TITO 3
3
Bophelo bja ba ba kolobeditšwego. Ditaelo
1Ba eletše gore e be ba go bušwa ke marena le mmušo, e be batho ba ba kwago, le ba ba itokišeditšego go dira tše botse tšohle. 2Ba se be le maroga, e se be ba dintwa; e be ba botho; batho bohle ba ba bone e le ba bonolo bjo bo tletšego. 3Gobane le rena kgale re be re le mašilo, re le batho ba ba sa kwego, re timetše re gogwa ke dikganyogo le mathabo a mehutahuta, re keka le bobe le mona, re le ba go hloiwa le gona re hloyane. 4Gwa tla gwa bonala lerato la Modimo Mophološi wa rena, lerato la go rata batho. 5A tla a re phološa, e se ka baka le mediro ya rena ya toko. O re phološitše ka kgaugelo ya gagwe ka tlhatšo ya go tswalwa la bobedi, le ka mpshafatšo ya ka Moya o mokgethwa, 6wo a o tšhetšego godimo ga rena wa go re humiša ka Jesu Kriste Mophološi wa rena; 7gore ge re lokafaditšwe ka kgaugelo ya gagwe, re tle re be baji ba bohwa bja bophelo bjo bo sa felego ka kholofelo.
8Taba ye e tiile; gomme ke rata gore o tiiše thuto ya yona, gore ba ba dumetšego Modimo ba phegelele mediro e botse. Ke bjona botse bjoo, le go hola batho. 9Ge e le diphetolano tša bošilo, le go hlatlamanya meloko, le dikgang, le diphapang ka baka la Molao, di fularele; ga di hole selo; ke tša lefela. 10Motho wa thuto ye e arogilego, ge a eleditšwe gatee le gabedi, o mo tlogele. 11Motho yo bjale o hlanogile a tseba se a se dirago; gomme o senya a ipona molato yena mong.
12E tlo re ge ke roma Aretema a tla go wena, le ge e le Tigiko, o se ke wa diega go tla go nna Nikopoli; gobane ge ke nagana ke re marega ke tlo dula gona. 13Tsenase moruti wa Molao, le Apollo, o ba thuše gabotse ka mefago, gore ba se ke ba hloka selo. 14Le ba gešo a ba tlwaele go phegelela mediro e botse, go thuša mo go sa ratego ge go hlaela; gore ba se tlo etša sehlare se se se nago dienywa.
15Bohle ba ba nago le nna ba a go dumediša. Dumediša ba ba re ratago e le ba tumelo.
-- Kgaugelo a e be le lena ka moka. Amene.
Currently Selected:
TITO 3: NSO51
Highlight
Share
Copy
Want to have your highlights saved across all your devices? Sign up or sign in
© Bible Society of South Africa 1986. Used with permission. All rights reserved.