JEREMIA 2
2
Bonganga bja setšhaba sa Isiraele
1Lentšu la Morena le ntletše la re: 2Sepela o yo goeletša ditsebeng tša Jerusalema, o re: Ke sa elelwa mabobo a mola o le ngwana, lerato la mola o le mmeeletšwa la mola o ntšhala morago šokeng, kua nageng e sa lengwego. 3Isiraele ke mokgethwa wa Morena, thakangwaga ya maruo agwe. Mang le mang e a mo jago, o oba molato, o welwa ke bošula. O realo Morena.
4Hee lena ba leloko la Jakobo, ba dilete tšohle tša moloko wa Isiraele, kwang se Morena a se bolelago. 5Morena o re: Botataweno ba hweditše bošaedi bofe go nna, ge ba kgaogana le nna, ba yo nkema kgole, ba latela tša lefela, le bona ba ba ba lefela? 6Ba se ke ba hlwa ba re: Morena o kae? Yena wa go re ntšha kua Egipita, Morehlahlašokeng, nageng ya lehanata, ya mangope, ya lenyora, ya thiti ya lehu, nageng ye e sa sepelego motho, mo go sa dulego batho?
7Ka le fihliša nageng yeno ya mašemo, la ja dienywa tša yona le menono ya yona. Mme lena, mola le sa fihla, la senya naga ya ka; magae a ka la a dira a makgapha. 8Baperisita ga ba ka ba re: Morena o kae? Balotodi ba molao ba se tsebe nna; badiši ba ntlhanogela; baporofeta ba yo porofeta ka Baali, ba latela tše di sa holego selo. 9Molato ke wona woo, ge ke lwa le lena. O realo Morena. Le bana ba lena ke tlo lwa le bona. 10Ge le ka selela kua Khithima dihlakehlakeng, la bona, ge le ka roma ba go ya Kedara, la eleletša ruri, le tlo bona ge dilo di etšago tše, di sa ka tša ba gona. 11A go na le setšhaba se kilego sa bapatša medimo ya sona le ge e se medimodimo? Ge e le setšhaba sa ka sona se bapaditše bogolo bja sona, sa reka tše di sa holego selo. 12Hee lena magodimo! Rekologang ka dilo tše! Le di tšhoge, le tlabege ka tšona! O realo Morena. 13Gobane setšhaba sa ka se dirile masenyi a mabedi: Ba lahlile nna sediba sa meetse a phelago, ba fata tša bona didiba, didiba tša go gopa, di se nago meetse. 14A fa Isiraele ke molata? A o tswaletšwe bohlanka? Ke ka baka lang ge a thopilwe? 15O bopelwa ke ditau; di hlaba mokgoši; naga ya gagwe di e dirile lehanata, di fišitše metse ya gagwe; ga e sa ne baagi. 16Le ba kua Nofe, le ba Thagapanese ba dira meriri ya gago mafulo. 17A ga se tšona tše o itlholetšego tšona go lahla Morena Modimo wa gago mola a go hlahla tseleng? 18Bjale o dirwa ke eng ge o ya Egipita go yo nwa meetse a noka ya Nile? O dirwa ke eng ge o ya kua Asuri go yo nwa meetse a Forate?
19O otlwa ke bobe bja gago, o hlokofatšwa ke tlhanogo tšago, o tlo ba wa tseba wa bona e le bobe, e le bošula go lahla Morena Modimo wa gago, o sa mmoife. O realo mong a bohle Morena wa mašaba. 20Gobane ke kgale o robile joko yago, o kgaotše tlemo tša gago, o fela o re: Nna ga ke mohlanka! Wa ya kua mebotong e phagamilego, dihlareng tše tala mme wa ba seotswa; 21Mola nna ke go šemile o le morarasešifa, wa yona peu ya makgonthe. O mphetogetše ka mokgwa ofe morara wa dithabe tša wa naga? 22Ka kgonthe, le ge o ka hlapa wa ikgohla ka lešabašaba le morora o montši, masenyi a gago ke tla fela ke a bona e le tšhila. O realo Morena. 23O bolela bjang ge o re: Ga ka tšhilafala! Ga ka latela boBaali! Napo lote mehlala ya go ya meeding, o elelwe tše o di dirilego, wene sethole sa kamela sa go sepeleša, sa ditsela tša manyokenyoke. 24O pitsi ye e tlwaetšego lešoka, e letšago dinko e kganyoga; ke mang a kago e thibela, ge e ya mo e go ratago? Ba ba e tsomago ga ba itapiše; ba e hwetša ka kgwedi ya yona. 25Lesa go onatša dieta tša gago; lesa go hwa ka lenyora. Fela, wena o re: Nang, ke a gana! O re: Ke rata ba mathoko: ke letela bona.
26E tlo ba dihlong tša hodu ge le swerwe. A ba lewe ke dihlong, ba moloko wa Isiraele, bona le dikgoši tša bona, le ditona tša bona, le baperisita ba bona, le baporofeta ba bona, 27Ba ba rago kwata ba re: O tatawešo! Ba ra leswika ba re: O re tswetše! Mme nna ba mphuralela ba nkgerula; ge e se mohla wa kotsi, ke mo ba rego: Tsoga, o re namolele!
28E kae medimo ya gago ye o itiretšego yona? A go tsoge yona e go namolele mohla o wetšwe ke kotsi. Gobane wene Juda, medimo ya gago e atile boka metse ya gago. 29Le reng le elwa le nna? Ka moka le ntlhanogetše O realo Morena. 30E be e le lefela ge ke otla bana ba lena; ba ganne go ka eletšega; mme lerumo la lena le lle baporofeta boka tau ye e jago batho. 31Le moloko mang? šetšang tše Morena a di boletšego. A nkile ka fetogela Isiraele lešoka, goba naga ya leswiswi? Bjale ke go reng ge setšhaba sa ka se re: Ga re tlengwe; ga re sa tla go wene? 32A mosetsana a ka ba a lebala dipheta tša gagwe? A monyalwa a ka lesa go itšhepa? -- Ge e le sešhaba sa ka se ntebetše mehla e sa balwego. 33Ge e le tsela yago ge o yo nyaka tša lerato, yona o a e thakga; ke tšona tše o tlwaetšego mabohlola ka tšona mo tseleng tša gago. 34Ke gona merumong ya aparo tšago go bonalago madi a babotla ba ba se nago molato, ba ba sa kago ba phula ngwako wa motho.
35Le ge go le bjalo, o re: Ga ke ne molato; hleng pefelo yagwe e nkgometše! O tsebe gore, ke tlo go sekiša lona lentšu leo, ge o re: Ga ka dira sebe! 36O reng o hlaganela o garima, o lahla tsela ye, wa swara yela? Le Baegipita ba tlo go leša hlong, boka Baasuri ge ba go lešitše hlong. 37Le gona moo o tlo boa o ithwele megono, gobane bona bao o ba botilego, Morena o ba lahlile; ba ka se go kgoniše selo.
Currently Selected:
JEREMIA 2: NSO51
Highlight
Share
Copy
Want to have your highlights saved across all your devices? Sign up or sign in
© Bible Society of South Africa 1986. Used with permission. All rights reserved.