2 KORONIKA 36
36
Pušo ya Joahase le ya Joyakima le ya Joyakini. Bothapša bja Babele. Go boa bothopšeng
1Gomme setšhaba sa naga yeo sa tšea Joahase morwa wa Josia sa mmea kgoši motseng wa Jerusalema, a buša legatong la tatagwe. 2Joahase ge a tšea bogoši o be a na le nywaga e masome a mabedi a metšo e meraro; a bušo a fetša dikgwedi tše tharo fela motseng wa Jerusalema. 3Kgoši ya Egipita e mo amogile bogoši bja Jerusalema; ya ntšhiša naga lekgetho la talente tše lekgolo tša silifera, le talente e tee ya gauta; 4ya bea Eliakima mogolo wa Bojoahase, a ba kgoši ya Juda le Jerusalema; mme a fetola leina la gagwe a mo reela la Joyakima. Ge e le Joahase monnagwe, Neko o mo tšere a mo iša Egipita.
5Joyakima ge a bewa kgoši o be a na le nywaga e masome a mabedi a metšo e mehlano; a fetša nywaga e lesome la motšo o tee a buša motseng wa Jerusalema. Gomme yena a dira tše di befetšego Morena Modimo wa gagwe. 6A tšwelwa dira ke Nebukadinetsara kgoši ya Babele. Yena a mo tlema ka diketane tša mphiri, a mo iša Babele. 7Le mo go dibjana tša ngwako wa Morena Nebukadinetsara o tšere tše dingwe a di iša Babele, a di bea ngwakong wa modimo wa gagwe gona kua Babele. 8Ge e le ditaba tše dingwe tša Joyakima, le tša makgapha tše a di dirilego, le tše di hweditšwego a na natšo, šedile di ngwadilwe pukung ya dikgoši tša Isiraele le tša Juda. Legatong la gagwe gwa buša Joyakini morwa wa gagwe.
9Joyakini ge a tšea bogoši o be a na le nywaga e seswai, a fetša dikgwedi tše tharo le matšatši a lesome fela a le kgoši; mme a dira tše di befetšego Morena. 10Ge ngwaga o fetile, Nebukadinetsara kgoši ya Babele a roma banna, ba tla ba mo iša Babele, le dibjana tša bohlokwa tša Ngwakong wa Morena; a bea Tsedekia kgoši ya Juda le Jerusalema.
11Tsedikia ge a eba kgoši o be a na le nywaga e masome a mabedi a motšo o tee, a fetša nywaga e lesome la motšo o tee a buša motseng wa Jerusalema. 12Yena o dirile tše di befetšego Morena Modimo wa gagwe; a gana go ikokobetša ge moporofeta Jeremia a bolela le yena a romilwe ke Morena.
13A hlanogela kgoši ya Nebukadinetsara e a mo enišitšego ka Modimo, a šatalatša molala wa gagwe, a thatafiša pelo ya gagwe; a gana go boela go Morena Modimo wa Isiraele. 14Le bagolo ka moka ba baperisita, le ba setšhaba, ba atiša makgopo, ba hlatlaganya ka go ya ka tsela ya makgapha ka moka a ba ditšhaba, ba tšhilafatša Ngwako wa Morena, wo a o kgethilego Jerusalema. 15Gomme Morena Modimo wa botatabo a fela a iša lentšu go bona ka batseta ba gagwe, a fela a boeletša, ka gobane a kwela setšhaba sa gagwe bohloko a rata moago wa gagwe. 16Bona gomme, ba dira bahlanka ba Modimo sekwero, ba nyatša se ba se boletšego, ba fotla baporofeta ba gagwe; kgalefo ya Morena ya ba ya golela setšhaba sa gagwe, gwa hlokwa moreku.
17A lesa kgoši ya Bakaladea ya ba tšwela dira, ya bolaya masogana a bona ka lerumo mo Ngwakong wa sekgethwa sa bona, ya se ke ya feta masogana le basetsana le bakgekolo le bakgalabje; bohle Morena o ba gafetše diatleng tša yona. 18Le thoto ka moka ya mo Ngwakong wa Modimo, e kgolo le e nyane, le mahumo a Ngwakong wa Modimo, le mahumo a kgoši le a bakgoma, ka moka ya di iša Babele. 19Ngwako wa Modimo ba o fiša ka mollo; merako ya Jerusalema ba e phušola, le nywako ka moka ya mošate ba e tšhuma ka mollo; thoto ka moka ya bohlokwa ba e senya. 20Ba ba phonyokgilego lerumo ba thopiwa ba išwa Babele, ya ba bahlanka ba kgoši ya Babele le ba bana ba yona, gwa ba gwa tla gwa buša Baperesia. 21Ya ba gona go phethega ga lentšu la Morena, le a le boletšego ka molomo wa Jeremia, a re: Go tlo dula go le bjalo gore naga ye e bušetšwe disabatha tša yona; ka kgonthe matšatši ka moka a ge e dutše e le marope, e khutšitše gwa fela nywaga e masome a šupago.
22Ka ngwaga wa pele wa kgoši Korese ya Peresia go phethegile tše Morena a di boletšego ka molomo wa Jeremia, Morena a phafoša moya wa Korese kgoši ya Peresia, a iša lentšu go bohle ba mmušo wa gagwe, le ka lengwalo, a re:
23Korese kgoši ya Peresia o re: Morena Modimo wa legodimo o nneetše mebušo yohle ya lefase; gomme o ntaetše a re ke mo agele Ngwako kua Jerusalema nageng ya Juda. Bjale mang le mang yo e lego wa setšhaba sa gagwe, a Morena Modimo wa gagwe a be le yena mme a boele gona kua.
Currently Selected:
2 KORONIKA 36: NSO51
Highlight
Share
Copy
Want to have your highlights saved across all your devices? Sign up or sign in
© Bible Society of South Africa 1986. Used with permission. All rights reserved.