Ñwaè' Mfaè' Ñgaâa Ntuu Jisoès 7

1Ŋwɛ̀ ce e m ba tu nè ŋgǎa taŋshi taŋshì à bipshì nè Stɛfàn enɛ̂, “Yi yu wa' a?” 2Stɛfàn à beesì enɛ̂, “Bfʉr wa ba wa btâ, yu' nè yuu ce m be làa. Nyʉ̀ ce e yu ŋwɛ̀ fòo à m yɛɛti nè Abràham ce e m ba yèr ta à nfè' ce e m ba à ŋgǒŋ Mɛ̀sòpòtɛmìyà ka' nàtǐ àfo dù cu à rla' Hɛràn nà, 3a laa nè ye enɛ̂, ‘Lò efa wɛ̌ ŋgòŋ, fʉʉ efa mʉ̀ yò bèe, du à ŋgòŋ ce m be dùŋshi wɛ̀.’ 4E nàtǐ à ŋgǒŋ bèe Kaldìyà, a du a cu à rla' Hɛràn. Yì ta à ka' kwe, Nyʉ̀ à fʉr ye a vʉ àgho fàdì' ce wèe ce cu na. 5E m fa ye ŋgʉ̀' mò' efa ŋgòŋ ca kɛ̀ mʉ bɛbɛ' efa gho ka'. Geewa'a, e m ye lè' enɛ e be lò fa ŋgòŋ anà nè ye, ker ba boo vi, ka' à m ba mbe nfè' anà e tʉr muu ka' wa'a. 6Yuu ce Nyʉ̀ à m làa nè ye yi m ba enɛ yì ŋgʉ̀ be lò bkìlò, cu à ŋgǒŋ bèe mo' tɛ bèe anà a gee wowèe a kʉti bkwàa, jar nè wowèe à bfè' mjèe kyèe. 7Nyʉ̀ à ker laa foŋ enɛ̂, ‘M be sa', fa ŋgɛ' nè to' ce wowèe a ce fà' bkwàa nè wowèe nà. Mɛ̌ gèe wa' wɛɛ, tɛ wowèe a fʉʉ àfo, vʉ̀ loo nè mɛ̀ àfa na.’ 8Nyʉ̀ à m ye lè' ce ncòo efa gho à m ba bʉ̀ ce Abràham à m gèe nà. Yi ka' ba wa'a, Abràham à bi Aisìk, mnòŋ vi ka' ba waami, e gee ye bʉ̀. Aisìk à bi Jakòp, Jakòp à bi btu mntɛ̀' ncòp-baa-à-rrʉ̀ʉ. 9Btu mntɛ̀' ca a m ko'ndoŋ nè Josɛ̀f, a fyeni ye à to' Ijìp. Geewa'a Nyʉ̀ à m ba a ye, 10a ja' ye efa yì ŋgɛ' wɛɛwɛ, a gee Fɛrò ce e m ba ŋkʉʉ à to' Ijìp à tʉr ye à ntee bòŋboŋ, a gee e yɛɛtì ŋwɛ̀ bfee a yě bsii. Yi ka' ba wa'a, e gee ye à ŋwɛ̀ rsa' à to' Ijìp ker ba mbe yě ndàp.

11“Njè à m koo à ŋgǒŋ Ijìp wɛɛwɛ ba à ŋgǒŋ Kɛnàn foŋ, ŋgɛ' à ba sê, visèe bta a ke' tʉr yuu ye ka'. 12Jakòp à ka' yu' enɛ byee vi yu à to' Ijìp, e tuu visèe bta à nfè' entombì. 13Wowèe a ka' kʉti kèr dù à nfè' embenjì, Josɛ̀f à gee wowèe a riŋ ye, Fɛrò à lo a riŋ ndap Josɛ̀f. 14Josɛ̀f à tuu bèe enɛ a du vʉ̀ nè Jakòp ce à m ba yì tâ, ker ba bèe embe yě ndàp ce a m ba bèe ncòp-ta-à-mnsàambâ. 15Jakòp à m dù à to' Ijìp. E m kwe, visèe bta cà a kweŋgèr foŋ. 16Wowèe a ka' kweŋger, a lor wowèe a kʉti àgho à rla' Shɛkìm a tuŋ njep rshè ce Abràham à m yuu nè mbàa ese boo Hamòr.

