2 TIMOTHEO 3
3
Mehla e mebe ya bofelo. Go tiela thutong
1Tseba gore mehleng ya bofelo go tlo tla mabaka a mathata. 2Batho e tlo ba ba go ithata, ba megabaru, ba lenyatšo le baikgogomoši, le ba maroga, le ba go se kwe batswadi, ba go se leboge, ba go se ile selo. 3E tlo ba bahlalalerato, babatasekgoro, e tlo ba dihwirihwiri, le ba ba sa tsebego go itshwara, manaba a tše bolo; 4E tlo ba baeki, baipuši, baikgantšhi, ba go ipshina ba lahlile Modimo. 5Ge o ba bona, o tlo re ba ne borapedi; anthe maatla a bjona ga ba a dumele. Ba ba bjalo o ba gerule. 6Go bona bao go na le ba go tsenela ba bangwe dintlong, mme ba thopa basatšana ba ba imetšwego ke dibe, ba ba gogwago ke dikganyogo tša mehutahuta. 7Ke ba kago rutwa ka mehla mme ba se kgone go fihlela tsebo ya therešo le ka mohla o mongwe. 8Ke tšona tše Janne le Jambore ba bego ba na natšo ge ba ngangana le Moše, ya ba go ngangana le therešo. Ke batho ba ba senyegilego kgopolo, ba go se amane le tumelo. 9Fela, ba ka se ke ba iša felo; bošilo bja bona bo tšwela pepeneneng, bjalo ka bja bona bala.
10Ge e le wena o lotile thuto ya ka wa e latela, wa etša mokgwa wa ka le phegelelo ya ka, le tumelo ya ka, le go se fele pelo ga ka, le lerato, le kgotlelelo. 11Wa etša nna ka go hlomarelwa le go tlaišwa ka tše di etšago tšela tša go ntiregela Antiokia, le Ikonio le Lisitara. Ke kgotleletše ditlhomarelo tše bjalo, mme Morena o nnamoletše gohle. 12Ke tše di tlogo diregela bohle ba ba ratago go phela ka borapedi ka Kriste Jesu; le bona ba tlo hlomarelwa. 13Batho ba babe le baaroši, bobe bja bona bo tlo fela bo gola bo eya, ba fora ba bangwe, le bona ba forwa. 14Ge e le wena o tiele mo go tše o di rutilwego wa di dumela, o tseba ba o ithutilego go bona. 15Gobane Mangwalo a Makgethwa o a tseba go tloga bjaneng. Ke ona a kgonago go go hlalefišetša phologo ka tumelo, o dumetše Jesu Kriste. 16Gobane Mangwalo ka moka ke mahebetšwake Modimo, le gona a hola batho ka go ruta, le ka go kgodiša le go sokolla, le ka go iša tokong, 17gore motho wa Modimo e be yo bolokatlalo, a kgonišwe go dira mediro e botse ka moka.
Currently Selected:
2 TIMOTHEO 3: NSO51
Highlight
Share
Copy
Want to have your highlights saved across all your devices? Sign up or sign in
© Bible Society of South Africa 1986. Used with permission. All rights reserved.