HABAKUKU 2
2
Pheletšo ya Moikgogomoši
1Ke tlo namela sethalana, ka ema godimo ga morako ka hlapetša, ke tle ke bone se Morena a tlogo ntsebiša sona, ka fetola ba ke bego ke ba sola.
2Morena a bolela le nna a re: Ngwala pono ye; tša yona o di tloke mamating, di balege ka pela. 3Gobane pono e beetšwe lebaka la yona; e bola tša bofelo, ga e fore. Ge e sa phethege ka pela, gona e letele. Go tla di tlo tla, di ka se diege. 4O ko bone go ikgogomoša le go se loke ga pelo ya motho eo. Moloki yena o tlo phela ka tumelo yagwe.
5Ka kgonthe, sedila se fora motho, a ikgantšha, a se dule gae; molomo o ahlama wa molete wa bodulabahu, o ka lehu le le sa horego, moikoleladiletekamoka, moikgobeladitšhabakamoka. 6A ditšhaba tšeo di ka se mo hlabele seema a di ka se mo opele koša ya go kwera tša re: Joo, joo, mogaratšeesegotšagwe! O tlo iša kae a fela a ithweša thoto ya molato?
7A o ka se tšhoge go tsogile beng ba molato, go rotoga ba tlogo go hlokofatša, mme lethopša ya ba wena? 8Ka gobane wena o hlakotše tšhaba tše di ntši; mme mašalela a tšhaba tšeo tšohle a tlogo hlakola, wa lefa molato wa madi, wa lefetšwa tša mohlako wa dinaga le wa metse le baagi.
9Joo, joo, mokgothathuompe a šetša motse wagwe, mophagamišasehlaga a re ke efa dikotši! 10Tše o di nyaketšego motse wago ke dihlong; o ikobetše molato ka go fediša tšhaba tše ntši. 11Matlapa a merako yago a tlo golola, gwa tlo araba kota tša dikago.
12Joo, joo, moagamotsekamadi, mothekgamadulokasebe! 13A ga le tsebe? Di tšwa go Morena wa mašaba, ge ditšhaba di itapišetša mollo; le tša go phegelelwa ke merafo e tlo ba lefela. 14Gobane lefase le tlo tlala tsebo ya letago la Morena, bjalo ka lewatle le enetšwe ke meetse.
15Joo, joo, monošawagabo a tswaka ka lehloyo, a re a mo tagiše a mmone bofela. 16Le wena o tlo nošwa, wa kgolwa kgobogo, e sego bokwala, Nwaa gee, le wena mme o phokaele; senwelo sa seatla sa Morena se go fihletše; bokwala bja gago bo apešwa ka kgobogo. 17Bošoro bjo o bo dirilego Libanoni bo tlogo boela, le tša mola o gaila diphoofolo, di tlogo tšhoša, wa lefa madi a batho, wa lefišwa tša mohlako wa dinaga le wa metse le baagi.
18Pheko e thušang? Hleng e dirilwe ke modiri wa yona? Le modimo wa seswantšho, le moruti wa maaka, ge mmopi a bota sebopša sa gagwe, motho a dira medimo ya dimuma, di thušang? 19Joo! O re: Tsoga, a era kwata. O re: Phafoga, a era leswika la semuma, a re: Ema! -- A le ka mo ruta? -- Seleo, le manegilwe ka gauta le ka silifera; le bophelo bjo bonyane ga bo go mo go lona.
20Morena yena o Ntlong e kgethwa ya gagwe; a lefase lohle le ikhomolele pela gagwe.
Currently Selected:
HABAKUKU 2: NSO51
Highlight
Share
Copy
Want to have your highlights saved across all your devices? Sign up or sign in
© Bible Society of South Africa 1986. Used with permission. All rights reserved.