DITIRO TŠA BAAPOSTOLA 2
2
Go tla ga Moya wo Mokgethwa
1Ge letšatši la Pentekoste le fihlile, ba be ba le mmogo ka moka ba le pelotee. 2Ba tšhoga go kwala modumo o tšwago legodimong, eke ke wa ledimo le maatla le le tšutlago, wa tlala ngwako ka moka wo ba dutšego go wona. 3Ba bona go hlahlamologa maleme a kaga dikgabo tša mollo; a tla a dula godimo ga e mongwe le e mongwe wa bona. 4Ka moka ba tlala Moya wo Mokgethwa; ba thoma go bolela ka maleme a šele, ka mo Moya o ba fago go bolela ka gona.
5Go be go na le Bajuda ba ba dutšego Jerusalema, banna ba ba boifago Modimo, ba ditšhaba tšohle tša ka tlase go legodimo. 6Ge modumo woo o kwala, gwa bokana mašaba a batho; ba tšhoga ge mang le mang a ekwa ba bolela ka mmolelo wa gabo. 7Ka moka ba tlalelwa ba tlabega, ba botšišana ba re: Bonang! Ba ba bolelago bao a ga se ba Galilea ka moka ga bona? 8Ke go reng ge ka moka ga rena re ekwa ba bolela ka mmolelo wa gešo wo re tswaletšwego go wona. 9Re Bapareta, le Bameda, le Baelama, le ba agilego Mesopotamia, le Juda, le Kapadokia, le Ponto, le Asiana, 10le Firigia, le Pamfilia, le Egipita, le dinageng tša Libia thoko ya Kirene, le ba ba diiletšego Roma. 11Re Bajuda le basokologi, Bakereta, le Baarabia. Re kwa ba bolela matete a Modimo ka mebolelo ya gešo. 12Bohle ba tlalelwa ba gakanega; ba botšišana ba re: Dilo tše di iša kae?
13Ba bangwe ba ba kwera ba re: Ba hoše beine e bose.
14Petro a ema a na le ba lesome le motšo o tee, a hlaboša lentšu a re: Lena banna ba Juda, le ba agilego Jerusalema bohle, taba ye a e tsebje ke lena; mantšu a ka a a tsene ditsebeng tša lena. 15Ge le re batho ba ba boilwe, ga go bjalo; hleng e sa le nako ya boraro ya letšatši. 16Dilo tše ke tše moporofeta Joele a di boletšego a re: 17Tšeo di tlogo direga mehleng yeo ya bofelo šedi: O realo Modimo; o re: Nama yohle ke tlo e tšhela Moya wa ka; mme barwa ba lena le barwedi ba lena ba tlo porofeta; masogana a lena a tlo bona dipono; ba bagolo ba lena ba tlo lora diloro; 18le balata ba lena ba banna le ba basadi ke tlo ba tšhela Moya wa ka mehleng yeo, ba tlo porofeta. 19Mme ke tlo dira mehlolo kua legodimong le mo lefaseng, madi le mollo le mekubego ya meuši. 20Letšatši le tlo fetoga leswiswi, kgwedi ya ba madi, ge go fihla tšatši le legolo le le šiišago la Morena. 21Gomme ba ba tlogo phološwa ke ba ba rapelago ina la Morena.
22Lena banna ba Isiraele, kwang ditaba tše: Tša Jesu wa Natsaretha, monna eo Modimo a mo tsebaditšego mo go lena ka ditiro tše maatla le ka mehlolo le ka dika tša go mo hlatsela, tše Modimo a di dirilego ka yena gare ga lena, lena beng le a di tseba. 23Yena eo le mo tšere ka matsogo a bantlegamolao, la mmapola, la mmolaya; gwa ba bjalo gore go phethege le Modimo a le tlemilego a tseba gore o tlo gafiwa. 24Yena eo Modimo o mo tsošitše, o mo hunolotše mahloko a lehu; gobane go be go sa kgonege ge lehu le ka dula le mo swere. 25Hleng Dafida o mmoletše a re: Ke dula ke itebanya le Morena; o hleng gaka; nka se ke ka šutha. 26Pelo ya ka e thabele tšona; leleme la ka le hlaletše; mme mmele wa ka o robala o iketlile. 27Gobane moya wa ka o ka se ke wa o tlogela o le kua bodulabahu. O ka se ke wa lesa Mokgethwa wa gago a bona go bola. 28Ntsebiše mmila wa bophelo; pele ga gago go tlala mathabo.
