JEREMIA 4
4
Tshokologo e a hlokwa; dikotlo di a tla
1Hee Isiraele! Morena o re ge o boa, o boele go nna. Wa tloša tšhila tšago, ke se sa di bona, gona o ka se rakwe. 2Ge o ena ka Morena, ya ba keno ya therešo e yago ka molao le ka toko, gona bantle ba tlo itheta ka yena, ba itšhegofatša ka yena.
3Gobane Morena o ra banna ba Juda le Jerusalema ge a re: Kgathang mokgatho o mofsa; le se hlwe le bjala mo go lego meetlwa. 4Bollelang Morena, le tloše bošoboro bja dipelo tša lena, lena banna ba Juda le ba Jerusalema; kgalefo ya ka e se tlo le wela boka mollo, wa tuka wa hloka motimi, molato e le bobe bja mediro ya lena.
5Goelelang nageng ya Juda le fa Jerusalema le re: Letšang diphalafala mo nageng! Hlabang mokgoši le re: Kgobokanang re tšhabeleng dibong! 6Tsemang sefoka go iwe Tsione! Tšhabang, le se ke la ema! Gobane ke tliša bošula bo tšwago thoko ya leboa, le tshenyo e kgolo. 7Tau e tšwile sekgweng; o nanogile mofediši wa ditšhaba; o tšwile gagabo gore naga ya geno a e dire ya marope, metse ya geno a e phušole, go se hlwe go dula motho. 8Bjale aparang mankgeretla; llang le gololeng, gobane mollo wa bogale bja Morena ga o ešo wa re gomela.
9Mohla woo, Morena, o re, go tlo nolega pelo tša dikgoši le ditona; baperisita ba tlo gakanega, le baporofeta ba tlo tlabega.
10Mme nna ka re: Joo, Morena Mong a rena! Hleng setšhaba se o se gakišitše ruri ka ge gwa thwe: Le tlo ba le molao! Mme bjale rumo le ba hlaba go fihla ka pelong.
11Mehleng yeo ge go tlo bolelwa tšhaba se le motse wa Jerusalema, go tlo thwe: Dimo le fišago mo dirwaolong šokeng le tsogetše ngwanenyana wa sethšaba sa ka; ga se moya wa go lootša le wa go fefera; 12Ga se moya wa go dira tšeo; o tšwa go nna. Bjalo ke nna ke bolelago, ke ba sekišago.
13Soolee! O rotoga boka maru! Makoloi agwe a ka disesedi; dipitsi tša gagwe di lebelo wa manong. Joo, re a thubja!
14Hlapa pelo bobe, o phološwe, wene Jerusalema. Dikelelo tše mpe tša gago, o tlo lesa neng go dula o na natšo mo pelong?
15Theetša, foko le tšwa Dani, go kwala mabošula a thabeng tša Efuraimi. 16Sebelang ditšhaba, le re fa Jerusalema go sebiwa barakeledi ba ba tšwago kua nageng ya kgole; metse ya Juda e hlabelwa mokgoši. 17Ba tlo etša baleti ba mašemo ge ba rakelela motse wa Jerusalema ka gobane o ntlhanogetše. O realo Morena.
18Ke tsela tša gago, le tiro tša gago di go hloletšego tšeo. Ge di go baba, di go hlaba mo pelong ya gago, molato ke bobe bja gago. 19Joo, mala a ka! Mala a ka, joo! Ke a šonopega! Ke hlokoga ka pelong! Pelo ya ka e a bopa, e šitwa go homola! Ke ka gobane wene pelo ya ka o kwa ge go lla phalafala, o kwa mašata a tlhabano. 20Go goelelwa tša mašegerepe fela, gobane naga yohle e thosane; ke tšhoga mekutwana ya ka e thubiwa, go se sa ne madulo. 21Di tlo feletša kae, ge ke hlwa ke bona difoka, ke ekwa moletšo wa diphalafala? 22Gobane setšhaba sa gešo ke sa mašilo, ga se ntsebe; ke bana ba ditlatla, ba ba hlokago temogo. Ba hlalefetše bošaedi; go dira tše botse ga ba go tsebe. 23Ge ke bona naga, še e gobelane, ga e sa ne selo; ge ke lelalela kua legodimong, ke hwetša seetša sona se ile. 24Ge ke bona dithaba, šedi di a šišinyega, mme meboto yohle e a roromela. 25Ke a bona; ke hwetša go se motho; le nonyana tšohle tša mo sebakeng di tšhabile. 26Ke a bona; mašemo šea ke mašoka; metse ka moka ya gona e phušoga pele ga Morena, ge go fihla mollo wa kgalefo yagwe.
27Gobane Morena o re: Naga yohle e tlo ba lešope; fela, nka se e senyetše ruri. 28Ke ka baka leo naga e llago; le legodimo kua tletlolo le apere boso, ka gobane ke boletše, ke rerile, nka se thiše, nka se lese go di dira. 29Metse yohle e falala ge e kwa mekgoši ya ba dipitsi, le ya babetši ba mesebe; ba tšhabela masoding, ba namela maswikeng; metse yohle e falaletše, ga e sa dula motho. 30Mme wene Mothubiwa, o tlo dira eng? Le ge o ka apara moretele, wa tšhepha ka matsaka a tshipi e khwibidu, wa tlola mahlo ka ditlolo, go itlhopha ke lefela. Bakwelemi bala ba gago o ba tenne; se ba se nyakago ke go go bolaya. 31Gobane ke kwa lentšu le e kego ke la mmelegi, la ge go tlaletšwe e a itšibolago; ke mokgoši wa ngwanana wa Tsione; o a fegelwa, o otlolla matsogo a gagwe, o re: Joo nna joo! Bophelo bja ka bo feletše ka dinokwane.
Currently Selected:
JEREMIA 4: NSO51
Highlight
Share
Copy
Want to have your highlights saved across all your devices? Sign up or sign in
© Bible Society of South Africa 1986. Used with permission. All rights reserved.