BAAHLODI 2
2
Motseta wa Morena o tla Bokima. Tlhanogo le Tshokologo
1Motseta wa Morena a rotogela Bokime a etšwa Giligala, a re: Ke le rotošitše le etšwa Egipita, ka le fihliša fa nageng ya ke e enetšego botataweno, ka re: Kgwerano ye ke e dirilego le botataweno nka se ke ka e hlanoša le neng le neng. 2Ka re le se ke la gwerana le beng ba naga ye; ka re le phušuleng dialetare tša bona. Gomme lena ga le hlokomele se ke se boletšego. Le reng le dira ka mokgwa woo? 3Le gona ke le boditše ka re: Nka se ke ka ba raka ge le fihla; mme ba tlo ba meetlwa ya go le hlaba, mme medimo ya bona e tlo ba mereo ya go le tanya. 4Ya re ge Motseta wa Morena a boditše Baisiraele mantšu ao ka moka, setšhaba sa hlaboša mantšu sa lla. 5Felo fao ba go rea leina la Bokime (Baleding), ba tlišetša Morena didimo.
6Ya re ge Joshua a laelane le setšhaba sa ikela, Baisiraele bohle ba ya go aga mo nageng ya magae a bona. 7Mehleng yohle ya ge Joshua a sa phela, setšhaba se be se direla Morena, le mehleng yohle ya ge go sa phela bagolo bao ba ba phetšego galelele mehleng ya ge Joshua a šetše a ile; bona bao ba ba bonego ditiro tše kgolo tše Morena a di diretšego Isiraele. 8Joshua morwa wa Nuni mohlanka wa Morena o hwile a na le nywaga e lekgolo le le nago le lesome. 9Ba mmolokile mo nageng ya gagwe kua Thiminathe-Sera, dithabeng tša Efuraimi, mo thaba ya Gaase e lebago thoko ya leboa. 10Gwa ba gwa hwa le ba thaka yeo ka moka, ba gorošetšwa go botatabo; gwa rotoga thaka e šele ya ba ba sa tsebego Morena le ditiro tše kgolo tše a di diretšego Isiraele.
11Mme Baisiraele ba dira tše di befetšego Morena ba hlankela Bobaali; 12Ba tlogela Morena Modimo wa botatabo e a ba ntšhitšego nageng ya Egipita, ba latela medimo e šele, medimo ya ditšhaba tše di bego di ba dikologile, ba e khunamela, ba befediša Morena. 13Ya re ge ba tlogetše Morena, mme ba direla Baali le Asitarothe, 14Morena a ba tukela bogale, a ba gafela diatleng tša bahlakodi ba go ba hlakola, a ba lahlela diatleng tša manaba a bona a a bego a ba dikologile; gomme ba šitwa go ema ge manaba a bona a etla. 15Kae le kae mo ba bego ba tšwela ntshe, seatla sa Morena sa ba hlolela bošula, ka mo Morena a bego a ba boditše, le ka mo a ba enetšego ka gona; ba gakanega gagolo.
16Morena a fela a ba tsošetša baahlodi, ba go ba namolela mo diatleng tša bao ba bego ba ba hlakola. 17Fela, le baahlodi bao ba ganne go ba kwa ka gobane ba be ba ithatela medimo e šele, ba e latela, ba e khunamela. Ga ba ka ba diega go lahla tsela ye e bego e swerwe ke botatabo ka go kwa ditaelo tša Morena; bona ba se ke ba dira ka mokgwa woo. 18Ya re ge Morena a ba beela moahlodi, yena a ema le moahlodi yeo, a ba namolela diatleng tša manaba a bona mehla ka moka ba sa na le moahlodi eo, ka gobane Morena o be a ba kwela bohloko ge ba lla ba tlaišwa ke babeki le bapateletši ba bona. 19Ya fela a re ge moahlodi a hwile, ba boele ba senye ba fetiša botatabo ka go latela medimo e šele, le go e direla le go e khunamela ba se lahle mediro e mebe ya bona le mekgwa ya bona ya bonganga. 20Bogale bja Morena bja fela bo tukela Baisiraele, a ba a re: Setšhaba se, ka gobane se senya kgwerano ya ka ye ke e laetšego botatabo, se sa kwe se ke se boletšego, 21gona le nna mo ba fihlago nka se ke ka hlwa ke raka le ge e le monna o tee wa ditšhaba tše Joshua a di šiilego mola a ehwa. 22E tlo ba go leka Baisiraele ka bona bao, ke bone ge ba tlo hlokomela tsela ya Morena, ba swara ka yona ka mo botatabo ba bego ba e swara, ke bone le ge ba tlo e lahla. 23Ke ka baka leo Morena a lesitšego ditšhaba tšeo, a se ke a di leleka ka pela, mme a se ke a di gafela diatleng tša Joshua.
Currently Selected:
BAAHLODI 2: NSO51
Highlight
Share
Copy
Want to have your highlights saved across all your devices? Sign up or sign in
© Bible Society of South Africa 1986. Used with permission. All rights reserved.