2 BAKORINTHE 2
2
Go setša mosokologi
1Se ke se tiišitšego pelong ya ka ke go re nka se ke ka tla wa go le nyamiša. 2Gobane ge nka le nyamiša, e a tlogo thabiša nna e tlo ba mang ge e se lena ba ke tlogo ba ke ba nyamišitše? 3Ge ke le ngwaletše ditaba tše, e be e le gore ge ke etla, ke se ke ka nyamišwa ke bao go swanetšego ge ke ba thabela; gomme ke holofetše gore lethabo la ka e tlo ba le tee le la lena ka moka. 4Gobane ke le ngwaletše ke hlokofetše ruri, ke boifa, megokgo e le e mentši, ke sa re ke le hlokofatše, e le gore le tsebe lerato le legolo le ke le ratago ka lona.
5Ge motho a dirile se se nyamišago, ga a nyamiša nna fela; o nyamišitše bolena. Nke ke re: E nyakile go ba ka moka ga lena, gore ke se iše kgole. 6Go lekane ge motho eo a sotšwe ke ba bantši ka mokgwa woo. 7Ke gona le ka upša la mo lebalela, la mo homotša, gore motho eo a se tlo metšwa ke nyamo ge e mo golela. 8Ke ka baka leo ke le kgopelago, gore le mo dire ka lerato. 9Ge ke le ngwaletše ka taba ye, ke be ke re ke bona ge le le babotegi, ge le le ba ba kwago ditabeng tšohle. 10Yo lena le mo lebalelago se a se dirilego, le nna ke mo lebaletše. Gobane ge nna ke mo lebaletše, ke mo lebaletše ka lena re le pele ga sefahlogo sa Kriste, 11gore re se ke ra foraforetšwa ke Sathane, gobane maano a yena eo ga se go re ga re a tsebe.
12Mola ke fihla Teroa ka Ebangedi ya Kriste, ka bulegelwa ke mejako Moreneng. 13Ka hlokišwa khutšo pelong ka go se hwetše Tito ngwanešo; ka laela ka fetela Matsedonia.
14Gomme Modimo a a lebogwe, yena wa go re fa phenyo ka mehla ka Kriste, a tšweletša monko o bose wa go tseba yena mo go fela ka rena. 15Gobane pele ga Modimo re seorelo sa Kriste mo go ba ba phološwago le go ba ba lahlegago. 16Go ba bangwe re monko wa lehu wa go iša lehung; go ba bangwe re monko wa bophelo wa go iša bophelong. Gomme ke mang e a kgonago go tše pedi tšeo? 17Rena ga re etše bao ba ba retollago Lentšu la Modimo; rena re le bolela re rereša; re bolediswa ke Modimo re le ba Kriste.
Currently Selected:
2 BAKORINTHE 2: NSO51
Highlight
Share
Copy
Want to have your highlights saved across all your devices? Sign up or sign in
© Bible Society of South Africa 1986. Used with permission. All rights reserved.