JONA 1
1
Jona o rongwa ke Modimo, mme a tšhaba
1Lentšu la Morena le kile la tlela Jona morwa wa Amithai, la re: 2Tsoga, o ye kua motseng o mogolo wa Ninife, o yo goelele o re: Dibe tša wona di fihlile pele ga ka. 3Jona a tsoga a tšhaba a leba Tarasisi a tšhaba Morena; a fologela motseng wa Jafo, a hwetša leselawatle le le yago Tarasisi; a ntšha tšhelete ya leeto, a namela leselawatle, a re ke ya Tarasisi le batho ba lona, e le go tšhaba Morena. 4Morena a iša phefo e kgolo lewatleng; mo lewatleng ya ba ledimo le maatla, leselawatle la nyako robega. 5Basepediši ba lona ba boifa; bohle ba hlaboša mantšu ba bitša medimo ya bona, e mongwe a bitša wa gagwe modimo. Diphahlo tša leselawatle ba di lahlela lewatleng, e le go le imolla gore le se teke. Ge e le Jona, yena o be a fologetše phapošing ya tlase ya leselawatle, a ile le boroko.
6Gwa tla molaodi wa leselawatle, a bolela le yena a re: O reng o robetše? Tsoga o bitše Modimo wa gago. Mohlomong ke yena Modimo e a tlogo re gopola ra se ke ra senyega.
7Banna ba botšana ba re: Tlang re lemeng ka matengwa, re tle re hwetše e a re hloletšego kotsi ye! Ba dira matengwa, gwa swarwa Jona. 8Ba botšiša Jona ba re: Re botše tše di re hlolelago tlalelo ye! Modiro wa gago ke eng? O tšwa kae? Ga geno ke kae? O wa setšaba se fe?
9Yena a fetola a re: Nna ke Mohebere; nna ke boifa Jehofa Modimo wa magodimong e a dirilego lewatle le lefase. 10Banna bao ba tšhoga, ba boifa gagolo; ba mmotšiša ba re: Tše o di dirilego ke eng? Ka gobane ba be ba tseba ge a tšhabile Morena, a ba boditše. 11Ba mmotšiša ba re: Re go direng gore lewatle le re okobalele? Ka gobane lewatle le be le sa fela le befa le eya.
12Jona a re: Nkukeng le ntahlele lewatleng, ke mo le tlogo le okobalela, gobane ke tseba ge ledimo le legolo le le le tletše ka molato wa ka.
13Le ge go le bjalo banna bao ba diriša mahuduo a leselawatle gore ba le bušetše nageng, gobane lewatle le be le sa fela le befa le eya. 14Ke mo ba nago ba hlaboša mantšu ba rapela Morena ba re: Joo! Morena, joo! A nke re se senyege ka bophelo bja monna yo! Mme madi a se nago molato o se a latiše go rena; ka gobane wena Morena o dira se o se ratago. 15Ya ba gona ba kukago Jona, ba mo lahlela lewatleng; mme la napa la okobala la lesa go galefa. 16Bjale banna bao ba boifa Morena gagolo, ba mo hlabela sedimo, ba mo enela dikeno.
17Ge e le Jona, Morena o romile hlapi e kgolo ya mo metša. Jona a fetša matšatši a mararo le mašego a mararo a le mpeng ya hlapi yeo.
Currently Selected:
JONA 1: NSO51
Highlight
Share
Copy
Want to have your highlights saved across all your devices? Sign up or sign in
© Bible Society of South Africa 1986. Used with permission. All rights reserved.