2TIMOTE 4

Saglgo la baasgo

1Mam yõkda f sɛɛga, zoe Wẽnnaam la f zoe Krista a Zezi sẽn na n wa kao sẽn vɩ-ba la sẽn ki-ba bʋʋdo, sẽn na n le wa la b dɩ b naama: 2moon Wẽnnaam Koɛɛga, togs la f le togse, noom-b tɩ ka noom-b; ning pãnga n kɩɩse, n tãse; modg n sagl ne maag-m-menga la ne zãmsg tɩrg raab bala. 3Wakat n wate tɩ neba ka na n le reeg zãmsg sõnga ye; b na n tũla b tʋls wẽnsã; b tʋba sẽn kɩrd tɩ b pa tõe n zĩnd sɩɩ wã, b na n baoo karen-saam-dãmb ka tɛka, neb sẽn gomd b sẽn dat tɩ b gom bũmb ningã, 4n yaool n lak zãng ne sɩda, n kelgd solem-vɩɩdo. 5Sã n ya foom, maan gũusgu ne bũmb fãa, sak namsgo, moon Koe-noogã, modg tɩ yɩ sõmb zãnga.

6Sã n ya maam, m lebga bũmb b sẽn zoe n dɩk n kɩrg maoong zugu la mam loogra wakat zoe n taame. 7Mam zaba zab-sõngã n baase, m zoeesa ta-la a tɛka, m gãda m tẽebo. 8La marsã, pugl ning sẽn ya sõmblem kasetã zoe n wʋga m yĩnga. Keta bʋʋda kao bala tɩ Soaala sẽn ya bʋ-tɩrg soaba rɩk-a n fõgen maam; la ka maam bal n na n paam-a ye, yaa neb niyns fãa sẽn na n gũ b waoonga ne nonglem.

9Ning pãng n wa m nengẽ tao! 10#Kol 4,14; Fm 24; 2Ko 8,23; Ga 2,3; Tt 1,4. A Demas basa maam, dũnna vɩɩma yõod pʋgb yĩnga. A leba Tesalonik, t'a tũud-n-taaga Kresãs leb Galasi, t'a Tit kẽng Dalmasi. 11#Kol 4,14; Fm 24; Tv 12,12, 25; 13,13; 15,37-39; Kol 4,10. A Luk bal n be ne maam. Peeg a Mark me n wa tɩ yẽ bal n tõe n yaoog maam m tʋʋmda pʋgẽ. 12#Tv 20,4; Ef 6,21-22; Kol 4,7-8. Mam tʋma a Tisik Efɛɛz. 13#Tv 20,6. F sã n watẽ bɩ f zɩ m fu-goabgã m sen bas Troas, a Karpos zakẽ, ne m sɛbã, bũmb zãnga sɛb niyns sẽn gʋls-b gãnd zugã. 14#1Tm 1,20; Yɩ 62,13; Rm 2,6. Yõaka a Aleksãndr maana maam wẽng menga; Soaala na rol-a n zems a tʋʋma. 15Fo me gũus ne nin-kãnga tɩ yẽ n yɩ d bɛ menga, n kɩɩs d zãmsgo.

16Mam sẽn waa n na n gom n fãag m meng pipi bʋʋda zĩigẽ, ned ba a ye ka sõng maam ye. B fãa basa maam. Wẽnd da ning b taal ye. 17Soaala bal n sõng maam la b pidsa maam ne raoodo tɩ mam tõog n zẽk m koɛɛga n moon Fãagda Waoongo tɩ bu-zẽmba fãa wʋm; la Wẽnd meng n deeg-m gɩgemd noorẽ. 18Soaala n na n kɩt tɩ m põs geel wẽns buud fãa, n fãag maam la b yãag maam n ta b Arzãn Rĩungẽ. B paam pẽgr yʋʋm sẽn kõn sɛ. Ami!

19 # Tv 18,2; 2Tm 1,16-17. Pʋʋs a Priska la a Akilas la a Onezifor ne a zak fãa. 20#Tv 19,22; Rm 16,23; Tv 20,4; 21,29. A Erast paa Korẽnt; mam basa a Trofim sẽn pa keem Milɛ tẽnga. 21Ning pãng n wa tɩ waooda nan ka sɩng ye.

A Ewubul tɩ m pʋʋs-fo, n paas a Ypdẽns, a Lẽ, a Klodiya la d saam-biisa fãa.

22Soaala zĩnd ne fo! Wẽnd bark sig yãmb fãa!

Currently Selected:

2TIMOTE 4: SSDC98

Highlight

Copy

Compare