Matei 4
4
Kujezigwa kwa Yesu
(Malichi 1:12-13; Lukasi 4:1-13)
1Hamba Muhe Yelile kamlongoza Yesu kuluta honhu hagunuche kujezigwa na Limazoga. 2Navyoyesele kulya chinhu mazuwa makumi gane nemisi na nechilo, na mwiso kehulika nzala. 3Hamba Limazoga lyuya kwa Yesu nakumlonjela, “Wone ukomya hegwe uli Mwana wa Nguluwi, ugalonjele aga maganga gawe mibumunda.”
4Yesu kedichila kalonga, “Yandichigwa kuli Maandiko Matakatifu. ‘Munhu howa mkomu kwa ibumunda hela, leka kwa chila ulonzi woyolonga Nguluwi.’ ”
5Hamba Limazoga nalimuhola mbaka Yelusalemu Muji Welile, kamuwika kuchanya chinhembenhembe kuli chinduwiko cha ng'handa ya Nguluwi, 6nakamlonjela, “Wone uwele Mwana wa Nguluwi, yetoze hanyi, mina yandichigwa muli Maandiko Matakatifu.
“ ‘Nguluwi kowalajiza wahilisi wa kilanga wa heye kwa mbuli ya hegwe,’
Na, ‘Wokuhola mmoko mwawo,
uleche kikwang'hwala magulu ga hegwe mmiganga.’ ”
7Yesu nakamlonjela, “Yandichigwa kahi muli Maandiko Matakatifu.
“ ‘Uleche kumjeza Mkulu, Nguluwi wa hegwe.’ ”
8Hamba Limazoga nalimhola Yesu na kumhilika kuli chidunda chikulu na kumlajila undewa weng'ha uli muisi. 9Limazoga nalimlonjela, “Avino vyeng'ha ndokupa wone ufugamile na kinamiza kwa heni.” 10Aho, Yesu nakamlonjela, “Uche ahano Limazoga! Gandichigwa muli Maandiko Matakatifu. ‘Umfugamile Mkulu Nguluwi wa hegwe, na umditile heye yaliyeka.’ ”
11Baho, Limazoga limleka Yesu na wahilisi wa kilanga woya kumtanza.
Yesu kangwaluka mijito ako Galilaya
(Malichi 1:14-15; Lukasi 4:14-15)
12Yesu loyahuliche kota Yohani Mbatiza kebatigwa na kuhindilwa mchinweng'ho, nakoka kaluta Galilaya. 13Nakoka Nasaleti, nakaluta kikala Kapanaumu muji uli hafungo na ilamba lya Galilaya, mu mmbaka mwa wilaya za Sebuluni na Nafutali. Nakekala kuko 14na ndo vyowenele ula ulonzi ulonjigwe na mloli Isaya.
15“Isi ya Sebuluni na isi ya Nafutali,
kulutila kuli bahali mwambu ya lwanda lwa Yolodani,
Galilaya, isi ya wanhu wa isi zeng'ha!
16Wanhu walingikala kuli jiza,
walona lumuli lukulu.
Na hewo wekale kuli isi ya jiza na chibehelo cha kubagama,
lumuli luwamwemwesela.”
17Kulawila mhela ula Yesu nakaluka kulangusa yolonga, “Mumgalamchile Nguluwi, kwa vila undewa wa kilanga wa habehi!”
Yesu kanguwachema walowa somba wane
(Malichi 1:16-20; Lukasi 5:1-11)
18Yesu loyali yojendajenda hafungo mwa ilamba lya Galilaya, nakawona wanhu weli munhu na mng'holoze, wali walowa somba. Yumwe Simoni yachemigwe Petili hamwe na mng'holoze Andeleya wolowa somba na utandawala. 19Yesu kawalonjela, “Mmbinze, na heni ndowaditani hemwe wavula wanhu.” 20Baho wauleka utandawala wawo, wamuwinza Yesu.
21Kaluta kumwando kawona wanhu wanji weli kahi munhu na mng'holoze, wali Yakubu na Yohani wana wa Sebedayo. Awo wali wekale mitumbwi na mhaza wawo Sebedayo wowika goya utandawala wawo. Yesu kawachema. 22Baho du woka wauleka aula mtumbwi hamwe na mhaza wawo, wamuwinza Yesu.
Yesu kangulangusa na kulohola watamwa
(Lukasi 6:17-19)
23Yesu nakakola Galilaya yeng'ha yolangusa mli ng'handa za kusalila na yodamla Mbuli Inojile ya Undewa wa Nguluwi. Na kuwosela chila matamwa gowalinago wanhu. 24Mbuli nayali yodita Yesu na yenela isi yeng'ha ya Siliya, lelo wanhu wawegala wanhu weng'ha wawele watamwa na chila matamwa, wanhu wawele na chijeni, na wanhu wawele na chinzilisa na wanhu wali chete, ahyo Yesu nakawosela matamwa weng'ha. 25Chilundo cha wanhu na wali womuwinza heye, kulawila Galilaya na kulawila honhu hawele na mji wa Dekapoli kulawila Yelusalemu na Yudeya na isi ili kumwambu na lwanda lwa Yolodani.
Currently Selected:
Matei 4: Chividunda
Highlight
Share
Copy
Want to have your highlights saved across all your devices? Sign up or sign in
New Testament © 2014 Pioneer Bible Translators and The Word for the World
Old Testament books © 2018 Pioneer Bible Translators