Ñwaè' Joân 13
13
1Tɛ a ka' ye Ŋkǎ' càasi-mndap, Jisòs à m rìŋ enɛ nfè' à ghɛɛ ce e be mà'shi ŋgòŋ ca dù yɛ yì Tâ. E m kòŋ yì bèe ce a yu njep ŋgòŋ na, a koŋ wowèe a du a misî.
2Wowèe a m ce ye byee à mbùuŋkùr, Satàn à banì gee Judàs ce muu Saimʉn Ìskarìyòt à kɛ' a ce kwà'shi enɛ e be fyèni Jisòs. 3Jisòs à m rìŋ enɛ yì Ta à m fa buu wɛɛwɛ mbe yě mmbò. E m rìŋ foŋ enɛ e m lǒ ese Nyʉ̀, a ce kʉti à ryɛ Nyʉ̀, 4a nati mbekì à nfè' byee anà, a co'ni bcɛ̌' mo' efa nyòr, a lor bàtàare a cʉʉ njep mbùu. 5E ka' cʉʉ wɛɛ, a lor mdip a cu'ni njep kaŋ a kɛ' a ce sù'si mkǔu ŋgǎa yɛ'ni yì buu, a ce sòr nè bàtàare ce e ba cʉʉ njep mbùu nà. 6E ka' bà' mbe Saimʉn Pità, e laa nè ye enɛ̂, “Tatâ, a wɛ̀ ce à be sù'si ma mkùu a?” 7Jisòs à beesì nè ye enɛ̂, “Wɛ̀ be riŋ yuu ce m ce gèe sè'ni ka'. À be lò rìŋ ba embenjì.” 8Pità à laa nè ye enɛ̂, “Àde' à ke' su'si ma mkùu ka'.” Jisòs à beesì enɛ̂, “M ka' tɛ sù'si mo mkùu ka', banɛ sò à mì.” 9Saimʉn Pità a laa nè ye enɛ̂, “Tatâ, banɛ à fa kù sù'si ba ma mkùu cà'cà' ka', sù'si ma mmbo ba ya tu foŋ.” 10Jisòs à laa nè ye enɛ̂, “Ŋwɛ̀ à ka' su'si nyor wɛɛ, banɛ ŋgàŋ be kù sù'si ba mi mkùu njobè' yì nyor ce raa. À ka' ba yi àmbò wèe, wèe ce raa, geewa'a ku ba wèe wɛɛwɛ ce wèe ce raa ka'.” 11E m làa wa'a, a ku riŋ ŋwɛ̀ ce e be lò fyèni ye. A mbùu ce e m làa enɛ̂, “Ku ba wèe wɛɛwɛ ce wèe ce raa ka'.”
12E ka' sù'si wowèe mkùu wɛɛ, a lor vi bcɛ̀' ce e ba co'ni nà a yar, a du a cu à nshè. E ka' cu, a laa nè wowèe enɛ̂, “Wà' wèe rìŋ yuu ce mɛ̀ gèe nè wèe na a? 13Wèe ce too mɛ̀ enɛ Ŋwɛ̀ Ryɛ'nì, a ker ce too mɛ̀ enɛ Tatâ. Wèe ce too yɛɛnì njobè' m yu wa'a. 14Àmbò mɛ̀ ce m yu Tatâ, a ker ba Ŋwɛ̀ Ryɛ'nì, mɛ̀ ka' su'si me mkùu, banɛ wèe ce su'si mkǔu bfʉr wee foŋ. 15Mɛ̀ gèe ca à rdùŋshi wèe tɛ wee wèe foŋ bo gèe àmbò mɛ̀ gèe na. 16M ce suŋ wèe nè mini-ŋwɛ̀ enɛ àde' ŋwɛ̀ rfà' caa yì masà ka'. Àbà ŋwɛ̀ ntuu caa ŋwɛ̀ ce e tuu ye ka'. 17Wèe à ka' riŋ buu ce mɛ̀ suŋ wèe na, ce gèe vi, banɛ wèe be koni bghònì. 18M ce làa ca ba àmbò wèe wɛɛwɛ ka'. M rìŋ bèe ce mɛ̀ ce. Geewa'a, yuu ce Ŋwǎ' Nyʉ̀ yi m làa yi be kù ghɛɛte àmbò a m saŋ enɛ̂, ‘Ŋwɛ̀ ce wèr ye à m ce ye byee àbee, à m kʉti yà ŋwɛ̀ bbàa.’ 19Mɛ̀ suŋ wèe buu ca sè'ni tɛ vi ka' koni, vi ka' lo koni tɛ wèe bo byemi enɛ m yu njɛ̀ɛ ŋwɛ̀ ce m yu. 20M ce suŋ wèe nè mini-ŋwɛ̀ enɛ ŋwɛ̀ ce e ka' koni yà ŋwɛ̀ ntuu, banɛ ŋgàŋ à koni mɛ̀. Ŋwɛ̀ ce e ka' koni mɛ̀, banɛ ŋgàŋ à koni ŋwɛ̀ ce e m tuu mɛ̀.”
