JONA 3
3
Ba Ninife ba a sokologa
1Lentšu la Morena la tlela Jona la bobedi la re: 2Tsoga o ye motseng o mogolo wa Ninife, o ba goelele taba ye ke tlogo go botša yona. 3Jona a tsoga a ya Ninife, a dira se Morena a mo laetšego sona. Gomme Ninife e be e le motse o mogolo wa Modimo, o sepelwago ka matšatši a mararo. 4Gomme Jona a thoma go thetha le motse, a sepela letšatši le tee, a goelela a re: Go sa šetše matšatši a masome a mane; ke mo motse wa Ninife o tlogo ribegetšwa!
5Batho ba Ninife ba dumela Modimo, ba goelela gore go ikonwe dijo, go aparwe mankgeretla, ba bagolo le banyane.
6Kgoši ya Ninife, ge lentšu leo le fihla go yona, ya tsoga sedulong sa bogoši, ya apola tša bogoši ya apara mankgeretla, ya yo dula meloreng. 7Ya re motseng wa Ninife go goelelwe go thwe: Kgoši le matona a gagwe ba laela ba re: Batho ba se ke ba ja selo, le ge e le eng; le diruiwa, dikgomo le dihuswa di se ke tša fula, di se ke tša nwa meetse. 8Ba apare mankgeretla, batho le diruo; ba boe bohle, ba lahle ditsela tše mpe tša bona, ba lahle bošoro bja diatla tša bona. 9Mohlomongwe Modimo a ka thiša a boa, a gomiša bogale bja gagwe, ra se ke ra senyega.
10Modimo ge a bona se ba se dirago, ge ba lahla ditsela tše mpe tša bona, a thiša a lesa go tliša kotsi, ye a e boletšego a era bona; ya se ke ya direga.
Currently Selected:
JONA 3: NSO51
Highlight
Share
Copy
Want to have your highlights saved across all your devices? Sign up or sign in
© Bible Society of South Africa 1986. Used with permission. All rights reserved.