2 SAMUELE 24
24
Molato wa go bala setšhaba. Aletare ya seboeng sa Arauna
1Bogale bja Morena bja buša bja tukela Isiraele; a romeletša Dafida a re a bale Isiraele le Juda. 2Kgoši ya bolela le Joaba molaodi wa yona wa madira, ya re: Putlaputla le dilete tšohle tša Isiraele, o gome ka Dani le ka Bereseba, o bale setšhaba, gore ke tsebe palo ya sona.
3Joaba a fetola a re: Morena Modimo wa gago a a atiše setšhaba sa gago, go o tee go tšwe ba lekgolo, mahlo a kgoši mong wa ka a di bone a thabe. Fela, taba ye, mongaka, o e kganyoga ka baka lang?
4Fela, taelo ya kgoši ya fenya Joaba le balaodi ba madira. Joaba a ba a tšwa le balaodi ba madira ba romilwe ke kgoši, ba yo bala setšhaba sa Isiraele.
5Ba sela noka ya Jorodane ba hloma mošaša Aroere ka thoko ya le letona ya motse o lego moeding, ka thoko e lebago Gada le Jasere. 6Ba tla le nageng ya Gileada, le nageng ya ka tlase ga Hodisi, ba tla Dani, ba arogela le mathokong a Sidoni. 7Ba tla sebong sa Tiro le metseng ya Bahefi le ya Bakanana; ba fologela thoko ya borwa ya Juda kua Bereseba.
8Gomme ge ba raletše naga ka moka, ba tla Jerusalema ba feditše dikgwedi tše senyane le matšatši a masome a mabedi. 9Joaba a neela kgoši palo ya ba ba badilwego ba setšhaba; go Isiraele go hweditšwe banna ba bahlabani ba dikete tše makgolo a seswai ba ba swarago tšhoša; gomme banna ba Juda e be e le ba dikete tše makgolo a mahlano.
10Bjale ge Dafida a badile setšhaba, a bolawa ke moetlo; a rapela Morena a re: Ke sentše gagolo ge ke dira seo; bjale, Morena, o ke o nthole molato, nna mohlanka wa gago; ke dirile bošilo bjo bogolo.
11Gomme ka moswana ge Dafida a tsogile, lentšu la Morena la tlela moporofeta Gada mmoni wa Dafida, la re: 12Sepela o bolele le Dafida o re: Morena o re: Ke bea dilo tše tharo pele ga gago; ikgethele se o ratago go dirwa sona.
13Gada a tla go Dafida a mo anegela taba yeo, a re: A o rata ge o ka tlelwa ke nywaga e šupago ya tlala nageng ya gago? Goba o rata go fetša kgwedi tše tharo o tšhaba, manaba a gago a go hlomere? Goba o rata ge lehu le lebe le etla nageng ya gago matšatši a mararo? Bjalo akanya o bone se nkago botša e a nthomilego.
14Dafida a fetola a re: Ke tlaletšwe gagolo; a nke re weleng diatleng tša Morena, ka gobane kgaugelo ya gagwe ke e kgolo; anke ke se wele diatleng tša batho.
15Gomme Morena a tliša lehu go Isiraele; la thoma e sa le ka moswana; gwa ba gwa tla lebaka la meriti. Go tloga kua Dani go fihla Bereseba gwa hwa batho ba dikete tše masome a šupago. 16Ya re ge morongwa wa Modimo a iša motse wa Jerusalema seatla go o senya, Morena a šegama ge a bona bošula bjoo; a botša morongwa motlišalehusetšhabeng, a re: Go hwetše bjalo; hunyetša letsogo la gago. Ke ge morongwa wa Morena a fihlile seboeng sa Arauna Mojebusi.
17Dafida ge a bona morongwa eo a otlago setšhaba, a rapela Morena a re: Ke nna e ke sentšego; ke nna ke dirilego sebe; dinku tše di sentšeng? Seatla sa gago a se sware nna le ba leloko lešo.
18Ka lona tšatši leo Gada a tla go Dafida a bolela a re: Rotoga o agele Morena aletare seboeng sa Arauna Mojebusi. 19Dafida a napa a rotoga, a yo dira se se boletšwego ke Gada a laetšwe ke Morena. 20Arauna ge a gadia, a bona kgoši e etla le bahlanka ba yona; a tšwa a lotšha a inametše fase pele ga kgoši; 21a bolela a re: Kgoši Mongaka, o reng o etla go mohlanka wa gago?
Dafida a re: Ke tlilo reka seboa sa gago, gore ke agele Morena aletare go sona, gore go kgaotše kotlo ye setšhabeng.
22Arauna a re: A Kgoši Mong wa ka a fo tšea se a se ratago, a dire sedimo; kgomo ya sehlabelo še, le difolo, le dikota tša go tlema dipholo, e be dikgong. 23Kgoši, tše ka moka nna Arauna ke di neela kgoši. Arauna a fetša ka go re: Morena Modimo wa gago a a go thabele.
24Dafida a fetola a re: Aowa, ke tlo di reka go wena ka theko ya tšona. Ga ke rate go tlišetša Morena Modimo wa ka sedimo sa tše ke di filwego fela.
Ke moka Dafida a reka seboa seo le dikgomo tšeo ka silifera ya sekele tše makgolo a mahlano. 25Dafida a tsebo agela Morena aletare gona moo, a tliša dihlabelo le dileboga. Morena a boela a amogela dithapelo tša batho ba naga yeo, gomme kotlo e bego e wetše Isiraele ya kgaotša.
Currently Selected:
2 SAMUELE 24: NSO51
Highlight
Share
Copy
Want to have your highlights saved across all your devices? Sign up or sign in
© Bible Society of South Africa 1986. Used with permission. All rights reserved.