2 BAKORINTHE 1
1
Go kgotlelela ditlaišegong
1Paulo Moapostola wa Jesu Kriste ka thato ya Modimo le Timotheo ngwanešo, re ngwalela phuthego ya Modimo ya Korinthe le bakgethwa bohle ba ba lego moo nageng ya Akaya.
2Kgaugelo a e be le lena, le khutšo e tšwago go Modimo Tata wešo le go Mong wa rena Jesu Kriste.
3A go retwe Modimo, yena Tatago Mong wa rena Jesu Kriste, yena Radikgaugelo, Modimo wa khomotšo yohle, 4e a re homotšago mahlokong a rena ohle, gore ba ba lego mahlokong bohle re kgone go ba homotša ka yona khomotšo ye rena re homotšwago ka yona ke yena Modimo. 5Gobane bjalo ka ge ditlaišego tša Kriste di re atetše gagolo, le yona khomotšo e re atetše ka yena Kriste. 6Gomme ge re hlokofatšwa, ke gore le homotšwe le phološwe; ge re homotšwa ke gore le lena le be le khomotšo ye e bonalago ka ge le kgotlelela mahlokong a le rena re hlokofatšwago ka ona. 7Mo go rena go tiile kholofelo ya go tseba lena, ge le le batee le rena ka mahloko le ka khomotšo.
8Ga ke rate ge lena bana bešo le ka dula le sa tsebe tša dihlokofalo tše di re tletšego nageng ya Asia, tša re imela wa go re roba, ra ba ra felelwa ke kholofelo ya go re re sa tlo phela. 9Mo dipelong tša rena go be go šetše go tiile la go re re tlo hwa; ya ba gore re lese go ipota, re bote Modimo e a kgonago go tsoša le bahu. 10Ke yena e a re phološitšego lehung le lekaakao; le bjale o sa re phološa; gomme ke yena yo re holofetšego gore o sa tlo re phološa. 11Le fele le re thekgetša ka go re rapelela, gore kgaugelo ye re e bonago ka go rapelelwa ke ba bantši, e tle e be le ba bantši ba ba re lebogelago.
12Gobane se re se kgantšhago sese: Ke bohlatse bja ge dipelo tša rena di re: Mo lefaseng re dirile ka mokgwa o mokgethwa le ka therešo e tšwago go Modimo; ga ra ka ra dira ka bohlale bja batho; re dirile ka kgaugelo ya Modimo, gagologolo mola re na le lena. 13Le gona ga re le ngwalele tše dingwe, ge e se tše le kago di bala la di hlaologanya; gomme ke holofela gore le tlo di hlaologanya la di fetša, bjalo ka ge le šetše le re kwile ka boripana, 14gore ka letšatši la Morena Jesu le tlo kgantšha rena, bjalo ka ge rena re tlo go kgantšha lena.
15Ke be ke rata go tla go lena pele, ke na le kholofelo e bjalo, gore le tle le boeletšwe kgaugelo, 16ke kgone go fetela Matsedonia ke etšwa go lena; ka tlo tla gape go lena ge ke boa Matsedonia, mme la tlo mphelegetša ge ke ya nageng ya Juda. 17Bjale ge ke nagana ka mokgwa woo, a ke go fo bolela? Le gona, ge ke rera taba, a ke fo e rera semotho wa go re go nna “E! E!” e be selo se tee le “Aowa, Aowa”? 18Ka go botega ga Modimo, nna ke re, se re le boditšego sona e be e se “E” ye nago le “Aowa”. 19Gobane Morwa wa Modimo Jesu Kriste, e a kwaditšwego mo go lena ke borena, nna le Silibano le Timotheo, e be e se wa “E” ye nago le “Aowa”; sa gagwe e be e le yona “E”. 20Gobane dikholofedišo tšohle tša Modimo di ba “E” ka yena, di ba “Amene” ka yena, gore Modimo a retwe ka rena. 21E a re tiišago gotee le lena ka Kriste, e a re tloditšego ka Moya, ke yena Modimo. 22Ke yena a re swailego, a re beeletša ka Moya wa gagwe mo dipelong tša rena.
23Gomme nna ke bitša Modimo gore a be hlatse ya moya wa ka, ya gore ge ke sešo ka tla moo Korinthe e sa le bjale, e be e le go tsebafa bolena. 24Ga se go re re babuši ba tumelo; ke go re re badiriši ba lethabo la lena, gobane le eme tumelong.
Currently Selected:
2 BAKORINTHE 1: NSO51
Highlight
Share
Copy
Want to have your highlights saved across all your devices? Sign up or sign in
© Bible Society of South Africa 1986. Used with permission. All rights reserved.