17“Nfè' mkà'ni ce Nyʉ̀ à m kà' nè Abràham nà à ka' ce ghɛɛ, bèe ca a ku', a yaa à ŋgǒŋ Ijìp, 18caar ŋkʉʉ mò' ce e m rìŋ Josɛ̀f ka', à ko' kʉʉ à to' Ijìp. 19E m bo' yìsèe bèe, a jar nè visèe btâ, a gee wowèe a fʉr boo wap àwaŋ, tɛ a bo kweŋger. 20A m bi Musìs à nfè' ca, e ba mbòŋmboŋ se à bsii Nyʉ̀. E m kù' mbe ndàp yì ta à mŋwɛɛ btar. 21A ka' fʉr ye àwaŋ, muu Fɛrò ce à m ba muunje, à lor ye a du àgho, a ke' àgho àmbò muu yì. 22A m yɛ'ni Musìs bfee běe à ŋgǒŋ Ijìp wɛɛwɛ, e ba ŋwɛ̌ ŋgòr à vi blàa ker ba yi ŋgèe.

23“Musìs à ka' bà' bfè' mŋkyèe, a kwa'shi à rcà'ni bfʉr vi ce a m ba boo Isrɛ̀l. 24E ka' dù yɛ àmbò a ce fa ŋgɛ' nè mò' efa wowèe, e beenjì nfʉr yì, a lip ŋwɛ̌ Ijìp, e kwê. 25Musìs à m ce kwà'shi enɛ yì bèe a be rìŋ enɛ e yu ŋwɛ̀ ce Nyʉ̀ à tuu enɛ e fʉr wowèe efa ŋgɛ'. Geewa'a, wowèe a riŋ yap yu ka'. 26Tʉ̀' à ka' raa, e vʉ a yɛ àmbò bèe mo' efa wowèe a ce rè bkòr. E ghetèr enɛ e teni bkòr anà, a laa enɛ̂, ‘Bfʉr wâ, wèe yu bfʉr; mbùu njokɛ wèe ce rè bkòr?’ 27Ŋwɛ̀ ce e m kɛ̀' bkòr nà à doo ye, a laa enɛ̂, ‘Ŋwɛ̀ ce e gèe enɛ à ba mbe wěr ndù, sa' wèr, à gèe nda? 28Wɛ̌ kòŋ à ryʉ mɛ̀ àmbò wɛ̀ mʉ yʉ ŋwɛ̀ Ijìp nèŋkùr nà a?’ 29E ka' làa wa'a, Musìs à caŋ, a du a ba kìlò à to' Midìyɛ̀n, a cu àfo a bi boo a baa.

30“Bfè' vi ka' càa mŋkyèe, ncìndap Nyʉ̀ a nyɛɛ à rìŋ embe rtùu Sinài nje mʉ̀ mcùŋ mor ce mi m ce she mbe mʉ ce mo'. Musìs à yɛ̂. 31E ka' yɛ, a bɛɛŋger sê. E ka' ce ko'shi àtʉtʉ à rfyɛ', a yu' àmbò Tata à làa enɛ̂, 32‘A mɛ̀ Nyʉ̀ wee btâ. A mɛ̀ Nyʉ̀ Abràham ba Aisìk ba Jakòp.’ Musìs à m kàŋ sê, a wɛp à rfyɛ'. 33Tata à laa nè ye enɛ̂, ‘Co'ni blaba' njobè' mbe dì' à tɛɛ anà yu dǐ' rara. 34Mɛ̀ yɛ nè mini-ŋwɛ̀ àmbò a ce jar nè yà bèe à to' Ijìp, a yu' àmbò wowèe a ce war, a suu tɛ m bo fʉr wowèe efa ŋgɛ'. Banɛ à be tami nyor tɛ m tuu wɛ̀ à to' Ijìp.’

