Zabuli 139
139
Nguluwi kangugazela geng'ha na kangulongoza geng'ha
(Kwa yalingwaluchiza kwimba. Zabuli ya Daudi.)
1Gwa Mkulu Nguluwi, hegwe nakumhugajiza,
hegwe kwangunzela heni mbaka mgati.
2Kwanguvizela kikalisa na kwima kwa heni,
kwanguvizela chila chinhu chondilingijesa kulawa kutali.
3Kwanguvizela hondijenda ama hondikwesela,
kwanguhazela chila honhu hondilinguluta.
4Nding'hali kulonga ulonzi woneche,
gwa Mkulu Nguluwi, nakuuzela ng'hatu.
5Kwa baho kuli chila ubanzi wa heni, kumwando na kumbele,
kwangumbichila moko wa hegwe kunyamila.
6Uwanzi wa hegwe ndo mzidi wa nyhala za heni,
ndo ukulu ng'hatu, siweza kuuzela.
7Mbilimile kohi kuwele muhe wa hegwe wa haduhu?
Ndute kohi kuwele hegwe kwa haduhu?
8Wone ng'hwine kilanga, hegwe kwa baho,
wone mbase hanyi kuli isi ya wabagame, hegwe kwa baho.
9Wone nguluche mbaka kolilawilaga isanya,
ama mbaka kuli kolizinjilaga isanya,
10mbaka ako kahi kwa kuko kundongoza,
moko wa hegwe wa kudilo wondibata.
11Wone ndahalandile jiza lingumbiche,
jiza linzungulute honhu ha lumuli,
12kwa hegwe, jiza haliwele jiza ne hado,
na nechilo kwangupulika kota nemisi,
kwa hegwe jiza na lumuli ndo chinhu chimwe.
13Hegwe nakundita heni, nhumbula na muhe,
nakungongomanya mmunda mwa mayangu.
14Ndangukutogola kwa vila nditigwa kwa kububuwaza na vinduzanduza,
madito ga hegwe ndo ga kububuwaza,
nhumbula ya heni yangugazela ng'hatu.
15Lukuli lwa heni haluvisigwe kwa hegwe,
vyounditile kwa uviso, honhu hawele munhu hawezile kumbona.
16Hegwe nakumbona lombele nding'hali kupondigwa,
nakwandika chila chinhu mchitabu cha hegwe,
mazuwa ga heni geng'ha nakugawika goya,
mbaka kung'hali kuwa baho zuwa lila lya mwaluko.
17Gwa Nguluwi, majesa ga hegwe ndo makulu ng'hatu,
hambe gaweze kuwalizwa ng'hatu.
18Wone ndahagawazile gahawele menji kupuluta sangalaza.
Hondililimka, nding'hali nda hamwe na hegwe.
19Gwa Nguluwi, uwakopole wanhu wehile.
Walingukopola woche kwa heni.
20Wangulonga vibi kwa chiwalo cha hegwe,
wangulonga gehile kwa hegwe galinguwala itagwa lya hegwe.
21Gwa Mkulu Nguluwi, ndanguwazudila walingukuzudila,
ndanguwabeza ng'hatu wala walingukubelenhuka.
22Wang'honyo wa hegwe ndo wang'honyo wa heni,
ndanguwazudila ng'hatu.
23Umhugajize, gwa Nguluwi, uizele nhumbula ya heni,
unjeze, uluzele lunhwinhwi lwa heni.
24Ugalole, wone gala gondilingudita ndo geha,
undongoze kuli nzila ya mazuwa gose.
Currently Selected:
Zabuli 139: Chividunda
Highlight
Copy
Compare
Share
Want to have your highlights saved across all your devices? Sign up or sign in
New Testament © 2014 Pioneer Bible Translators and The Word for the World
Old Testament books © 2018 Pioneer Bible Translators
