Daniyɛl 3
3
Nin-naand waoogre
1Dĩm a Nabikodonozor kɩtame tɩ b maan ninsaal togsende ne sãnem. Nin-naanda woglem yaa kãntɩɩs pisoobe, a taglma yaa kãntɩɩs a yoobe. Dĩma yals-a-la Dura tẽn-nabrẽ, Babilon tẽn-peelmẽ. 2Dĩma yaoolame marsã n kɩt tɩ b tigim tẽnga kug-zĩidba, taoor dãmba, kombɛɛmba, sagendba ligd-tigsdba, bʋ-kaoodba, dog-n-mika gũudba, sẽn deeg kãseng buud fãa tẽnga pʋgẽ. A boolame tɩ b wa t'a na n yãka zĩig n vigl a nin-naandã la na yɩɩ kibs kãsenga. 3B fãa gill sɩd waame n na n maan kibsa la b tigma naanda taoore.
4Sẽn so-a kibsa moonega yeela woto: «Yãmb fãa, buud toor-toor dãmba, zamaan toor-toor dãmba, zelemd toor-toor dãmba, kelg-y y sẽn na n maan bũmb ninga. 5Wakat ning fãa y sẽn na n wʋm bargo, wɩɩga, pɛndga, ruudga, bɛɛla, kʋnde, bũmb ning fãa sẽn tar n maand noogo, bɩ y sulg y neng tẽnga n waoog dĩm a Nabikodonozor sãnem nin-naande. 6Sẽn ka na n sulg a neng tẽnga la a waooge, b na n lob-a-la bug-witmẽ, bug-toaagẽ menga.»
7Woto wã b sẽn wʋm bargo, wɩɩga, pɛndga, ruudga, bɛɛla, kʋnde la bũmb ning fãa sẽn tar n maand noogo, b wõgemda zãnga, tẽns toor-toor dãmba, buud toor-toor neba, zelemd toor-toor dãmba, n waoog a Nabikodonozor sãnem nin-naande.
A Daniyɛl zo-rãmba bãong lukri
8Ka yãe n kaoose, tɩ Kalde rãmb kẽer wa luk Zʋɩf rãmba bãong ye. 9B tɩ yãenda a Nabikodonozor n yeel-a: «Wẽnd na wolg y yõore, dĩma. 10Dĩm sõngo, yaa yãmb meng n yiis noore n wilg tɩ b sã n wʋm bargo, wɩɩga, pɛndga, ruudga, bɛɛla, kʋnde la bũmb ning fãa sẽn tar n maan noogo, bɩ b wõgemd n waoog sãnema nin-naande. 11La y paasame tɩ sẽn ka wõgemda la a waoog sãnem nin-naandã bɩ b los a soab bug witmẽ wã. 12Ade, yãmb sẽn yãk Zʋɩf niynsi n gũnug y soolma, Babilon tẽnga, a Sadrak, a Mesak la a Abed-Nego, bãmb pa reegd y noora ye, dĩm sõngo. B yeelame tɩ b kõn tũ yãmb wẽnd dãmba ye la b kõn waoog sãnema nin-naanda ye.»
13A Nabikodonozor sũur puuga wʋsgo. A kɩtame tɩ b bool a Sadrak, a Mesak la a Abed-Nego. Tao tao bal tɩ b waa ne-ba. 14Dẽ la a Nabikodonozor yeel-ba: «Yaa sɩd bɩ, Sadrak, Mesak la Abed-Nego, tɩ yãmb pa tũud mam wẽnd dãmba la y pa waoogd mam sãnem nin-naandã? 15Marsã tɛka y sã n wʋm baorgo, wɩɩga, pɛndga, ruudga, bɛɛla, kʋnde la bũmb ning fãa sẽn tar n maan noogo, m sok n gese y na wõgemd la y waoog m nin-naanda bi? Y sã n pa waoog-a, zĩig pʋgẽ bala, b na yõk yãmb n los bug-witmẽ. D na ges wẽnd ning marsã sẽn na n fãaga yãmb mam nugẽ?»
