BAFILIPI 2
2
Kwano; go ikgafa boka Kriste; tša Timotheo le Epaforodito
1Ge go sa na le keletšo ka Kriste, le ge e le kgothatšo ya lerato, le ge e le go kwana ka Moya, le ge e le pelonolo le kgaugelo, 2gona tlatšang lethabo laka, le be ba ba kwanago kgopolong le leratong le pelong le menaganong. 3Le se ke la dira selo ka kgang le ka go nyaka go retwa. Sa lena a e be go ipoetša le go phalana go godišaneng. 4Motho a se ke a šetša tša go ikhola; a a šetše tša go hola ba bangwe. 5Kgopolo ye e swanetšego go ba mo go lena, ke yeo e bego e le go Kriste Jesu. 6Eo, a le ka lebopo le Modimo a lego ka lona, a se re: go swana le Modimo go mo ana hlogo. 7A upša a itlhakola, a tšea lebopo la mohlanka, a ba e a swanago le batho, a hwetšwa e le motho ka sebele, 8a ikokobetša a ba e a kwago le go iša lehung, lehung la sefapanong. 9Ke ka baka leo Modimo a mo godišitšego gagolo, a mo setša ka Leina le le fetago maina ohla, 10gore Leineng la Jesu go khuname matolo ohle a ba lego kua legodimong le mo lefaseng le ka tlase ga lefase; 11maleme ohle a dumele a re: Jesu Kriste ke yena Morena, mme ya tlo ba go reta Modimo Tatagwe.
12Ke gona, Baratwa ba ka, ge ka mehla le bile ba ba kwago, e se mola ke na le lena fela. Le le ba ba kwago gagolo bjale ke le kgole le lena; phološo ya lena e phegeleleng ka poifo le ka tšhogo. 13Gobane Modimo ke yena a dirago tšohle mo go lena, ke yena a le dirišago se se mo kgahlago.
14Dirang tšohle go se na go duma-duma le go belaela. 15Gore le be ba ba se nago bosodi le lengalatsepa, le be bana ba Modimo ba ba se nago senyalo le le gare ga bakgopo le bahlanogi ba mehla yeno, bao -- Le le mo gare ga bona -- Le kago bonega bjalo ka dietša lefaseng, 16ge le gomarela Lentšu la bophelo, gore ka tšatši la Kriste ke kgone go tumišega ka go thwe ga nka ka kitimela lefela, ga nka ka itapišetša lefela.
17Gomme le ge madi a ka a ka tšhollwa ka etša sedimo ke direla tumelo ya lena, moo ke a thaba, ke thaba le lena bohle. 18Bjale le lena thabang, le thabe le nna.
19Ka go tseba Morena Jesu ke holofela gore ke tlo tloga ke roma Timotheo a tla go lena, gore le nna ke we pelo ge ke ekwa ka mo go dutšego le lena ka gona. 20Gobane ga ke na yo mongwe yo pelo ya gagwe e kwanago le ya ka, e a kago etša yena Timotheo ka go hlokomela ditaba tša lena ka pelo.
21Gobane batho ka moka ba inyakela tša bona; ga ba nyake tša Kriste Jesu. 22Ge e le yena Timotheo ke mo tseba go botega, gobane mola re le modirong wa Ebangedi, o be a etša ngwana ge a dirišana le tatagwe. 23Ke yena yo ke holofetšego go mo roma ka pela ge ke bona ka mo ditaba tša ka di yago ka gona. 24Se ke se holofetšego ka Morena, ke gore le nna nka se diege go tla go lena.
25Ke hweditše ge go swanetše ge ke le romela Epaforodito, e lego ngwanešo le modiriši wa ka le mohlabani, e lego motseta wa lena wa go tla a ntirela mo ke bego ke hloka. 26O le hlologetšwe lena ka moka; se se mmelaetšago ke ge le kwele gore o a babja. 27Ka kgonthe o be a babja, a le kgauswi le go hwa: Modimo a mo gaugela; ya ba go gaugela nna, gore manyami a ka a se tlo tlala ka a mangwe gape. 28Bjale ke akgofile ka mo roma, gore le thabe ge le buša le mmona; mme nna nyamo ya ka ya fokotšega. 29Mo amogeleng Moreneng ka lethabo le le tletšego; gomme banna ba ba bjalo le ba godiše.
30Gobane ge a batametše lehu, e be e le ka baka la modiro wa Kriste ge a sa re selo ka bophelo bja gagwe, a ntirela ka tše lena le šitilwego go mpabalela ka tšona.
Currently Selected:
BAFILIPI 2: NSO51
Highlight
Share
Copy
Want to have your highlights saved across all your devices? Sign up or sign in
© Bible Society of South Africa 1986. Used with permission. All rights reserved.