Ezipt yiib kibare 5
5
Pipi sɛk ne Ezipt dĩma
1A Moyiiz ne a Aarõ waa n tɩ yãenda Ezipt tẽng dĩma n yeel-a: «Soaala-Wẽnde, a Israyɛl Wẽnnaam, n yet woto: Bas m neba tɩ b yi n tɩ maan kibs mam yĩng we-raoogẽ.» 2Tɩ dĩma yeele: «Fo Wẽnda la ãnna tɩ m tog n deeg a noor n bas a Israyɛl t'a looge? M ka mi, ba sẽn paoode, fo Wẽnda sẽn ya a soab ye, m kõn sak t'a Israyɛl loog ye.» 3A Moyiiz ne a Aarõ yeel-a lame: «Yaa Ebre rãmb Wẽnnaam n lik tõndo. Woto wã, kõ-y tõnd sor tɩ d kẽn da-yɩten-daar kẽnde, n ta we-raoogẽ wã n kʋ maoong n waoog bãmba. Sã n ka rẽ b na n kʋ-d-la ne sʋʋga bɩ ne nod-tãoodre.» 4Dẽ la Ezipt dĩma leok yã: «Yaa bõe la yãmb baooda, Moyiiz ne a Aarõ, n na n sãam neba tʋʋma? Leb-y y tʋʋmnẽ!» 5Dĩma le paasame: «Neba sẽn lebg wʋsga la yãmb na n kẽ sʋk n sãam tʋʋma?»
Dĩma noore
6Badaare bala, dĩma kõo sẽn get-b tʋʋma la sẽn gʋlsd-b sɛba noor kãngã: 7«Da le bao-y moodo n kõ nin-bãmba tɩ b wẽed tãn-koɛɛma wala y sẽn da maand pĩnda ye. B kẽng b toore n tɩ bao moodo. 8La modg-y-ba tɩ b paam tãn-koɛɛm wala zaamẽ la rabɩtẽ. Tãn-koɛɛma sõor pa tog n woog ye. Israyɛl kamba yaa kʋɩɩm dãmba, yaa rẽ la b sẽn yetã: d kẽng n tɩ kʋ maand Soaala-Wẽnd yĩnga. 9Paas-y b tʋʋmna tɩ b da le paam n vʋʋs ye la b ra le paam vɩʋʋg n gomd zirẽ-be-goam ye.»
10Sẽn da get-b tʋʋma la sẽn gʋlsd-b sɛba tɩ yeela zãma wã: «Dĩma noor la woto: M ka na n le kõ-y mood ye. 11Kẽng-y y toore n tɩ bao moodã y sẽn tõe n paam zĩig ning fãa. La tʋʋmd ka be y sẽn da tʋmd pĩnda, y sẽn ka na n kell n tʋm ye.» 12Zãma wã sẽega zãnga n na n bao moodo n wa wẽ tãn-koɛɛma. 13Sẽn get-b tʋʋma da tãsd-b lame: Y tog n paama y sẽn paamd daar fãa wala b sẽn waa n baood moodã n kõt yãmbã. 14B kɩtame tɩ b pãb sɛb gʋlsdba, dĩma sẽn da tũus Israyɛl kamba sʋka; b ra pãbd-b lame la b sokdẽ: Bõe tɩ zaame la rũnna y tãn-koɛɛma sõor pa ta y sẽn da paamd dasem kam?
Sɛb-gʋlsdba leokre
15Israyɛl kamb sẽn gʋlsd-b sɛba waa n guglma ne dĩma: «Bõe tɩ y tar y yemsa woto? 16Tõnd ka le paamd mood sẽn kʋʋs ye la b pʋgda tõnd wakat buud fãa, tɩ yaa: wɩng-y ne tãn-koɛɛma, wɩng-y ne tãn-koɛɛma! Tõnd meng n le paamd pãbre. Dẽ ka segd ye!» 17Dĩma leok-b lame: «Yãmb yaa kʋɩɩm dãmba, kʋɩɩm dãmb menga, yaa rẽ la y sẽn yete: tõnd dat n tɩ kʋʋ maoong n kõ Soaala-Wẽnde. 18Yik-y tao n leb y tʋʋmnẽ! Moodã, y kõn paam-a, la sõng-y tɩ tãn-koɛɛma sõor taase.»
Israyɛl kamb sũur pa noom ye
19Seb gʋlsdba yika ne yɩɩre b sẽn wʋm tɩ b yet-ba: Tãn-koɛɛma y sẽn tog n paam daar fãa wã, da sak-y tɩ b sõora paoog ye. 20B yi-la dĩma nengẽ n zoe n ta a Moyiiz la a Aarõ nengẽ. Bãmb me ra gũud-b lame. 21La b yeel-b lame: «Bɩ Soaala ges y sẽn maana la b ning-y taale. Yãmb kɩtame tɩ dĩma ne a poorẽ dãmb maand beem ne tõndo; yaa wa y rɩka sʋʋg n ning b nugẽ tɩ b kʋ tõndo.»
22A Moyiiz lɛɛg n waa Soaala-Wẽnd taoor n yeele: «Soaala, bõe tɩ yãmb namsd y nebã, bõe tɩ y kõ maam tʋʋm kãnga? 23Mam sẽn wa Ezipt dĩma nengẽ tɛka, m sẽn wilg yãmb daabã, a namsda y nebã la yãmb ka maand fɩ n na n fãag-b ye.»
Currently Selected:
Ezipt yiib kibare 5: SSDC98
Highlight
Copy
Compare
Share
Want to have your highlights saved across all your devices? Sign up or sign in
SEBR SÕNGO © Alliance Biblique du Burkina Faso, 1998.
