A Matiye Sõng 24

Yell sẽn wat beoogo

1A Zezi sẽn yi wẽnd doogẽ wã n looda, la b karen-biisa sẽn kolg n yeel-b tɩ b ges wẽnd dooga sẽn me to-to. 2T'a Zezi leoke: «Y ka gesa rẽ fãa neer la? Sɩd-sɩda m yet-y lame tɩ kugr kõn pa kugra to zug ye, fãa na n sirgame.» 3B sẽn waa n zĩ Oliviye tãnga zugu, a Zezi karen-biisa bal kolg-b lame n le sok-ba: «Soaala, d kotame tɩ y togs-do sẽn ya wakat ning la rẽ fãa na n yɩ la bũmb ning bũmb ning sẽn na n wilg y waoongo la dũni wã sɛɛbo.»

Waasga sɩngre

4T'a Zezi na n yeel-ba: 5«Maan-y gũusgu tɩ b ra wa tudg-y ye. Wʋsg na n zuka mam yʋʋre n wa yeelyã: ‹Mam la Wẽnd Nedã,› tɩ wʋsg na n tudg n tẽ. 6Y na wʋm tɩ b gomd zabr yelle, zabr rãamde na lʋɩ y tʋbrẽ, la ra bas-y tɩ b bondg y yam ye. 7Dẽ fãa na n sɩd zĩndame la nan ka rẽ la dũni sɛɛb ye. Tẽns na n yika zabr ne taaba, tɩ rĩung wulumd ne rĩung; kom na n lʋɩɩ ka la a lʋɩ ka, tẽng na n miimame, 8la rẽ fãa nan yaa dogma waasg sɩngr bala.

9 # Mt 10,22. B na n yõga yãmb n namse, n yõg-y n kʋ. Mam yĩnga dũni wã ninsaalb fãa na n kisg-y lame. 10Wakat kãng la wʋsg na n lʋɩ. Wʋsg na n zãmba taaba la b na n dɩɩ beem ne taaba. 11Zirẽ bãngdba na n yɩɩ ka tɛka n tudg neb wʋsgo. 12Yel-wẽna sẽn paasd n dabd yĩnga, taab nonglem na n wooga wʋsg sũurẽ. 13#Mt 10,22. La sẽn na n modg-a n ka tol n lʋɩ, yẽ soab na põse. 14Wẽnd Rĩunga Koe-noogã na n moana dũni fãa pʋgẽ, ninsaalb fãa yĩnga. Dẽ poor bala la dũni wã na n sɛ.

Zerizalɛɛm fare

15 # Dn 9,27; 11,31; 12,11. Y sã n wa ne Yel-yoog ninga a Daniyɛl sẽn goma t'a be wẽnd dooga pʋga (sẽn karemda ning pãng ne wʋmbo), 16bɩ Zɩɩde rãmb zoe n dʋ tãmse; 17sẽn be-a roog zugu bɩ a ra sig a roogẽ n nog a teed ye; 18#Lk 17,31. sẽn be-a pʋʋgẽ me ra lɛɛg n wa bao a fuug ye! 19Yell na pak pagb niyns sẽn tʋt-b, bɩ sẽn tar b kamba sẽn ket bĩsrẽ wakat kãnga. 20Pʋʋs-y tɩ y zoees da seg waood bɩ vʋʋsg daar ye. 21#Dn 12,1; Yp 7,14. Yel-beed ninga sẽn na n wa, wakat kãngã, wẽnem na n yɩɩga yel-beed niyns fã sẽn wa-b al dũni sɩngre n ta rũnna la b kõn le yãend a taar ye. 22B sã n da ka boogẽ dasem kãens sõore, ned ba a ye kõn põsẽ ye, la nin-sõma wã yĩnga, daara sõor na n boogame.

23Ned sã n yeel yãmba: ‹Ade, Krista bee ka,› bɩ: ‹Ade, b bee ka sẽnẽ,› bɩ y ra tẽ ye. 24Zirẽ-be-krist rãmba la zirẽ-be-bãngdba na n yikame n maan makre la bõn-bãn wʋsgo sẽn na n tudgẽ nin-sõma wã mense, dẽ sã n da tõẽ. 25Ade, m wilg-y la woto tɩ y bãng tiiri.

