Nhelo 19
19
1Fola mzunwa yalingikala kwa kugoloka,
kusinda yajilile kwa ulonzi na mpoka.
2Hainojile munhu kuwa na maya ne kuwa na uwanzi,
ne kudita himahima kwa vila koileka nzila.
3Wone munhu yedumye kwa upoka wa heye,
kangumzudilaga Mkulu Nguluwi.
4Lufufu lwangigalaga wagoloko,
ila mzunwa kangulechigwa ne goloko.
5Mlolezi mdesi holeka kugazigwa,
yalingulonga udesi howeza kiwika kutali na magazo.
6Wanhu wenji wanguganaga kuwa habehi na wang'hangala,
chila munhu kanguganaga yawe goloko wa munhu yalingulavya ndolendole.
7Mzunwa kanguzudilwa na wang'holoze,
goloko wa heye ndo mzidi, wangumbilimaga.
Hanga kanguwawinzaga kwa kuwadedeza, ila hawalingoneka honeche.
8Yalingupata luhala kangigana yuye,
yalingibatilila kuvizela kwa heye, kowa goya.
9Mlolezi mdesi holeka kugazigwa,
yalingulonga udesi kodumigwa.
10Haiwa goya kwa mpoka kuwa na lufufu,
ndo vibi ng'hatu kwa mpogozi kuwalongoza wakulu.
11Yawele na luhala halinguzudila himahima,
kulechela nongwa ndo lutogo kwa heye.
12Kuzudila kwa mndewa ndo kota kubuma kwa isimba,
ila kunoga kwa heye ndo kota nungwi kuli misolo.
13Mwana mpoka ndo kubagama kwa mhaza wa heye,
na kilewa kwa mche ndo kota midovu ja nhonya johambe jimale.
14Ng'handa na lufufu ndo uhalizi woyalingupata munhu kulawa kwa wasekulu wa heye,
ila mche yawele na luhala kangulawaga kwa Mkulu Nguluwi.
15Ugata ndo kota usinjizi unonile,
munhu mgata kogazika kwa nzala.
16Yalingibatilila mizilo kangukuwika kikala kwa heye kuwe kwa kikala goya,
yalingubeza ilajizo kobagama.
17Yalingumtanza mzunwa kangumwazichila Mkulu Nguluwi,
Mkulu Nguluwi komlipa kwa madito ga heye ganojile.
18Mkanye mwanago mhela kitumbila kung'hali baho,
ila wone uleche kudita ahyo ndo kota kumdumya.
19Munhu yalinguzudila ng'hatu yangumlapa yapegwe magazo,
wone umlohole kamwe, yokulapa umlohole kahi.
20Uhulichize ulonzi unojile na kubochela malanguso,
leka uwe na luhala lwa kukutanza mazuwa galinguya.
21Kuli mutwi wa munhu hana majesa menji ga kudita chinhu,
ila choyalingunuwila Mkulu Nguluwi ndo choditigwa.
22Chilinguganigwa kwa munhu ndo igano lya kwimilila,
fola mzunwa kusinda mdesi.
23Kumdumba Mkulu Nguluwi kwangigalaga ukomu,
yalingumdumba kangutambichizwaga kwesela ng'hatu,
hofichigwa na chihile choneche.
24Mgata kanguwikaga moko wa heye kuli luhelo lwa chilyo,
ila ndo mgata lukami mbaka kangulemwela kwinula moko wa heye kuhilika kumlomo.
25Mgaze yalingubeza, naye yalihela nyhala kochilangusa kuwa na luhala,
mkanye yawele na luhala, naye kowa na uwanzi.
26Yalingumtowa mhaza wa heye na kumuwinga mayake,
ndo mwana yalingigala soni na kudeula.
27Mwana wa heni, wone uleche kuhulichiza malanguso,
kowa kutali na ulonzi wa luhala.
28Mlolezi yohambe yatanze chinhu kangubezaga hachi,
na umyango wa mwihe wanguugana unojenoje wa wihe.
29Magazo nagawichigwa goya kwa walingubeza,
ng'hobwa za ngozi naziwichigwa goya kwa kuwatowa wapoka kuli migongo.
Currently Selected:
Nhelo 19: Chividunda
Highlight
Share
Copy
Want to have your highlights saved across all your devices? Sign up or sign in
New Testament © 2014 Pioneer Bible Translators and The Word for the World
Old Testament books © 2018 Pioneer Bible Translators
