HESEKIELE 48
48
Dinaga tša meloko ya Isiraele. Dikgoro tša motse o mofsa
1Maina a meloko šea: Go tloga magomong a kua leboa hleng ga tsela e tlago Hethilone ya ya Hamathi, le Hatsara-Enoni mellwaneng ya Damaseko go bataganego le Hamathi, ke naga ya Dani, go tloga bohlabela go fihla bodikela. 2Naga ya Dani e batagana le ya Asere go tloga bohlabela go iša bodikela. 3Naga ya Asere e batagana le ya Nafutali go tloga bohlabela go iša bodikela. 4Naga ya Nafutali e batagana le ya Manase go tloga bohlabela go iša bodikela. 5Naga ya Manase e batagana le ya Efuraimi go tloga bohlabela go iša bodikela. 6Naga ya Efuraimi e batagana le ya Rubeni go tloga bohlabela go iša bodikela. 7Naga ya Rubeni e batagana le ya Juda go tloga bohlabela go iša bodikela.
8Naga ya Juda go tloga bohlabela go iša bodikela e batagana le karolo yela ya sebego ya go elwa bophara ya ba dihlaka tše dikete tše masome a mabedi a metšo e mehlano, botelele ya lekana le dikarolo tše dingwe go tloga bohlabela go iša bodikela, ye e tlogo ba le Sekgethwa mo gare ga yona.
9Karolo ya sebego ye le tlogo e arolela Morena, botelele e tlo ba meelo e dikete tše masome a mabedi a metšo e mehlano, bophara e tlo ba meelo e dikete tše lesome. 10Karolo ya sebego se sekgethwa, e lego naga ya baperisita, e be ya meelo e dikete tše masome a mabedi a metšo e mehlano botelele ka thoko ya leboa; ka thoko ya bohlabela le bodikela bophara e be meelo e dikete tše lesome; ka thoko ya borwa botelele e be meelo e dikete tše masome a mabedi a metšo e mehlano. Ka gare ga yona go be Sekgethwa sa Morena. 11E tlo ba karolo e kgethwa ya baperisita, barwa ba Tsadoko ba ba hlokometšego mediro ya ka, ba sa kago ba hlanoga, le mola Balefi ba hlanoga. 12E tlo ba karolo ya bona e arolwago mo dikarolong tša naga, ya ba sekgethwakgethwa mo mellwaneng ya Balefi. 13Balefi karolo ya bona a e batagane le ya baperisita, botelele bja yona e be meelo e dikete tše masome a mabedi a metšo e mehlano, bophara e be meelo e dikete tše lesome. 14Ba se ke ba rekiša tema ya yona; ba se ke ba e rekanya; mme dithakangwaga ba se ke ba di iša go ba šele, gobane ke naga e kgethwa ya Morena.
15Ge e le sebaka se šalago e le sa meelo e dikete tše tlhano, se etšwa go meelo e dikete tše masome a mabedi a metšo e mehlano ya bophara bja naga ya karolo, e tlo ba sebaka sa go aga metse le metsana; gomme motse o tlo dula mo go sona. 16Meelo ya gona še: Ka thoko ya leboa e tlo ba meelo e dikete tše nne le makgolo a mahlano; ka thoko ya borwa e tlo ba dikete tše nne le makgolo a mahlano; ka thoko ya bohlabela e tlo ba dikete tše nne le makgolo a mahlano; ka thoko ya bodikela e tlo ba dikete tše nne le makgolo a mahlano. 17Ge e le dibaka tša mafulo a šikago le motse e be meelo e makgolo a mabedi a masome a mahlano ka thoko ya leboa, meelo e makgolo a mabedi a masome a mahlano ka thoko ya borwa, meelo e makgolo a mabedi a masome a mahlano ka thoko ya bohlabela, meelo e makgolo a mabedi a masome a mahlano ka thoko ya borwa bodikela. 18Sebaka se se šalago, e le naga ya karolo ya sebego, e le ya meelo e dikete tše lesome ka thoko ya bohlabela, le meelo e dikete tše lesome ka thoko ya bodikela, e be ya mašemo a ba go lemela motse. 19E tlo lengwa ke balemi ba motse, ba ba tšwago melokong ka moka ya Isiraele.
20Karolo ya sebego e be meelo e dikete tša masome a mabedi e metšo e mehlano botelele, le meelo e dikete tše masome a mebedi a metšo e mehlano bophara; e be naga e kgethwa ka moka gammogo le naga ya motse.
21Sebaka se se šalago e be sa kgoši, ka thoko ye le ka thoko ye ya karolo ya sebego se sekgethwa le ya sebaka sa motse, mo go šikago le naga ya sebego sa go elwa ka dikete tše masome a mabedi a metšo e mehlano ka thoko ya bodikela le ya bohlabela, mo go bapetšego le dikarolo tše dingwe, tša go ba mellwane ya yona karolo ye ya sebego se sekgethwa le ya motse. 22Ka mokgwa woo naga ya kgoši e tlo farafaretša ya Balefi le ya motse, e fana mellwane le ya Juda le ya Benyamini.
23Dinaga tša meloko e mengwe šedi: Go tla naga ya Benyamini go tloga bohlabela go iša bodikela. 24Naga ya Benyamini e batagana le ya Simeone go tloga bohlabela go iša bodikela. 25Naga ya Simeone e batagana le ya Isašara go tloga bohlabela go iša bodikela. 26Naga ya Isašara e batagana le ya Sebulone go tloga bohlabela go iša bodikela. 27Naga ya Sebulone e batagana le ya Gada go tloga bohlabela go iša bodikela.
28Naga ya Gada ke yona e tlogo goma ka mollwane wa thoko ya borwa o tlogago Thamara wa ya metseng a Mereba kua Kadese, wa fologa le noka wa ya lewatleng le legolo.
29Ke yona naga ye le tlogo e arola, ya ba magae a meloko ya Isiraele. Ke tšona dikarolo tša bona. O realo Morena Mong wa bohle.
30Magomo a motse šea: Ka thoko ya leboa o elwe ka hlaka tše dikete tše nne le makgolo a mahlano. 31Maina a dikgoro a ye ka a meloko ya Isiraele. Dikgoro tše tharo tša ka thoko ya Leboa e be ya Rubeni le ya Juda le ya Lefi. 32Le ka thoko ya bohlabela motse o elwe ka hlaka tše dikete tše nne le makgolo a mahlano. Go be le kgoro tše tharo: Ya Josefa le ya Benyamini le ya Dani. 33Le ka thoko ya borwa motse o elwe ka hlaka tše dikete tše nne le makgolo a mahlano. Go be le dikgoro tše tharo: Ya Simeone le ya Isašara le ya Sebulone. 34Le ka thoko ya bodikela motse o elwe ka hlaka tše dikete tše nne le makgolo a mahlano. Go be le dikgoro tše tharo: Ya Gada le ya Asere le ya Nafutali. 35Motse ka moka ge o elwa thoko tšohle e be hlaka tše dikete tše lesome la metšo e seswai. Leina le motse o tlogo rewa lona mohla woo e tlo ba le: Morena o fa.
Currently Selected:
HESEKIELE 48: NSO51
Highlight
Share
Copy
Want to have your highlights saved across all your devices? Sign up or sign in
© Bible Society of South Africa 1986. Used with permission. All rights reserved.