16A Sadrak, a Mesak la a Abed-Nego yeela a Nabikodonozor: «Tõnd ka tar sẽn na n leok yãmb yell kãnga poorẽ ye, n kõ d meng bʋʋm ye. 17Bãng-y bala tɩ tõnd Wẽndã, tõnd sẽn pʋgd a soaba tõe n fãagd-d lame. La a pʋs n na yiisa tõnd bug-witmẽ wã la a fãag tõnd yãmb nugẽ. 18La ba b sã n ka fãag-do, dĩm sõngo, tõnd kõn tũ yãmb wẽnd dãmba la d kõn waoog sãnem nin-naanda ye.» 19B leokra pidsa a Nabikodonozor ne sũ-puuri, t'a ka le tõe n yõk a meng a Sadrak, a Mesak la a Abed-Nego taoor ye. A yeelame tɩ b ning wʋnga bugum la b kɩt t'a tʋʋlma yɩɩg dasem kam dẽnd naoor a yopoe. 20A kɩtame t'a tãb-biisã, sẽn ya-b nin-daado, yõk a Sadrak, a Mesak la a Abed-Nego n loe la b tus-ba n lub bug-witma pʋga. 21Yaa ne b kibs futu, b kurga, b kobre la b pugla la b sẽb-ba n los bug-witmẽ wã. 22Dĩma noor da ka be barsg ye, woto wã bug-toaalga maneg n wɩngame, a walma ra yaa wʋsg tɩ looge n tol n kʋ tãb-biis niyns sẽn kolg-b ne a Sadrak, a Mesak la Abed-Nego. 23B sẽba neb a tãabã, a Sadrak a Mesak la a Abed Nego n los bugma pʋga.
A Azariyas yɩɩlle
24B kẽnda bug-witma pʋga, n pẽgd la b pʋʋsd Soaala. 25A Azariyas da yɛsa yĩngr la a ra pʋʋsdame. A yaaga a noor n yeel woto:
26«D yaab rãmb Wẽnde,
soog-y pẽgre la waoogre,
zamaan ne zamaana!
27Y sẽn maan bũmb ning fãa d yĩnga,
y kell n tũu y sẽn ne tɩ segd la zemsame.
28Namsg buud fãa sẽn lʋɩ d zugu
n lʋɩ Zerizalɛɛm zugu,
d ba rãmb tẽn-sõngã zugu,
tũu ne bʋʋd sẽn bʋ tɩrga,
tũu ne d yel-wẽna
sẽn da tog ne sɩbgr ninga.
29N-ye! Tõnd basa yãmba,
n maan wẽng n paas wẽnga.
N-ye! D kongra yɩɩ wʋsgo.
D pa reeg y noor ye.
30D pa tũ y sẽn wilg ye,
d pa maan y sẽn yet tɩ d maan ye.
La noora ra kõo tõndo, d manegr yĩnga.
31N-ye! Yãmb sẽn base
tɩ bũmb ning fãa lʋɩ d zugu,
yãmb sẽn sɩbg-d sɩbgr ning fãa,
y tũu zemsg sore.
32Yãmb dɩka tõndo n sagl d bɛɛba nusẽ,
yaa neb sẽn ka barka, n ka mi Wẽnde.
Yãmb dɩka tõnd n kõ dĩma,
dĩm sẽn ka tũud sɩda,
dĩm wẽnem sẽn ka be to saaga tẽngre.
33Dũnna d zĩime n ka tõe n yaag d noor ye.
Nee wa sẽn tũud-b yãmbã,
sẽn waoogd-b yãmba pʋɩɩre
yaa yãnde la tʋʋr bala.
34Da bas-y-d ye, y sẽn wẽena yĩnga,
y sẽn wẽen ne y meng yʋ-sõnga yĩnga,
bɩ y ra sãam y zooda ne-d ye.
35Y zoa a Abraam yĩnga,
y sõgen a Izaak yĩnga,
y nin-sõng a Israyɛl yĩnga,
da zãag-y y barka ne d ye.
36Yaa bãmb la y kãab noogo
n kãab tɩ b kamb na yɩ wʋsgo
wala yĩngr ãdse,
wala bĩisri sẽn be mogr noore.
