Zabuli 135
135
Lutogo kwa itagwa lya Nguluwi
1Mumtogole Mkulu Nguluwi.
Mlitogole itagwa lya Mkulu Nguluwi,
mumtogole hemwe vitumagwa wa heye.
2Mumtogole hemwe mlingikala kuli ng'handa ya Mkulu Nguluwi,
kuli lugagala lwa ng'handa ya Nguluwi wa hetwe.
3Mumtogole Mkulu Nguluwi kwa vila ka yanojile,
mlitogole kwa nzimbo itagwa lya heye,
kwa vila alyo lyangunojeza.
4Mkulu Nguluwi nakamhagula Yakobo yawe wa heye,
hemwe wanhu wa Isilaeli muwe wa heye.
5Ndikomya, ndivizela kota Mkulu Nguluwi ndo mkulu,
Mkulu wa hetwe ndo mkulu mchanya mwa milungu jeng'ha.
6Mkulu Nguluwi kanguditaga choneche choyalingugana,
kuli kilanga na muisi na mbahali na mgati ng'hatu mwa mazi.
7Ndo yalingigala ng'hungugu kulawa kuli mbaka ja isi,
yalingudita mazi tendema kwa lumwemwesa,
na kuputa mbeho ng'hulu kulawa kuli ng'hano za heye.
8Ndo yawakopole walelwa wa mwaluko ako Misili,
walelwa wa wanhu na migongolo kahi.
9Ndo yaditile ulajilo na kububuwaza kwa hegwe, gwa Misili,
kwa kuwagaza Falao na vitumagwa wa heye weng'ha.
10Ndo yawadumye wanhu wa isi nyinji,
nakawakopola wandewa wawele na mong'ho,
11wawele ndo Sihoni mndewa wa Waamoli,
Ogu mndewa wa Bashani,
na wandewa weng'ha wa Kanaani.
12Nakahola isi za hewo na kuwapa wanhu wa heye,
ena, leka ziwe uhalizi kwa wanhu wa heye Isilaeli.
13Itagwa lya hegwe, gwa Mkulu Nguluwi, lyangikala mazuwa gose,
lyokumbuchilwa kuli lulelo lweng'ha.
14Mkulu Nguluwi kowalewela wanhu wa heye,
na kuwonela isungu vitumagwa wa heye.
15Jimalukolo ja wanhu wa isi ndo sendi na zahabu,
najigongomanyigwa kwa moko ga wanhu.
16Jina milomo, ila hajilingulonga,
jina meho, ila hajilingona.
17Jina makutu, ila hajilinguhulika,
na jahela ukomu.
18Weng'ha walingujigongomanya wochiwhana najo,
hihyo du na weng'ha walingujitumbila.
19Hemwe wanhu wa Isilaeli, mumtogole Mkulu Nguluwi.
Hemwe watambika wa ivyazi lya Aluni, mumtogole Mkulu Nguluwi.
20Hemwe Walawi, mumtogole Mkulu Nguluwi.
Hemwe mlingumdumba Mkulu Nguluwi, mumtogole.
21Yatogoligwe Mkulu Nguluwi kuli Siyoni,
yatogoligwe yalingikala Yelusalemu.
Mumtogole Mkulu Nguluwi.
Currently Selected:
Zabuli 135: Chividunda
Highlight
Copy
Compare
Share
Want to have your highlights saved across all your devices? Sign up or sign in
New Testament © 2014 Pioneer Bible Translators and The Word for the World
Old Testament books © 2018 Pioneer Bible Translators
