mɛ̀ ka'. À m ce mɛ̀ a ce wèe, a tuu wèe tɛ wèe bo dù yʉ mbàŋ, tɛ mbàŋ anà yi bo cu. Wèe à ka' gee wa'a, wèe à ka' loo ka' njɛ̌ɛ kɛ ese yà Ta fa mɛ̌ rlii, e be fa yuu anà nè wèe. 17Yuu ce m ce làa nè wèe yi yu enɛ wèe koŋni.
18“Ŋgòŋ ca yi ka' baa wèe, rìŋ nè enɛ yi m baa mɛ̀ entombǐ nè wèe. 19Wèe à ba ba bèe enjep ŋgòŋ na, wowèe a ba kòŋ wèe njobè' wèe yu yàp bèe. Geewa'a wèe yu ye bèe enjep ŋgòŋ na ka'. Mɛ̀ ce wèe efa mʉ̀ bèe enjep ŋgòŋ na. A mbùu ce wowèe a bàa wèe. 20Kuushi nè yuu ce mɛ̀ m suŋ wèe enɛ àde' ŋwɛ̀ rfà' caa yì masà ka' nà. Wowèe a m ka' ba fa mɛ̀ ŋgɛ', banɛ a be fa wèe ŋgɛ' foŋ. Wowèe a m ka' ba yu'ni nè wa blàa banɛ a be yu'ni nè wee blàa foŋ. 21Wowèe a be gèe nè wèe wa'a njobè' mɛ̀, ker ba foŋ njobè' wowèe a rìŋ ŋwɛ̀ ce e m tuu mɛ̀ ka'. 22Mɛ̀ m tɛ bà vʉ̀ làa yuu nè wowèe ka', a m ba tàa wowèe à yuu bebep ka'. Àmbò mɛ̀ vʉ̀ sè'ni na, yuu mo' yi yu ce àde' yi ker tɛ'shi yàp buu bbebep ka'. 23Ŋwɛ̀ ce e ka' baa mɛ̀, banɛ e bàa yà Ta foŋ. 24Mɛ̀ m ka' tɛ bà gèe mfà' ce ŋwɛ̀ à m be gee ka' fa wǎp mʉ na ka', a m ba tàa wowèe à yuu bebep ka'. Wowèe a yɛ mfà' ca sè'ni, a ku bii ce bàa mɛ̀, ba yà Ta foŋ. 25Buu ca vi koni wa'a, tɛ yi bo kù ghɛɛte àmbò a m saŋ mbe yap ŋwà' mncir enɛ̂, ‘A m bàa mɛ̀ à cicì.’
26Be kè ba à nfè' mò' tɛ m tuu ŋwɛ̀ rjà' mò' nè wèe ese Tàr. Ŋwɛ̀ anà yu Yʉ' ce yi lò ese Tàr, yi ke suŋ bèe yuu mini. Yi be vʉ̀ tɛ yi suŋ bèe àmbò mɛ̀. 27Wee wèe foŋ be suŋ àmbò mɛ̀ njobè' sèe à m ku ba àbee efa rkɛ̀'.
Currently Selected:
Ñwaè' Joân 15: LNT
Highlight
Share
Copy
Want to have your highlights saved across all your devices? Sign up or sign in
Limbum New Testament © Bible Society of Cameroon, 2003.