37Soaala, ges-y tõnd buudã
sẽn lebg fiyãa-yãoo
buud a taaba fãa sʋka,
ges-y paoogr ninga
b sẽn paoogd y buuda rũnna,
la yaa zĩig zãnga,
la yaa d yel-wẽna yĩnga.
38Dũnna, naab ka ye,
bãngd ka ye, dĩm-biig ka ye,
yũ-noog maoong ka ye,
sugr kosg maoong ka ye,
yamleoog kũun ka ye,
tɩdar ka ye, pʋʋsg roog ka ye,
tɩ d na n dɩgl a pʋgẽ
d kood rẽemsa biisi,
39la d paam y nimbãan-zoeere.
Bɩ y yam kẽ y kamba
sẽn zĩ-b ne toogo la yãnde.
40Bɩ d dũnna maoongã
yɩ wala piisi la lols rẽnna,
wala pe-wubds tusr rẽnna.
Bas-y tɩ d le tũ yã,
tɩ sẽn teeg-a yãmba
kõn dɩ yãnd abada.
41Marsã d na modg ne d sũur fãa,
n tũ yãmba, la d maan gũusgu,
la d modg n bao yãmb sõm.
42Da bas-y-d ne yãnd ye.
D dɩ y nimbãan-zoeera yõodo,
d paam y nonglma pʋɩɩre.
43Fãag-y-do ne pãng ninga
sẽn kɩt tɩ y tʋmd
pɛlen-yɩk tʋʋma,
kɩt-y tɩ b pẽg y yʋʋre.
44Neb niyns sẽn tʋl
y yemsa ne wẽnga
bɩ y ning-b yãnde,
b yãnd yɩ kãsenga,
b naama wẽneg n sɛ,
b pãng koms zãnga.
45B bãng tɩ yãmb y ye bala
n ya Wẽnd la Soaala,
yãmb bal la dũni wã fãa pẽgda.»
46Naaba sõgen-kamba sẽn da los bãmb bugmẽ wã da tara bugma paasgo ne kaam, ne sũudu, ne gʋma, ne bugsuntung raado. 47Bug-walma ra zẽka al yĩngr-yĩngri. 48A piuugame n yɛdg n dɩ Kalde neba sẽn da kolg-b bug-toaalga noore. 49Soaala malɛk yaool n siga pʋgẽ n paam a Azariyas ne a tũud-n-taasã. A yiisa bugma walem yɩnga, 50n yaool n fʋʋs pemsem noogo, bũmb sẽn maas waa meenem, woto bugma ka sɩɩs-b ye. B pa wʋm toogo la yɩɩr ye.
Kamb a tãaba yɩɩlle
51La kamb a tãaba fãa naaga taaba n tãs yɩɩlle bugma pʋga n pẽgd la b kilsd Wẽnde la b yetẽ:
52«Paam-y pẽgre, Soaala,
d ba rãmb Wẽnde,
soog-y pẽgre la kilsgu
zamaan ne zamaana!
Y sõmblema la y ziir paam pẽgre,
soog-y pẽgre la kilsgu
zamaan ne zamaana!
53Paam-y pẽgre y ziira ro-sõngẽ,
pẽg-y la y zẽk b yʋʋr
zamaan ne zamaana!
54Paam-y pẽgre tɩ y zao malɛgsa zutu
la y nee sẽn zulmẽ.
Soog-y pẽgre la kilsgu
zamaan ne zamaana!
55Paam-y pẽgre y naama goeel zugu,
d pẽg-b la d zẽk b yʋʋr
zamaan ne zamaana!
56Paam-y pẽgre sa-gãnẽ
d pẽg-b la d zẽk b yʋʋr
zamaan ne zamaana!
57Yãmb fãa, Wẽnd sẽn naan ne b nugu,
kils-y la y zẽk b yʋʋr
zamaan ne zamaana!
58Yĩngr saase, pẽg-y Soaala
kils-y la y zẽk b yʋʋr
zamaan ne zamaana!
59Wẽnnaam malɛgse, pẽg-y Soaala
kils-y la y pẽg b yʋʋr
zamaan ne zamaana!
60Yĩngri ko-yũusi, pẽg-y Soaala
kils-y la y pẽg b yʋʋr
zamaan ne zamaana!