35“Musìs ca ce wowèe a m mɛŋni a laa enɛ̂, ‘Ŋwɛ̀ ce e gèe enɛ à ba mbe wěr ndù, sa' wèr à gèe nda’ nà, Nyʉ̀ à m tuu ye enɛ e ba ŋwɛ̀ rsa', ker ba ŋwɛ̀ nfʉr bèe efa ŋgɛ'. E m càasi ntuu nè ye mbe mmbo yì ncìndap ce e m nyɛɛ nje mʉ̀ mcùŋ mor mbe mʉ ce mo' nà. 36E m fʉr wowěe à to' Ijìp. E m gèe buu bghagha' ba buu bbɛ̀ɛ à to' Ijìp, ba àwǎa rdip rbeer, ker ba à rìŋ à bfè' mŋkyèe. 37Musìs ca a ŋwɛ̀ ce e m làa nè boo Isrɛ̀l enɛ̂, ‘Nyʉ̀ be fʉr ŋwɛ̀ ntuu nè wèe efa mʉ̀ bfʉr wee àmbò e m fʉr mɛ̀’ nà. 38A ye ce e m ba à mʉ̀ bèe Nyʉ̀ ce a m kaari à rìŋ, a ba a ncìndap Nyʉ̀ ce e m làa nè ye mbe rtùu Sinài, a ba a visèe bta foŋ. E m koo blǎa btèe tɛ e bo fa nè sèe. 39Visèe bta a m kòŋ à ryu'ni nè ye ka', a doori ye à geŋ, a kʉti à to' Ijìp enjep ntee. 40Wowèe a m làa nè Ɛròn enɛ̂, ‘Gèe mnyʉ̀ nè wèr tɛ vi bo kè'ni wèr dù àgho. À ka' ba àmbò Musìs ca ce e m fʉr wěr à to' Ijìp na, wèr rìŋ yuu ce yi koni ye ka'.’ 41Wowèe a kupshì mʉ muu nà' nè bco' à nfè' anà, a gee taŋshì nè yàp nyʉ̀ anà, a lu'shi nè yuu ce map mmbo mi m gèe.

42“Yi ka' ba wa'a, Nyʉ̀ à beesì yì njì nè wowèe, a ma'shi wowèe a ce cà'ni buu embe bùu àmbò a saŋ mbe ŋwǎ' ŋgǎa ntuu Nyʉ̀. A saŋ mbo enɛ̂,

‘Ndap Isrɛ̀l, wà' wèe à m shɛshi mnyàa

a gee taŋshì àgho ba nè mɛ̀ à bfè' mŋkyèe à rìŋ a?

Yi yu wa' ka'.

43Wèe à m byɛ̀' tǎp Molòk ba rkàŋsǐ Rɛfàn ce à m ba buu ce wèe à m gèe tɛ wèe bo cà'ni.

Banɛ m be fʉr wèe dù àgho càa à rla' Babilòn.’

44“Wer bta a m tʉr tàp ce yi ce dùŋshi enɛ Nyʉ̀ à ye lè' a yì bèe nà, à rìŋ. Yi m ku ba àmbò Nyʉ̀ à m làa nè Musìs enɛ e ba'rî, a duŋshi ye njɛ̀ɛ njì ce e ba'ri nà. 45Wer bta a m vʉ̀ àgho àfa à nfè' ce Joshùwà à m ba yap tu, wowèe a vʉ a so yap ŋgòŋ, Nyʉ̀ à juu bèe enje jɛɛ ce a m ba àfo a wǎp bsii nà. Yi m cu nè wowèe caar a ba' mbe nfè' yì Dɛvìd. 46E m tʉr bsii waŋ a Nyʉ̀, a loo enɛ Nyʉ̀ fa ye njì tɛ e ba'ri ndap nè Nyʉ̀ Jakòp. 47Geewa'a, ŋwɛ̀ ce e m bà'ri ndap nè ye à m ba Solomʉ̀n.