Ned Biiga waoongo kõn yɩ bõn-solgdem ye

26Dɩlla b sã n yeelyã: ‹Ned Biiga bee weoogẽ bɩ y ra kẽng ye.› B sã n yeele: ‹B soonda ka,› bɩ y ra tẽ fɩ. 27#Lk 17,23-24. Wala saag bugum sẽn yãngd yaanga n wẽneg n ta taoore, Ned Biiga waoong na n yɩɩ boto. 28#Lk 17,37. Ad-y kɩɩng rɩgr kõn solg yibreg ye.

29 # Iz 13,10; 34,4; Ez 32,7; Zl 2,10; 3,4; 4,15; Yp 6,12-13. Yel-beed kãens poore, wĩntoog na n sobame, kiuug ka na n le kõ vẽenem ye, ãds na n dʋʋgame, bũmb fãa na n yogsa a zĩigẽ yĩngri. 30#Dn 7,13; Zki 12,10-14; Yp 1,7. Wakat kãng la Ned Biiga makr na n puk yĩngri tɩ Adem biig fãa tood a yãoogo. B na yãend Ned Biiga tɩ b zao sawato n sigd ne pãng la zɩɩr kãsenga. 31B na n yiisa b malɛk rãmba ne tõntõog sẽn kũmd wʋsgo tɩ b tigim dũni wã taoor la a yaang nin-sõma zãnga.

Kankang yelbũndi

32Kelg-y kankang yelbũndi. A sã n tãood wil poala la a tobd vã-miinim, y miime tɩ tʋʋlg kolgame. 33Woto-me y sã n yãe yell kãensa fãa bɩ y bãng tɩ Ned Biiga wata a naam dɩɩbo. 34M yet-y lame tɩ zamaan kãnga kamb kõn loog tɩ m sẽn wilga fãa ka taas ye. 35Yĩngr la tẽng na n loogame, la mam sẽn togsa na n yalsame. 36Dũni sɛɛb daare la a wakato ned ba a ye ka mi ye, sã n ka Ba: ned ka mi, malɛk ka mi, Ned Biiga ka mi.

37 # Bs 6,5-8. Sẽn zĩnd a Nowe wakatã n na n wilg-d Ned Biiga waoong sẽn na n yɩɩ a soaba. 38Sa-kẽenga sẽn waa n dag n nan ka ni wã, b ra rɩtame la b yũuda, tɩ rap rɩgsd pagba, tɩ pagb kuiis rapa. Yɩɩ woto n tãag a Nowe sẽn kẽ koom koglg kẽenga raare. 39#Bs 7,6-24. Neba ra pa tẽed tɩ bũmb na maan ye, n tãag sa kẽengã sẽn wa n loog ne b fãa gilli. Ned Biiga waoong me na n yɩɩ boto. 40Rap a yiib na n kooda pʋʋgẽ, tɩ b yãk a ye n bas a ye; 41pagb a yiib na n werda neerẽ, tɩ b yãk a ye n bas a ye.

42Maan-y gũusgu tɩ y ka mi y Zu-soaba waoong raar ye. 43Tags-y neer tɩ zak soab sã n da miẽ sẽn ya wakat ning la wagdr na n waẽ yʋngo, a kõn gũsẽ ye, a kõn basẽ tɩ b poog a roog ye. 44#Lk 12,39-40. Yãmb me, bob-y n dõbẽ tɩ yaa wakat ning yãmb sẽn pa tẽedã la Ned Biiga na n wa.

Sõgen Kãseng yelbũndi

45M ba bõe la sõgen sõngo la yẽesenga, t'a zu-soaba rɩk a zak n gũnug-a, t'a kõt zaka rãmb rɩɩbo, wakat sẽn ta? 46Zu-noog soab la sõgen kãnga, a zu-soaba sã n yi sor n wa mik t'a maanda boto. 47Sɩda m yet-y lame t'a na gũnug-a a paoong fãa. 48La Sõgna sã n ya sõgen yoogo, n yeel a sũurẽ: ‹M zu-soaba kaoosda waoongo›, 49t'a na n yik n pãbd a taaba, n na n dɩtẽ la a tɩgd rãam ne rã-yũudba, 50yaa daar ning la wakat ning a sẽn pa tẽedã la a zu-soaba na n wa; 51a na yiis-a, a na tɩ naag-a ne zãmb rãmba; be yaa yãbre la yẽn kẽrsg zĩiga.

Currently Selected:

A Matiye Sõng 24: SSDC98

Highlight

Copy

Compare