21Jisòs à ka' làa blàa ca wɛɛ, mlù mi kɛ' a ce koo ye. E laa rara enɛ̂, “M ce suŋ wèe nè mini-ŋwɛ̀ enɛ ŋwɛ̀ mò' efa wěe mʉ be fyèni mɛ̀.” 22Ŋgǎa yɛ'ni yì buu a kɛ' a ce kè'ni nè mmir, a ce tarni ŋwɛ̀ ce Jisòs à m ce làa. 23Ŋwɛ̀ mò' efa wowèe ce Jisòs à m kòŋ se nà à m cu a kɛr nyor a yě geŋ. 24Saimʉn Pità à lap ye enɛ e bipshi nè Jisòs enɛ e ce làa ba àmbò nda lɛ. 25E yɛ'tì yi tu nje ŋgùŋ Jisòs, a bipshi nè ye enɛ̂, “Tatâ, ŋwɛ̀ anà yu nda?” 26Jisòs à beesì enɛ̂, “Yu ŋwɛ̀ ce m be bɛ' brɛ̌d cʉ̀' njep njàp fa nè ye.” E ka' làa wa'a, a bɛ' brɛ̌d a cʉ' njep njàp, a fa nè Judàs, muu Saimʉn Ìskarìyòt. 27E ka' ye, Satàn à niŋ njep yě ntee. Jisòs à laa nè ye enɛ̂, “Fa càasi nfè' ka', gèe yuu ce à ce kòŋ à rgèe nà cɛrcɛr.” 28Bèe ce a m ba mbo a m rìŋ mbùu ce Jisòs à m làa nè ye wa' ka'. 29Àmbò Judàs à m ba ŋwɛ̀ ce e m ce lɛ̀ yap mbàa nà, bèe mo' a ce kwà'shi yap enɛ Jisòs ce làa ba enɛ e du yuu buu ŋkà', kɛ̀ enɛ e du fa yuu nè ŋgǎa fùp. 30E ka' koo brɛ̌d ca a ku fʉʉ njepmbè. À m ba nètʉ'.
31E ka' fʉʉ, Jisòs à laa enɛ̂, “A kù'si Muu Ŋwɛ̀ sè'ni. A ku'si Nyʉ̀ njì enjep ye. 32A ka' ku'si Nyʉ̀ njì enjep ye, banɛ Nyʉ̀ be kù'si Muu njì enjep yě nyòr. E be gèe wa'a cɛrcɛr sê. 33Boo wâ, sèe be kù cu ba à nfè' mʉcàcàr. Wèe be ròo mɛ̀. Yi ku ba àmbò mɛ̀ m suŋ Jus enɛ̂, ‘Àde' wèe vʉ fàdì' ce m ce dù ka'’ nà. 34M ce fa wèe ncir ce fi enɛ wèe kòŋni. Wèe koŋni foŋ àmbò mɛ̀ m kòŋ wèe nà. 35Wèe à ka' koŋni wa'a, banɛ bèe wɛɛwɛ a be rìŋ enɛ wèe yu ŋgǎa yɛ'ni yà buu.”
36Saimʉn Pità à bipshì nè ye enɛ̂, “Tatâ, à ce dù ba fɛ?” Jisòs à beesì enɛ̂, “Àde' à du fàdì' ce m ce dù na sè'ni ka'. À be lò ka' vʉ̀ a mɛ̌ mbùu.” 37Pità à laa nè ye enɛ̂, “Tatâ, àde' m du fa wɛ̌ mbùu sè'ni ka' njokɛ? M be kwe njo' wɛ̀.” 38Jisòs à beesì enɛ̂, “Wɛnɛ à be kwe njo' mɛ̀ lɛ! M ce suŋ wɛ̀ nè mini-ŋwɛ̀ enɛ tɛ nduŋgʉp ka' toŋ, à be kani enɛ à rìŋ mɛ̀ ka' ŋkàrà' taar.
Currently Selected:
Ñwaè' Joân 13: LNT
Highlight
Share
Copy
Want to have your highlights saved across all your devices? Sign up or sign in
Limbum New Testament © Bible Society of Cameroon, 2003.