MMOLEDI 1
1
Tša lefase ka moka ke lefela
1Šedi dipolelo tša Mmoledi morwa wa Dafida kgoši ya Jerusalema.
2Joo lefela la mafela! Joo lefela la mafela! Tšohle ke lefela! O realo Mmoledi. 3Motho naa o holegang ka ditapišo tšohle, tše a itapišago ka tšona fa tlase ga letšatši. 4Moloko ge o ile, go tla o mongwe; lefase lona le dula le le gona. 5Letšatši le a hlaba, la ya la dikela, la boela felo ga lona, la hlaganela mo le tlogo hlaba gona. 6Phefo e ya borwa, e tla boela leboa; e a ya, e a boa, e boela mo e tšwago -- 7Tšohle dinoka di ya lewatleng, mme lewatle ga le tlale. Dinoka mo di yago, ke mo di tlogo fela di leba gona. 8Dilo tšohle di a itapiša; motho o šitwa go di bolela. Leihlo ga le hore go di bona, le tsebe ga e tlale ka go di kwa. 9Tše di kilego tša ba gona, di tlo buša di eba gona. Se se ilego sa direga se tlo buša se direga. Ga go na selo se sefsa, le setee, fa tlase ga letšatši. 10Le ge go ka thwe: Bonang se sefsa sese! Se kile sa ba gona kgale, re sešo ra ba gona. 11Tša bogologolo di hloka wa go di tseba; le tše di tlago di tlo ba tša hlkoka e a tlogo di gopola mo go bao ba mehla yeo e tlogo tla.
12Nna Mmoledi ke be ke le kgoši ya Isiraeli motseng wa Jerusalema. 13Ka neela pelo ya ka gore tšohle tše di diregago fa tlase ga legodimo ke di latišiše, ke di hlathe ka bohlale.
Ke wona modiro o mothata wo Modimo a o gafetšego bana ba batho gore ba itapiše ka wona. 14Ke bone ditiro tše dirwago fa tlase ga letšatši. Gomme šedio! Ke lefela tšohle; ke go phuthela moya ka kobo. 15Tše kgopo ga di lokišege; tše di sego gona ga di kgone go balwa.
16Ka bolela le pelo ya ka ka re: Ke nna ke godišitšego bohlale, ka bo atiša go fetiša bohle ba kilego ba buša fa Jerusalema pele ga ka; mme pelo ya ka e bone tše ntši tša bohlale le tsebo. 17Mme ya re ge ke neetše pelo ya ka go ka lemoga bohlale le tsebo, le botlatla le bošilo, ka hwetša le gona e le go phuthela phefo ka kobo. 18Gobane mo bohlale bo atago, go ata le masetlapelo; e a kgobelago tsebo o kgobela le dipelaelo.
Currently Selected:
MMOLEDI 1: NSO51
Highlight
Share
Copy
Want to have your highlights saved across all your devices? Sign up or sign in
© Bible Society of South Africa 1986. Used with permission. All rights reserved.