61Wẽnd tãb-biisa fãa, pẽg-y Soaala,
kils-y la y pẽg b yʋʋr
zamaan ne zamaana!
62Wĩntoogo la kiuugu, pẽg-y Soaala,
kils-y la y pẽg b yʋʋr
zamaan ne zamaana!
63Yĩngr ãdsa fãa pẽg-y Soaala,
kils-y la y pẽg b yʋʋr
zamaan ne zamaana!
64Sa-koom la meenem, pẽg-y Soaala,
kils-y la y pẽg b yʋʋr
zamaan ne zamaana!
65Yãmb fãa, sobdo, pẽg-y Soaala,
kils-y la y pẽg b yʋʋr
zamaan ne zamaana!
66Bugum la waolgo, pẽg-y Soaala,
kils-y la y pẽg b yʋʋr
zamaan ne zamaana!
67Waood la tʋʋlgo, pẽg-y Soaala,
kils-y la y pẽg b yʋʋr
zamaan ne zamaana!
68Meenem la sa mina-mina, pẽg-y Soaala,
kils-y la y pẽg b yʋʋr
zamaan ne zamaana!
69Wĩntoog la yʋngo, pẽg-y Soaala,
kils-y la y pẽg b yʋʋr
zamaan ne zamaana!
70Vẽenem la lika, pẽg-y Soaala,
kils-y la y pẽg b yʋʋr
zamaan ne zamaana!
71Fʋl-fʋl-bi la wulgu, pẽg-y Soaala,
kils-y la y pẽg b yʋʋr
zamaan ne zamaana!
72Koom sẽn gĩsi la sapɩlem, pẽg-y Soaala,
kils-y la y pẽg b yʋʋr
zamaan ne zamaana!
73Sa-yãgre la sawato, pẽg-y Soaala,
kils-y la y pẽg b yʋʋr
zamaan ne zamaana!
74Bɩ tẽnga gill, pẽg Soaala,
a kils la a pẽg b yʋʋr
zamaan ne zamaana!
75Tãn-bɛd la tãn-bi, pẽg-y Soaala,
kils-y la y pẽg b yʋʋr
zamaan ne zamaana!
76Tẽnga tɩɩs buud fãa, pẽg-y Soaala,
kils-y la y pẽg b yʋʋr
zamaan ne zamaana!
77Mogre la kʋɩlse, pẽg-y Soaala,
kils-y la y pẽg b yʋʋr
zamaan ne zamaana!
78Ko-bundma fãa, pẽg-y Soaala,
kils-y la y pẽg b yʋʋr
zamaan ne zamaana!
79Zĩm bɛd gilli, pẽg-y Soaala,
kils-y la y pẽg b yʋʋr
zamaan ne zamaana!
La sẽn vɩ-b koomẽ fãa, pẽg-y Soaala,
kils-y la y pẽg b yʋʋr
zamaan ne zamaana!
80Yĩngr luiili wã fãa, pẽg-y Soaala,
kils-y la y pẽg b yʋʋr
zamaan ne zamaana!
81We-rũmsi, la yir rũmsi, pẽg-y Soaala,
kils-y la y pẽg b yʋʋr
zamaan ne zamaana!
82Ninsaalb kamba, pẽg-y Soaala,
kils-y la y pẽg b yʋʋr
zamaan ne zamaana!
83La yãmba, Israyɛl kamba, pẽg-y Soaala,
kils-y la y pẽg b yʋʋr
zamaan ne zamaana!
84Yãmba, maan-kʋʋdba, pẽg-y Soaala,
kils-y la y pẽg b yʋʋr
zamaan ne zamaana!
85Wẽnd sõgen-kamba fãa, pẽg-y Soaala,
kils-y la y pẽg b yʋʋr
zamaan ne zamaana!
86Yam dãmb buudu la nin-sõma wã, pẽg-y Soaala,
kils-y la y pẽg b yʋʋr
zamaan ne zamaana!
87Tõog-m-meng la sulg-m-meng rãmba, pẽg-y Soaala,
kils-y la y pẽg b yʋʋr
zamaan ne zamaana!