48“Ka' yi m ba wa'a, Nyʉ̀ embe bùu e ke cu ba mbe ndap ce a bà'ri nè mmbo ka'. Yi yu àmbò ŋwɛ̀ ncep ntuu Nyʉ̀ à m làa. E m làa enɛ̂,

Tata ce làa enɛ̂,

49‘Rbuu yu ya kàbàrà',

nshe à ba ya nta' ntɛr mkùu. Tata ce làa enɛ̂,

Njɛ̀ɛ ndap ce àde' wèe ba'rì nè mɛ̀ yu ba njɛ̀ɛ ndap kɛ?

Njɛ̀ɛ dì' ce àde' m lʉshì àfo, yo njɛ̀ɛ dì' kɛ?

50Àmbò buu ca wɛɛwɛ à gèe mɛ̀ nè ma mmbo a?’

51“Wèe ce wèe yu ŋgǎa ntèetu, a ba mbɛ̀'nsʉ̀r à mntee ker ba à btù', wěe ke kǔ rè bkòr wèe Yʉ' Rara wèe à nfè' wɛɛwɛ. Yuu ce wee bta a m gèe ku ba yuu ce wèe ce gèe. 52Ŋwɛ̀ ncep ntuu mò' ce wee bta a m buu efa rfa ŋgɛ' nè ye ka', yu yì efɛ? Wowèe a m yʉ bèe ce a m suŋ bèe tɛ nfè' ka' ghɛɛ, enɛ Ŋwɛ̌ Nyɛɛnì ce vʉ̀ nà. Yu ye ŋwɛ̌ Nyɛɛnì anà ce wèe à fyèni a ker yʉ. 53Bèe ce a m koni mncir ce Nyʉ̀ à m càasi mbe mmbo yì ncìndap na à m koni wèe. Geewa'a, wèe à lɛ̀ mncir anà ka'.”

54Wowèe a ka' yu', ntee yi bep wowèe sê, wowèe a kʉr msòŋ. 55Yʉ' Rara yi m ruusi Stɛfàn, e ke' mbe bùu a yɛ fǒo Nyʉ̀, a yɛ Jisòs àmbò e tɛɛ à rkoo mǎ' Nyʉ̀. 56E laa enɛ̂, “Yɛ nè, mɛ̀ yɛ àmbò rbuu li mʉ̀'ti, mɛ̀ yɛ Muu Ŋwɛ̀ àmbò e tɛɛ à rkoo mǎ' Nyʉ̀.” 57Wowèe a ka' yu' ca, a ghaa mbekì, a cete wap btù', a caŋ a gʉmi mbe yě ndù. 58Wowèe a m fʉr ye efa mʉ̀ rla' a tʉʉshi nè blùr. Bèe ce a m tɛɛ njìnsa' mbe kansùr nà a m lɛ̀ wap bcɛ̀' njeptii mbaŋrùŋwɛ̀ mò' ce a m ce too enɛ Sôl. 59Wowèe a ka' ce tʉʉshi Stɛfàn nè blùr, e loo a laa enɛ̂, “Tata Jisòs, koo la ryòŋ.” 60E m gʉ'shi nè mkʉʉshi, a waa mbekì enɛ̂, “Tatâ, fa lɛ̀ yuu bebep ca mbe wǎp ndù ka'.” E ka' làa wa'a, a kwe.

Currently Selected:

Ñwaè' Mfaè' Ñgaâa Ntuu Jisoès 7: LNT

Highlight

Copy

Compare