29Banna ba gešo, a nke ke le botšeng ka tlhathologanyo tša Dafida tatawešo e mogolo. Yena o hwile a fihlwa lebitleng; le lehono lebitla la gagwe le sa le gona mo go rena. 30Bjale, e le moporofeta, a tseba gore Modimo o mo enetše ka keno a re mo sedulong sa gagwe sa bogoši go tlo dula motlogolo wa gagwe. 31O di bone di setla, a bolela go tsoga ga Kriste bahung, a re a ka se ke a leswa a le kua bodulabahu, mmele wa gagwe ga wa ka wa bona go bola. 32Yena Jesu eo, Modimo o mo tsošitše bahung; mme rena ka moka re dihlatse tša taba yeo. 33Bjale ge a godišitšwe ka letsogo le letona la Modimo, mme kholofedišo yeo e bolelago Moyamokgethwa e le yena a bego a e tšere go Tatagwe, o tšholootše se le se bonago le se le se kwago lehono. 34Gobane Dafida ga a ka a rotogela legodimong; se a se boletšego sese, o itše: Morena o boditše mong wa ka a re: Dula ka letsogong la ka le letona, 35ke be ke dire manaba a gago bogato bja nao tša gago.
36Ke gona, moloko ka moka wa Isiraele a o ke o tsebe ruri, gore Jesu eo le mmapotšego, ke yena yo Modimo a mmeilego a ba Morena, a ba yena Kriste.
37Ge ba ekwa tšeo, tša ba hlaba dipelo, ba botšiša Petro le baapostola, ba re: Banna ba gešo, re tlo dirang?
38Petro a fetola a re: Sokologang; ka moka le kolobetšwe leineng la Jesu Kriste, e be gona go lebalelwa dibe; ke mo le tlogo fiwa neo ya Moyamokgethwa. 39Gobane kholofedišo e era lena le bana ba lena, le ba lego kgole bohle, bao Morena Modimo wa rena a sa tlogo ba bitša ba tla.
40Petro a realo a tiiša bohlatse ka mantšu a mangwe a mantši, a ba kgothatša a re: Tlang le phološwe, le tšwe molokong o kgopamilego wo. 41Ba ba dumetšego polelo ya gagwe ka go rata, ba tlile ba kolobetšwa; mohla woo gwa amogelwa batho ba e nyakilego go ba ba dikete tše tharo. 42Bona bao ba dula e le ba go rutwa ke baapostala, ba dula e le ba go kwana, ba go ngwatha senkgwa ba le dithapelong.
43Dipelo tša bohle tša swarwa ke poifo; gwa dirwa mehlolo e mentši ke baapostola, le dika tša bohlatse moo motseng wa Jerusalema. 44Mme badumedi ka moka ba be ba kwana; dilo tša bona tšohle ba di hlakanya ya ba tša bohle. 45Ba rekiša maruo le dithoto tša bona, ba hlallela bohle ka mo motho ba bego ba mmona a hloka. 46Ba be ba sa lape go tla Ntlongkgethwa ka mehla, e le ba go kwana, ba go ngwatha senkgwa malapeng a bona. 47Ba eja dijo tša bona ba thabile, ba se na pelaelo, ba reta Modimo, ba ratwa ke batho ka moka. Mme phuthegong yeo, Morena ka mehla a eketša ba ba phološwago.
Currently Selected:
DITIRO TŠA BAAPOSTOLA 2: NSO51
Highlight
Share
Copy
Want to have your highlights saved across all your devices? Sign up or sign in
© Bible Society of South Africa 1986. Used with permission. All rights reserved.