88Ananiya, Azariyas, Mikayɛl, pẽg-y Soaala,
kils-y la y pẽg b yʋʋr
zamaan ne zamaana!
Soaala fãag-d-la kũum la bʋg-tẽnga.
Bãmb n yiis-d bugum sʋka.
Bãmb n zãag-d ne bug witem waolgo.
89D pʋʋs Soaala barka tɩ b yaa nin-noanga
la b nimbãan-zoeera ka be sɛɛb ye!
90Yãmb fãa sẽn waoogd-b Soaala,
pẽg-y Wẽnd ninga sẽn yɩɩd fãa-fãa!
Kils-y-ba la pʋʋs-y b barka
tɩ b nonglma ka be sɛɛb ye.»
A Nabikodonozor yɛɛsgo
91(24) A Nabikodonozor yɛɛsame, a sẽn wʋm neb a tãaba yɩɩlã la a yika tao-tao n sok a sõsd-n-taasã: «Tõnd ka sẽb neb a tãab bal n lob bugmẽ wã laa?» Tɩ b leok-a: «Yaa boto, dĩma!» 92(25) Tɩ dĩma le yeele: «Yaool n yaa neb a naase la mam ne sẽn kẽnd b yam, n ka loe wĩir, bugma pʋga, tɩ bũmb ka maand b ye, la a naas soaba wẽnda malɛka.» 93(26) A Nabikodonozor kolga wʋnga noor n tãse: «Sadrak, Mesak, la a Abed-Nego, yãmb yaa yĩngr pãng soaba sõgen-kamba, yɩɩ-y n wa-y ka!» La a Sadrak a Mesak la Abed-Nego yii bugma pʋga. 94(27) Tɩ kug-zĩidba, taoor dãmba, kombɛɛmba, la dĩma sõsd-n-taas tigim taab n na n ges neb a tãabã. Bugma ka tõog n maan b yĩnga fɩ. B zug zoobd meng ka rɩ bugum ye, b futa ka tedg ye, bugma ka bas a yũug b yĩngẽ ye. 95(28) Dẽ la a Nabikodonozor yeel yã: «A Sadrak a Mesak la a Abed-Nego Wẽnnaama paam pẽgre tɩ b tʋma b malɛk t'a fãag b sõgen-kamba. Bãmb basa b meng ne Wẽnde n kɩɩs dĩma noore. B saka b yĩng na sãame tɩ b pa tʋlg n waoog wẽnd a to sã n ka bãmb Wẽnda ye. 96(29) Ad m noore: tẽns toor-toor neba, buud toor-toor dãmba, zelemd toor-toor dãmba, ned ninga sẽn saka n gom n paoog b Wẽndã, a Sadrak, a Mesak la Abed-Nego Wẽndã, bɩ b kʋ a soab, zĩig pʋgẽ bala, bɩ b wãa a roto, tɩ Wẽnd a to ka be sẽn tõe n fãag a neb woto ye.» 97(30) Dĩma kɩtame t'a Sadrak, a Mesak la a Abed-Nego yell maneg Babilon na-tẽngẽ.
Rĩma zãmsg a yiib soaba
98(31) Rĩm a Nabikodonozor gʋlsa tẽns toor-toor dãmba, buud toor-toor neba, zelemd toor-toor dãmba la a ad a sẽn yeele: «Maam, a Nabikodonozor, yãmb dĩma, n pʋʋsde. Wẽnd na kõ-y tɩgre la laafi.
99(32) M gesame tɩ segdame tɩ m wilg y makr niynsi la bõn-bãn niynsi, yĩngr Wẽnnaama sẽn maan m yĩnga. 100(33) Ad-y makr dãmba zʋʋga ninsaal yam wʋsgo, b bõn-bãna yaa b pãn-kãsenga kaseto. B naam ka be sɛɛb ye. B soolma vigla zamaan sẽn kõn loog yĩnga!
Currently Selected:
Daniyɛl 3: SSDC98
Highlight
Copy
Compare
Share
Want to have your highlights saved across all your devices? Sign up or sign in
SEBR SÕNGO © Alliance Biblique du Burkina Faso, 1998.