DANIELE 12
12
Lebaka la mafelo; go tsoga ga bahu
1Mehleng yeo go tlo tsoga Mikaele, kgoši e kgolo ye e tlogo emela ba setšhaba sa geno. E tlo ba e le lebaka la ditlaišego ye go sešogo gwa ka go eba e bjalo go tloga mola batho ba bago gona, go fihla mehleng yeno. Mehleng yeo setšhabeng sa geno go tlo phološwa bao ba hwetšwago ba ngwadilwe pukung. 2Gomme ba bantši bao ba robetšego leroleng la lefase, ba tlo tsoga; ba bangwe ba tlo tsoga ba yo phela go ya go ile; ba bangwe ba tlo tsoga ba yo lewa ke dihlong, ba yo nyatšega go ya go ile. 3Baruti bona ba tlo taga bjalo ka leratadima; ba ba išitšego ba bantši go lokeng ba tlo taga bjalo ka dinaledi ka mehla ya neng le neng.
4Mme wena Daniele, boloka ditaba tše pukung, o e tleme ka lehuto, go be go tle lebaka la bofelo; e tlo latišišwa ke ba bantši, mme gwa ata yona tsebo.
5Gomme nna Daniele ka lebelela ka bona go eme ba babedi ba bangwe; e mongwe a eme lebotong la mošono wa noka, e mongwe a eme lebotong la mošola. 6E mongwe a botšiša yola a aperego seaparo sa leokodi, e a bego a eme nokeng tletlolo, a re: Ditaba tše di tlabago tše, di tlo fela neng?
7Ka kwa monna eo wa seaparo sa leokodi, e a emego meetseng a noka tletlolo, a emišitše letsogo la gagwe le letona le la ntsogošo legodimong, a ena ka Mophelanengleneng, a re: Go sa tlo feta lebaka, le mabaka, le seripa sa lebaka; ge go fetile tšhwalalano ya maatla a setšhaba se sekgethwa, ke mo go tlogo phethega ditaba tšeo ka moka.
8Ka kwa ge a realo ka se di hlaologanye, ka re: Mong a ka! Taba tše di tlo feletša kae?
9Yena a re: Sepela, Daniele, gobane go tlo ba gwa tla lebaka la bofelo ditaba tšeo di sa utilwe tša bolokwa di tlemilwe ka lehuto. 10Ba bantši ba tlo hlaolwa, ba hlatswiwa, ba thakgafatšwa. Ba babe ba tlo fela ba dira bobe; ga go e mobe e a kago kwešeša ditaba tšeo; go tlo kwešeša ba ba nago le tlhaologanyo.
11Go tloga lebakengle sedimo sa ka mehla se tlogo kgaotšwa, gwa bewa makgapha a tšhwalalano, go tlo fela matšatši a sekete le makgolo a mabedi a nago le masome a senyane. 12Wa lehlogonolo ke eo a dulago a na le lehutšo a fetša matšatši a sekete le makgolo a mararo a nago le masome a mararo a metšo e mehlano.
13Wena bjalo, sepela o lebeletše bofelo; o tlo khutša, wa tlo ba wa tsoga go tlo amogela kabelo ya gago bofelong bja matšatši!
Currently Selected:
DANIELE 12: NSO51
Highlight
Share
Copy
Want to have your highlights saved across all your devices? Sign up or sign in
© Bible Society of South Africa 1986. Used with permission. All rights reserved.