JESAYA 1
1
Tlhanogo ya setšhaba sa Modimo
1Pono ya Jesaya morwa wa Amotsi, ye a e bonego e era Juda le Jerusalema mehleng ya Usia le Jothama le Ahasi le Hiskia dikgoši tša Juda.
2Hee lena magodimo, kwang! Wena lefase, theetša! Gobane Morena o a bolela, o re: Ke fepile bana; ke ba godišitše, mme ba ntlhanogela. 3Kgomo e tseba morui wa yona, pokolo e tseba legopo la mong wa yona. Ge e le Isiraele, yena ga a tsebe; setšhaba sa ka ga se lemoge.
4Joo, setšhaba sa dibe! Setšhaba sa molato o mogolo! Peu ya basenyi! -- Ba lahla Morena, ba nyatša Mokgethwa wa Isiraele; ba boetše nthago! 5Le sa otlega kae, ge le fela le hlanoga? Hleng hlogo ka moka e šetše e gobetše, le pelo e hlokofetše yohle! 6Go tloga lwaong go fihla hlogong ga go mo go thabilego; e fo ba dintho le megogoma, le dintho tša bolehono di sešogo tša hlatswiwa mme tša tlemelelwa, tša thobiwa ka makhura.
7Naga ya lena ke ya marope, metse ya lena e swile ka mollo; mašemo a lena a lewa ke bašele lena le lebeletše; ke tšhwalalanyo wa mašegerepe a ba ntle. 8Lešalela ke ngwanenyana wa Tsione, o etša mokutwana serapeng sa morara, o etša mogophe wa tšhemong ya magapu, o etša motse wa go rakelelwa. 9Ge Morena wa mašaba a ka be a se re šiele mašalela a sego nene, re ka be re etša Sodoma, re ka be re dirilwe tša Gomora.
10Kwang lentšu la Morena, lena bakgoma ba Sodoma! Molao wa Morena o o kwele ruri, wena setšhaba sa Gomora! 11Ke bjang boati bja didimo tša lena? Morena o re: Ke bile ke tennwe ke dihlabelo tša dikgapana tša lena, le tša makhura, le tše nonnego. Ga ke kgahlwe ke madi a dipowana le a nku le a phoko. 12Ge le tla go bonala pele ga ka, ke mang e a le biditšego a re le di tliše, la tla la gatakanya malapa a ka? 13Le se ke la hlwa le tliša dibego tša lefela; orelo tša lena ke bona e le tša makgapha; le menyanya ya lena ya kgwedi ge e dula, le disabatha, le diphuthego. Ga ke sa kgona go bona bobe bo hlakane le dithapelo. 14Matšatši a lena a kgwedi ge e dula, le menyanya ya lena, ke di hloile, di a nkimela, mme di ntapišitše.
15Ge le emiša, matsogo le mpitša, ke tla le gerula; le ge le ka atiša dithapelo, nka se ke ka le kwa; diatla tša lena di tletše madi. 16Hlapang, le tšwe ditšhila; mediro ya lena e mebe le e tloše pele gaka, bobe le bo lahle. 17Ithuteng go dira tše di botse; nyakang moahlolelo wa go loka, le hlakodiše ba hlakago, le namolele dišuana; bahlologadi le ba lwele.
18Tlang ge, re sekišaneng! -- Go bolela Morena. -- Le ge dibe tša lena di hubetše bo-ka madi, di tlo šweufala wa leswela; le ge di hubetše wa letsoku, di tlo etša boya bja dinku. 19Ge le rata, ge le ka kwa, le tlo ja menono ya lefase. 20Fela, ge le gana, ge le nganga, le tlo lewa ke lerumo. Ruri, molomo wa Morena o boletše.
21Joo, motse wo o bego o botega, bjalo ke seotswa! E be e le wa mekgwa e botse, go agile toko mo go wona, mme bjalo ke wa babolai. 22Tshipitshehla ya wona bjale ke manyedi; dinwewa tša gona di tšhetšwe meetse. 23Bagolo ba gago ke bahlanogi, ba sepela le mahodu; bohle ba rata bofora; ba lebeletše tsogolekobong; ga ba ahlolele sešuana; mme taba ya mohlologadi ga e fihle mo go bona.
24Bjale go bolela yena Mong a bohle Morena wa mašaba Ramaatla wa Isiraele, o re: Agaa! Ke tlo thuba pelo ka go otla ba ntlhoyago, ka itefeletša go manaba a ka. 25Tsogo la ka le tlo lwa le wena; manyedi a gago ke tlo a bušetša meubeng, ka ntšha morodu ka moka go wena. 26Ke tlo buša ke go nea baahlodi bjalo ka mohlamonene. Ke mo o tlogo thwe motse wa toko, legae la ruri.
27Tsione go tlo lopollwa ka go ya ka molao; ba ba boetšego gona ba tlo lopollwa ka toko. 28Bahlanogi bona, le ba dibe, ba tlo pšhatlaganywa bohle, gwa tlo fedišwa bahlala Morena.
29Ba tlo lewa ke dihlong ka baka la merula ye le bego le e kganyoga; le tlo šegama ka baka la mašemo a le bego le ithlaolela. 30Gobane le tlo swana le morula wo o omilego matlakala, le tšhemo ye e se nago monola. 31Wa lehumagadi o tlo etša letlala la matlakala, mme modiro wa lona o tlo etša hlasana ya mollo, a tlo swa ga mmogo le tša gagwe, gwa hlokwa wa go tima mollo.
Currently Selected:
JESAYA 1: NSO51
Highlight
Share
Copy
Want to have your highlights saved across all your devices? Sign up or sign in
© Bible Society of South Africa 1986. Used with permission. All rights reserved.